ԼՂՀ ԱՆ. Ստեփանակերտում են «Արաբկիր» բժշկական համալիրի մասնագետները

Արցախի առողջապահության նախարարության հրավերով Ստեփանակերտում են «Արաբկիր» բժշկական համալիրի մասնագետները` պրոֆեսոր Արա Բաբլոյանի գլխավորությամբ: Երևանից ժամանած պատվիրակությունը նախևառաջ հյուրընկալվել է Ստեփանակերտի Հանրապետական բժշկական կենտրոնում, որտեղ Արցախի առողջապահության նախարարության և «Մանկական բժիշկների հայկական ասոցացիա»  հասարակական կազմակերպության նախաձեռնությամբ կայացել է արդիական մանկաբուժության հարցերին նվիրված կոնֆերանս:

Կոնֆերանսը բացել է առողջապահության նախարարի առաջին տեղակալ Զոյա Լազարյանն, ով, ողջունելով ներկաներին, կարևորել է նման միջոցառումների կազմակերպումը: «Այսօր Արցախում հերթական գիտագործնական միջոցառումն է կազմակերպվում: Այստեղ են «Մանկական բժիշկների հայկական ասոցացիայի»  մի խումբ մասնագետներ, ովքեր Արցախի գործընկերներին իրենց գիտելիքներն են փոխանցելու: Այս ամենը նպատակ ունի առաջին հերթին օգնելու տեղի մասնագետներին՝ ձեռք բերելու համար նոր գիտելիքներ, և, ի շահ Արցախի բնակչության առողջության պահպանման, այն կիրառել աշխատանքում» ,- նշել է փոխնախարարը:

Միջոցառմանը ներկա ԱԺ առողջապահության և սոցիալական հարցերի մշտական հանձնաժողովի նախագահ Արամ Գրիգորյանն, իր հերթին ողջունելով կոնֆերանսի մասնակիցներին, նույնպես կարևորել է նման համագործակցությունը և հույս ու վստահություն հայտնել, որ այն շարունակական կլինի:

«Արաբկիր» բժշկական համալիրի մանկական վիրաբույժ-ուռոլոգ, բժշկական գիտությունների դոկտոր պրոֆեսոր, ՀՀ ԱԺ առողջապահության, մայրության և մանկության հարցերի մշտական հանձնաժողովի նախագահ Արա Բաբլոյանն էլ իր խոսքում նշել է, որ տեղի մանկաբույժների համար կազմակերպվելու է նաև վարպետաց դասեր ու քննարկումներ, իրականացվելու է նաև հիվանդների խորհրդատվություններ և հետազոտություններ: «Այսօրվա կոնֆերանսի մասնակիցներին կրեդիտ ստանալու համար տրվելու են հավաստագրեր. ովքեր 5 տարվա ընթացքում կհավաքեն 220 կրեդիտ, նրանք կշարունակեն իրենց մասնագիտական գործունեությունը»,-ասել է Ա. Բաբլոյանը:
  

Կոնֆերանսին ներկա մի խումբ մասնագետներ ներկայացրել են արդի մանկաբուժության խնդիրները, հանդես եկել տարբեր դասախոսություններով, ներկայացրել Հայաստանի և համաշխարհային բժշկագիտության վերջին տարիների փորձը: Կոնֆերանսին մասնակցել են Ստեփանակերտի, ինչպես նաև «Արևիկ» և Արցախի շրջանների մանկաբույժները:

Հարցեր, պատասխաններ, մեկնաբանություններ