4-ՐԴ ՀՄԲՀ. Սեկցիա. Հանրային առողջություն. Ալեքսանդր Բազարչյան, Շերոն Չիլինգարյան, Վարդուհի Պետրոսյան

Ալեքսանդր Բազարչյան

–   Այն սեկցիան, որի համանախագահն էի` նվիրված էր հանրային առողջությանը: Ներկայացվեցին հինգ զեկույց: Հիմնական զեկույցները սփյուռքից ժամանած մեր հայրենակիցների կողմից էին: Նրանք քննարկեցին բժշկական հաստատություններին, բժշկական սխալներին և դոզավորման հիմնախնդիրներին, ինչպես նաև կանխարգելմանը վերաբերող խնդիրներ: Ներկայացվեցին նաև միջազգային կազմակերպությունների կողմից Հայաստանում իրականացվող որոշ ծրագրեր, քննարկեցին հարցեր կապված միգրացիայի հետ:

–   Ո՞րն էր նորույթը: 

–   Նախ, այն, որ բժիշկները շփվեցին ու քննարկեցին զանազան հետաքրքիր թեմաներ, ինչպես նաև ծանոթացան հիմնախնդիրներին: Օրինակ՝ շատ հետաքրքիր թեմա կար` նվիրված թմրամոլության մեջ գերդոզավորմանը:

–   Ի՞նչ տարբերություններ նկատեցինք մեր և արտերկրի բժշկության մեջ:

–   Հիմնականում համակարգային տարբերություններ կային: Հետաքրքիր էր լսել ու համեմատել այդ տարբերությունները, գնահատական տալ:

Շերոն Չիլինգարյան

–   Ի՞նչ հնարավորություն է տալիս համաժողովին մասնակցությունը:

–   Մասնակցելով նման համաժողովների, հնարավորություն ես ստանում կիսվելու, նորություններ ձեռքբերելու: Օրինակ՝ այն հետազոտությունը, որ ես ներկայացրեցի Հայաստանում, գուցե այնքան էլ հետաքրքիր չլիներ ԱՄՆ-ում: Ինչո՞ւ ենք մենք անում հետազոտություններ, որովհետև մենք ուզում ենք մեր գիտելիքները հարստացնել և նորանոր տեղեկություններ ստանալ:

–   Ինչի՞ մասին է Ձեր հետազոտությունը:

–   Իմ հետազոտությունը նվիրված է ճանապարհային ապահովությանը, վնասվածքների կանխարգելմանը:

Վարդուհի Պետրոսյան

–   Ձեր տպավորությունները, տիկին Պետրոսյան:

–   Ես ներկայացնում եմ Հայաստանի Ամերիկյան համալսարանը, Հանրային առողջապահության ֆակուլտետի դեկանն եմ: Այսօր փորձել եմ համակարգել հանդիպումը: Նոր բան ինքս չեմ ներկայացրել, սակայն վաղը կկայանա սատելիտային սիմպոզիում՝ նվիրված հանրային առողջապահության խնդիրներին, որոնք առնչվում են վարակիչ և ոչ վարակիչ հիվանդություններին, շրջակա միջավայրի աղտոտվածությանը:

–   Ի՞նչ բացահայտեցիք Ձեզ համար:

–   Այսօր շատ կարևոր հանրային առողջության հետ կապված խնդիրներ վերհանվեցին: Ես կշեշտադրեմ հատկապես վնասվածքների, երեխաների սակավարյունության, թերսնուցման հետ կապված խնդիրներըը, որոնք շատ կարևոր են Հայաստանում: Անդրադարձ կատարվեց նաև մտավոր առողջությանը: Դիտարկվեց թեմա՝ ցեղասպանությունը որպես մեծ հոգեկան տրավմա:

–   Ոլորտում ի՞նչ հաջողություններ ունենք:

–   Առաջընթաց կարող եմ համարել այն փաստը, որ ունենք բազմաթիվ հանրային առողջապահության մագիստրատուրայի շրջանավարտներ մեր համալսարանից, ովքեր աշխատում են տարբեր կազմակերպություններում, առողջապահության նախարարությունում, Ազգային ժողովում, միջազգային կազմակերպություններում ՝ որպես առողջապահության փորձագետներ: Նրանք մտածելակերպի փոփոխություն, նորություններ են բերում ոլորտ:      

Հարցեր, պատասխաններ, մեկնաբանություններ