Հայաստանի 4-րդ Միջազգային բժշկական համագումարը. Ջերի Մանուկյան.

Մեր հաջորդիվ զրուցակիցն է Հայ բժիշկների միջազգային կոմիտեի ներկայացուցիչ, բժիշկ Ջերի Մանուկյանը

–   Պարոն Մանուկյան, ներկայացրեք, խնդրե՛մ, Ձեր կոմիտեն.

–   Հայ բժիշկների միջազգային կոմիտեն ստեղծվել է սփյուռքահայ համայնքի բժիշկ-ներկայացուցիչների ջանքերով: Կոմիտեի կազմում են սփյուռքի հայկական բժշկական կազմակերպությունները: Սփյուռքի բժշկական կազմակերպությունները շատ ակտիվ են համագործակցության ոլորտում, մի շարք ծրագրեր հայաստանյան բժիշկների համար կազմակերպվում են հենց սփյուռքում: Մեր կոմիտեի նպատակը տարբեր միջազգային հայկական բժշկական ասոցիացիաների աշխատանքը համակարգելն է, որպեսզի ծրագրերի կրկնություն չլինի, որպեսզի մի ասոցիացիայի աշխատանքը օժանդակի մյուս ասոցիացիայի աշխատանքին: 

4 տարին մեկ անգամ մենք աշխարհի տարբեր ծայրերում կազմակերպում ենք հայկական բժշկական կազմակերպությունների համագումար, որոնք լրացնում են Հայաստանում տեղի ունեցող  բժշկական համագումարներին: Հայկական սփյուռքի հաջորդ բժշկական համագումարը կլինի Արգենտինայում՝ Բուենոս Այրեսում:

–   Գործնականում ի՞նչ են տալիս այս հանդիպում-քննարկումները:

–   Նախևառաջ սա կրթական ծրագիր է, իրազեկման հնարավորություն է տալիս մեր բժիշկներին: Աշխարհի տարբեր ծայրերում գործող հայկական բժշկական ասոցիացիաների  ներկայացուցիչները հավաքվում են մեկ տեղում և մեկ նպատակի համար՝ օժանդակել հայաստանյան առողջապահական խնդիրների լուծմանը: Հայաստանը փոքր երկիր է, ես գտնում եմ, որ այստեղ առողջապահական խնդիրները լուծելի են. երբեք չես համեմատի Միացյալ Նահանգների առողջապահական խնդիրների հետ: Մեծ երկիրը մեծ խնդիրներ է ենթադրում:

–   Եվ, անձնապես, Ձեզ այսօր ո՞ր թեմաներն են հետաքրքրում:

Հանրային առողջապահությունը, հանրային առողջապահությունը և եթե երրորդ թեման էլ ասեմ, ապա, միանշանակ՝ հանրային առողջությունը (հեղ. ժպտում է):

Հարցեր, պատասխաններ, մեկնաբանություններ