Նյարդաբանության նորությունները. սատելիտային սիմպոզիում՝ նվիրված Վահագն Դարբինյանի հիշատակին

Հայաստանի 4-րդ միջազգային բժշկական համագումարի շրջանակում հուլիսի 3-ին և 4-ին կազմակերպվեց «Նյարդաբանության նորությունները» սատելիտային սիմպոզիում՝ նվիրված պրոֆեսոր  Վահագն Դարբինյանի հիշատակին:

Երկօրյա սիմպոզիումի ընթացքում հայ և արտասահմանցի նյարդաբանները ներկայացրեցին ոլորտի նորությունները, վիճակագրական տվյալներն, ինչպես նաև պրակտիկ խորհուրդներ տվեցին հայաստանյան բուժհաստատություններում: Այս մասին զրուցեցինք  սիմպոզիումի կազմակերպիչներից՝ Էրեբունի բժշկական կենտրոնի  նյարդաբանական բաժանմունքի վարիչ Նունե Եղիազարյանի հետ:

–   Բազմաթիվ առիթներ ենք ունեցել զրուցելու Վահագն Դարբինյանի մասին, այսօր ևս չկարողացաք խուսափել արցունքներից…

–   Այո, նկատեցիք….   Ինչու Վահագն Դարբինյանի հիշատակին, որովհետև ո՛չ միայն ես, նաև բոլոր կազմակերպիչները գտնում են, որ մենք այստեղ չէինք լինի, եթե այս մարդը չտեսներ մեզ նյարդաբանության մեջ: Սա ո՛չ միայն իր աշակերտների, այլ շատ նյարդաբանների կարծիք է:

–   Անցնենք սիմպոզիումի թեմային…

–   Քանի որ համահայկական բժշկական համագումարի շրջանակում նյարդաբանական դասախոսությունները շատ քիչ էին, իսկ Հայաստանում են ոլորտի լավագույն մասնագետները, որոշեցինք առիթը բաց չթողնել: Արդեն ընթացքում հասկանում ենք, թե մեզ մոտ ժամանած հանրահայտ մասնագետներն ինչքան բան ունեն մեզ տալու, սովորեցնելու:

–   Ի՞նչ թեմաներ էին ընտրվել և ի՞նչ կառուցվածքով ընթացավ 2-օրյա սիմպոզիումը:

–   Հիմնական թեմաներն էին ՝  գլխուղեղի կաթվածը,  նեյրոպաթիաները, միոպաթիաները, ցրված սկլերոզը: Դասախոսություններից հետո՝ օրվա երկրորդ կեսին, կազմակերպվեցին պրակտիկ դասեր, քննարկվում էին կլինիկական դեպքեր, տեղում զննում, հետազոտում, նաև՝ բարդ դեպքեր: Այսինքն՝ միայն տեսական մասով չենք սահմանափակվել:  Պրակտիկ աշխատանքներն իրականացվել են «Էրեբունի», «Արաբկիր» բժշկական կենտրոններում և Հերացի թիվ  1 համալսարանական կլինիկայում: Թեմաներն այստեղ նույնպես տարբեր էին, որպեսզի մասնակից բժիշկները կարողանան ընտրել ըստ իրենց նեղ մասնագիտական հետաքրքրության:

Սատելիտային  սիմպոզիումի կայացմանը մեծապես նպաստել է նաև Գեդեոն Ռիխտեր դեղագործական ընկերությունը: Ընկերության մենեջեր Լուսինե Բլուրցյանը մեզ հետ զրույցում խոսեց սիմպոզիումի և քննարկվող թեմաների շուրջ ընկերության առաջարկների մասին. «Շատ ուրախ եմ, որ մենք պատիվ ունեցանք մասնակցելու սիմպոզիումի՝ որը նվիրված է Վահագն Դարբինյանի վառ հիշատակին, ով ունեցել է առանձնահատուկ ներդրումներ նյարդաբանության բնագավառում, ով Մեծ բժիշկ ու Մեծ մարդ էր: Մենք երկար տարիներ աշխատել ենք Հայաստանում լավագույն նյարդաբաններից՝ Վահագն Ժիրայրովիչի հետ: Անկարելի կլիներ բաց թողնել այս հնարավորությունը և հայտնի մասնագետների այցը Հայաստան չօգտագործել մեր բժիշկների աշխատանքի ու սպասարկման որակի բարձրացման համար:

Գեդեոն Ռիխտերը նյարդաբանության մեջ կիրառվող մի շարք դեղեր է ներկայացնում շուկայում: Օրվա թեմաներին վերաբերող՝ կարող ենք թվարկել նաև դեղեր, որոնք կիրառվում են սրտաբանության ոլորտում, հաշվի առնելով, որ մի շարք հիվանդությունների պատճառներ կարող են համընկնել, որոնց ընթացքն անհատական է յուրաքանչյուր հիվանդի մոտ։

Մենք ներկայացնում ենք Կավինտոն դեղը, որը՝ վերացնելով գլխուղեղի անոթների սպազմը, կօգնի խուսափել կաթվածի հետագա զարգացումից։

Գլխուղեղի և սրտի կաթվածի դեպքում կարևոր դերակատարում ունեն նաև Մերտենիլ, Տեսիրոն դեղերը: Մերտենիլը, որը պարունակում է ռոզուվաստատին, լայն կիրառում ունի ճարպային նյութափոխանակության խանգարման ժամանակ (դիսլիպիդեմիա), ինչը հաճախ է ուղեկցում սրտաբանական, և նյարդաբանական խնդիրներին։

Տեսիրոնը պարունակում է կլոպիդոգրել: Այն հակաթրոմբոտիկ դեղերի շարքին է պատկանում, նվազեցնում է թրոմբոցիտների ագրեգացիան՝ դրանով իսկ նպաստելով կաթվածի հավանականության իջեցմանը։

Հարցեր, պատասխաններ, մեկնաբանություններ