Մ. Հերացու անվան պետական բժշկական համալսարանում կայացավ «Պլաստիկ վիրաբուժության և դերմատոկոսմետոլոգիայի նոր հորիզոնները» թեմայով միջազգային 5-րդ կոնգրեսը

Հոկտեմբերի 28-30-ը Երևանի Մ. Հերացու անվան պետական բժշկական համալսարանում կայացավ «Պլաստիկ վիրաբուժության և դերմատոկոսմետոլոգիայի նոր հորիզոնները» թեմայով միջազգային 5-րդ կոնգրեսը, որի կազմակերպիչներն էին Պլաստիկ, վերականգնողական և էսթետիկ վիրաբույժների հայաստանյան ասոցիացիան, Պլաստիկ և վերականգնողական վիրաբույժների վրացական հասարակությունն ու Երևանի պետական բժշկական համալսարանը: Կոնգրեսին զեկույցներով հանդես եկան ոլորտի ակնառու ներկայացուցիչներ ԱՄՆ-ից, Անգլիայից, Ավստրիայից, Ռուսաստանից, Վրաստանից և Ուկրաինայից: 

Գենադի Պատլաժան.  Հայաստանում որակով են մատուցվում պլաստիկ վիրաբուժության ծառայությունները

«Մեդ-Պրակտիկի» զրուցակիցն է բ.գ.թ., «Վիրտուս» կլինիկայի առաջատար պլաստիկ վիրաբույժ Գենադի Իգորևիչ Պատլաժանը (Ուկրաինա):

–   Գենադի Իգորևիչ, թույլ տվեք շնորհավորել Ձեզ երկու փայլուն զեկույցների համար: Մեզ առավել հետաքրքրեց առաջինը՝ կրծքագեղձի կախվածության (պտոզի) մասին աշխատանքը: Կարծում եմ` արդիական խնդիր է: 

–   Շնորհակալ եմ: Այո´, իրավացի եք, արդիական խնդիր է, քանի որ մինչ օրս չունենք 100 տոկոսանոց պատասխան: Վիրաբույժները գլուխ են ջարդում ու չգիտեն՝ ինչպես անեն, որ հետագայում պացիենտի կախված կուրծքն այլևս երբեք չկախվի: Նման երաշխիք, ցավոք, դեռ չեն կարող տալ: Իմ զեկուցում ես որոշակի գործնական լուծումներ առաջարկեցի:

–   Դուք նշեցիք, որ այդ բարդությունները հաճախ ի հայտ են գալիս երկու տարի անց վիրահատությունից հետո: Մի՞շտ է այդպես լինում: 

–   Ոչ միշտ: Պտոզը կարող է ի հայտ գալ ավելի վաղ կամ ավելի ուշ ժամանակահատվածում: Այստեղ շատ բան կախված է, թե ինչ վիճակում է գտնվում կնոջ մաշկը, ինչ մեթոդով է անցկացվել վիրահատությունը: Հարկ է ձգտել ապահով մեթոդներ կիրառելուն: Միայն այս դեպքում կարող ենք ունենալ աննշան կախվածություն: Եվ այն էսթետիկ առումով այլևս չի խանգարի պացիենտին:

–   Պտոզի առաջացման այլ պատճառներ կարո՞ղ եք ասել:

–   Պատճառ կարող է լինել նաև քաշի նվազումը, ինչպես նաև սխալ տրամաչափի իմպլանտների տեղադրումը և այլն:

–   Գենադի Իգորևիչ, մեզ մոտ Հայաստանում առաջին տեղում է ռինոպլաստիկան: Ձեզ մոտ և՞ս պատկերը նույնն է:

–   Կարծում եմ՝ դա ավելի շատ վիրաբույժից է կախված: Իմ պրակտիկայից ելնելով, կարող եմ ասել, որ առաջին տեղում մամոպլաստիկան է, հետո՝ ռինոպլաստիկան է, հետո՝  դեմքի  երիտասարդացման վիրահատությունները: Մեր աղջիկներին ավելի շատ անհանգստացնում է կուրծքը: Քիթը նրանց մոտ կովկասյան չէ, այն եվրոպական է. հազվադեպ է ունենում արտահայտված կորություն և երկար ծայր:

–   Որքան հաճախ եք հանդիպում դիսմորֆոֆոբիա ունեցող պացիենտների: Ի՞նչ քայլեր եք ձեռնարկում: Համագործակցու՞մ եք, արդյոք, հոգեբանների հետ: 

–   Փորձառու պլաստիկ վիրաբույժը առաջին հերթին պետք է նաև հոգեբան լինի: Իհարկե, երբեմն կանխատեսել նման պացիենտներին անհնար է: Դա կարող է թաքնված  լինի մարդու մոտ: Միշտ չէ, որ մեզ հաջողվում է պարզել այդ գոյությունը: Եթե տեսնում եմ, որ ծանր դեպք է, պարտադիր համագործակցում եմ հոգեբանների հետ, որոնք պարզում են, թե որքանով է տվյալ պացիենտը ադեքվատ: Ինչ վերաբերում է նման դեպքերին, եթե ես ինքս եմ պարզում, ապա, միանշանակ, մերժում եմ վիրահատություն իրականացնել: Շատ լավ գիտակցում եմ, որ նման պացիենտը երբեք գոհ չի կարող լինել վիրահատության ընթացքից, եթե անգամ ընդունենք, որ արդյունքն իդիալական է եղել:

–   Շա՞տ է նման պացիենտների թիվը:

–   5-7 տոկոս է կազմում:

–   Իսկ հոգեբանի մոտ այցելություններն օգնու՞մ է նրանց: 

–   Այդ այցելություններից հետո նրանցից ոչ մեկը ետ չի վերադարձել: Որոշները վերադառնում էին՝ ասելով, որ ըստ հոգեբանի՝ ամեն ինչ կարգին է և հարկ չկա վիրահատվելու:

–   Ի դեպ, մեզ մոտ էսթետիկ վիրահատությանը նվազ քանակով են դիմում տղամարդիկ: Ձեզ մոտ է՞լ պատկերը նույնն է:

–   Վերջին շրջանում զգալիորեն աճել է այն տղամարդկանց թիվը, ովքեր ցանկանում են անցկացնել էսթետիկ վիրահատություն: Մարդիկ ուզում են գեղեցիկ երևալ: Հնարավորություններն այսօր շատ են, շատ են պլաստիկ վիրաբուժության կենտրոնները, որոնք, ի դեպ, լավ գովազդվում են: Հենց այդ պատճառով էլ տղամարդ-այցելուների թիվը շատանում է Ուկրաիանայում՝ նախորդ տարիների համեմատությամբ: Եթե նախկինում կին-տղամարդ հարաբերակցությունը կազմում էր 95%-5%, ապա այսօր` 80%-20% է:

Կովկասի ժողովուրդը հպարտ են: Եթե քիթ՝ կարևոր չէ ինչպիսինն է այն… Կարծում եմ՝ ձեզ մոտ տղամարդկանց սակավ դիմելիության պատճառը՝ բնավորության առանձնահատկություններն են: Ձեզ մոտ մարդիկ հասկանում են, որ կյանքում ավելի կարևոր բաներ կան… Նրանք ավելի փիլիսոփայորեն են նայում կյանքին. քիչ են ուշադրություն դարձնում արտաքին տեսքին:

–   Իսկ ի՞նչ վիրահատության խնդրանքով են սովորաբար դիմում տղամարդիկ:

–   Հիմնականում քթի պլաստիկա, ականջախեցիների, կոպերի, գինեկոմաստիաների շտկում, լիպոսակցիա, բոդիլիֆտինգ՝ քաշի նվազումից հետո և այլն:

–   Իսկ տարիքային ո՞ր խումբը… 

–   Պաթոլոգիայից է կախված: Եթե ռինոպլաստիկա՝ երիտասարդ պացիենտներ, եթե երիտասարդացման հետ կապված հարցեր՝ 50-ն անց:

–   ՀՀայաստանում, որպես կանոն, պլաստիկ վիրաբույժները նշում են, որ սակավ են նաև ինտիմ պլաստիկայի դեպքերը:

–   Դա ևս ազգային պատկանելիության խնդիր է: Եվրոպական մշակույթում այս թեման ավելի բաց է, քան կովկասյան երկներում: Տղամարդիկ, եթե դիմում են, հիմնականում անդամի երկարացման հարցերով: Կանայք՝ փոքր շուրթերի պլաստիկայի համար: Այցելությունների քանակը մեզ մոտ կրկին աճում է:

–   Որպես մասնագետ խրախուսու՞մ եք անդամի երկարացումը:

–   Նման խնդրով դիմող տղամարդիկ հաճախ հոգեբանական խնդիրներ են ունենում: Եվ նման պացիենտներն ի սկզբանե պետք է ուղորդվեն հոգեբանի մոտ: Մեզ մոտ այն կոչվում է բաղնիքային բարդույթ (банный комплекс), երբ տղամարդը, հասկանալի պատճառներով, ամաչում է հաճախել բաղնիք բոլորի հետ: Խրախուսվում է միայն այն դեպքերը, եթե առկա է մինիպենիա: Այսօր գոյություն ունեն նաև հատուկ սարքեր, որի օգնությամբ հնարավոր է լինում մեծացնել անդամի չափերը:

–   Հայաստանում ինչ հասրեցիք տեսնել ու գնահատել որպես մասնագետ:

–   Տեղեկացա, որ ձեզ մոտ մեծ վիրահատությունները կատարվում են միայն մեծ կլինիկաներում: Փոքր կլինիկաներում ավելի շատ էսթետիկ շտկումներ են կատարում: Համաժողովին ներկայացրած աշխատանքներով կարողացա գնահատել տեղացի բժիշկների աշխատանքը: Ձեզ մոտ կան բավականին լավ արդյունքներ: Ձեր բժիշկների զեկուցները մրցունակ են եվրոպական բժիշկների զեկուցներին: Եվ հետո, դուք ունեք  փորձ և պլաստիկ վիրաբույժ մասնագիտությունը, ունեք օրդինատորներ՝ ապագա պլաստիկ վիրաբույժներ: Այդ առումով մենք Ուկրաինայում նախանձում ենք ձեզ (Ժպտում է.-հեղինակ): Հայաստանում որակով են մատուցվում պլաստիկ վիրաբուժության ծառայությունները:
 

Հարցեր, պատասխաններ, մեկնաբանություններ