Հայաստանի 4-րդ միջազգային համագումարի շրջանակում. քննարկումներ վերարտադրողական բժշկության թեմայի շուրջ . Գեորգի Օկոև

Հայաստանի 4-րդ միջազգային համագումարի շրջանակում կայացավ պլենար դասախոսություն և առանձին սեկցիայով ներկայացվեցին վերարտադրողական բժշկությանը վերաբերող  հիմնախնդիրներն ու առաջնթացները: Այդ առիթով դիմեցինք Մոր և մանկան առողջության պահպանման ԳՀԿ տնօրեն, պրոֆեսոր Գեորգի Օկոևին, ով նաև համանախագահ էր:

–   Ի՞նչ եք կարծում, նման հանդիպումներից ի՞նչ կքաղեն տեղի մասնագետները:

–   Ցանկացած համագումար շատ մեծ նշանակություն ունի բժշկի` իր աշխատանքի կազմակերպման համար: Բժշկությունն արագ զարգացող գիտություն է, և չկա մի մարդ, ով կասի` ամեն ինչ գիտեմ: Շփումն ու նոր բան իմանալն է բժշկությանն առաջ տանում: Այդ առումով, կարծում եմ, որ այսպիսի հանդիպումները շատ մեծ նշանակություն ունեն մեր բժիշկների համար: Այստեղ են արտասահմանից ժամանած բժշկության ոլորտում բավականին լուրջ ներդրումներ ունեցող մեր գործընկերները, որոնց հետ փորձի փոխանակումը չի կարող արդյունավետ չլինել:

–   Ձեր համանախագահությամբ, ովքե՞ր էին սեկցիայի հյուրերը:

–   Բավականին շատ հյուրեր ունեինք՝ բժշկության ասպարեզում մեծ համբավ ունեցող մասնագետներ: Սակայն պետք է ասեմ, որ իրենց կողմից ներկայացված տեսակետները միշտ չէ, որ ընդունվում էին: Կային մեկնաբանություններ, որոնց հետ համաձայն էինք, կային` որոնք վիճելի էին: Հետաքրքիր ելույթներ ունեցան ոլորտի մասնագետներ՝ Ռուսաստանից, Անգլիայից, Իտալիայից:

–   Ի՞նչ շեշտադրում ունեին թեմաները:

–   Շեշտադրված էր կնոջ առողջությունը` ուր ենք գնում, որտեղ ենք հասել, ինչ ունենք անելու: Մենք չպետք է մոռանանք, որ ազգի վերարտադրողությունը ընկնում է կնոջ ուսերին: Կինը պետք է լինի առողջ, որպեսզի սերունդն էլ առողջ լինի: Չեմ նվազեցնում տղամարդկանց դերը, սակայն, բոլոր դեպքերում, վերարտադրողական բժշկության մեջ կինը շատ ավելի բարձր դիրք ունի, քան՝ տղամարդը: Կնոջ օրգանիզմը շատ ավելի նուրբ է և շատ ավելի մեծ ուշադրության պետք է արժանանա: 

–   Ոլորտի ձեռքբերումները…

–   Նոր ախտորոշման մեթոդներ, բոլոր միջամտությունների հնարավորությունները, որոնք այսօր կան:

Հարցեր, պատասխաններ, մեկնաբանություններ