4-ՐԴ ՀՄԲՀ. Նախարար Արմեն Մուրադյանը ներկայացրեց եռօրյա աշխատանքների հռչակագիրը (ներբեռնել հոդվածից)

Առողջապահության նախարար Արմեն Մուրադյանն իր ելույթով ամփոփեց Հայաստանի 4-րդ միջազգային բժշկական համագումարը՝ ներկայացնելով նաև եռօրյա աշխատանքների հռչակագիրը: Ելույթից հետո նախարարը բացառիկ հարցազրույց տվեց Մեդ-Պրակտիկին՝ մասնավորեցնելով հռչակագրի նշանակությունը:

–   Պարոն նախարար, որոշվեց, որ համագումարը կամփոփվի հռչակագրով: Ինչ նշանակություն ունի այն:

–   Մեծ համագումարների ավարտին, սովորաբար, ընդունվում են հռչակագրեր, որոնք հաստատում են, թե փաստացի ինչ ուղղություններ ընդգծվեցին, հաստատվեցին, պահպանվեցին այդ գիտաժողովի ընթացքում: Մենք ևս որոշեցինք հետևել այդ պրակտիկային: Երևանյան հռչակագիրը, համոզված եմ, որ իր ուրույն տեղն է գտնելու հետագա բժշկական և բժշկագիտական զարգացումներում:

–   Հռչակագրի ո՞ր կետերը կառանձնացնեք:

1-ին իսկ կետով՝ հիմնվելով ՄԱԿ-ի 1948 թվականի մարդու իրավունքների համընդհանուր հռչակագրի վրա, որպես ամենամարդասիրական մասնագիտության տեր անձինք՝ համագումարի մասնակիցներս հիշեցնում ենք, որ ցեղասպանությունները չեն կարող անդրադարձ չունենալ մարդու առողջության և ներդաշնակ զարգացման վրա և միաձայն հռչակում ենք՝ «Ո՛չ ցեղասպանությանը»:

 
–   Հռչակագրով սահմանեցիք նաև առաջնահերթությունները:

–   Հռչակագիրը սահմանում է առաջնահերթություն տալ ոչ վարակիչ հիվանդությունների կանխարգելմանը, որոնք ներկայում պատասխանատու են Հայաստանում արձանագրվող բոլոր մահվան դեպքերի 80%-ի համար: Պետք է կրճատել ռիսկերը՝ ծխախոտ, անառողջ սննդակարգ, ֆիզիկական թերակտիվություն և այլն:

–   Դուք նշեցիք նաև ոլորտի խնդիրների մասին:

–   Մենք, անշուշտ, չպետք է խոսենք միայն արդյունքների մասին, կան նաև խնդիրներ, չենք կարող անվերջ հիվանդանոցաշիությամբ ու հիվանդաբուժությամբ զբաղվել, ամբողջ աշխարհը գնում է դեպի կանխարգելում, վաղ ախտորոշում: Հայաստանում ևս հստակ քայլեր են արվում վաղ ախտորոշման և կանարգելման ուղղությամբ: Մեր կարևորագույն ձեռքբերումներից մեկն այսօր անհատական կանխարգելումն է: Դա, իհարկե', թանկ ծառայություն է, բայց՝ արդեն Հայաստանում իրականացվող:

Ներբեռնել հռչակագիրը.

Հարցեր, պատասխաններ, մեկնաբանություններ