«Հայ բժիշկները՝ հայ գրականության մշակներ». ցուցահանդես գիտաբժշկական գրադարանում

 Հունիսի 9-ին գիտաբժշկական գրադարանում բացվեց «Հայ բժիշկները՝ հայ գրականության մշակներ» խորագրով ցուցահանդես: Ներկայացվեցին շուրջ 110 գեղարվեստական, պատմական, գիտահանրամատչելի թեմաներով գրքեր, որոնց հեղինակները XIX-XXI դդ. հայ բժիշկներ են:

Դրանց թվում են՝ Զորի Բալայանը, Արտաշես Բուդուղյանը, Լևոն Տիգրանյանը, Ծերենցը, Միքայել Նալբանդյանը, Ռուբեն Սևակը, Վահան Արծրունին, Տիգրան Վարժապետյանը և ուրիշներ: Այդ մասին «Մեդ-Պրակտիկի» հետ զրույցում ասաց գրադարանի տնօրեն Աննա Շիրինյանը:

«Կարծում եմ, որ շատ հետաքրքիր միջոցառում տեղի ունեցավ: Կար հնարավորություն բացահայտելու և հանրությանը ներկայացնելու մի շարք անվանի բժիշկների անուններ, ովքեր հայտնի են նաև իրենց ստեղծագործական ունակություններով. արվեստագետ են, երաժիշտ են և այլն», - ասաց Ա. Շիրինյանը:

Իր իսկ խոսքերով`բժիշկ-ստեղծագործողների մասին բարձրաձայնելու գաղափարը հղացել էր հոգեբույժ Հարություն Մինասյանի մոտ:
«Ինչպես նկատեցիք, միջոցառմանը կային մարդիկ, ովքեր ևս ընդգրկված էին Հ. Մինասյանի ցուցակում: Հուսամ` նրանց համար հաճելի էր, երբ բարձրաձայնում էին իրենց անուններն ու ներկայացվում գործունեությունը: Այս անգամ `ոչ մասնագիտական»,- կարևորեց տնօրենը:

Ա. Շիրինյանը նաև ասաց, որ օրվա խորհրդին համահունչ, ներկաներին ևս մեկ անակնկալ էր սպասվում. «Խոսքը ցուցահանդեսի մասին է: Այն արդեն տևական ժամանակ է, ինչ գործում է գրադարանի ճեմասրահում: Ցուցահանդեսը համալրված է բժիշկ-գրողների գրքերով»:
Ի դեպ, գրքերից բացի, ցուցափեղկերը զարդարում են հին բժշկական գործիքներ, պարագաներ, գրենական պիտույքներ, բժիշկ-հեղինակների լուսանկարներ և այլն:

Հոգեբույժ, հավաքորդ Հարություն Մինասյանը «Մեդ-Պրակտիկի»  հետ զրուցում ասաց.

«Երբ այս կամ այն ստեղծագործող բժշկի մասին էի լսում, ինձ մոտ անպայման գրառում էի կատարում: Հետո սկսեցի ավելի ակտիվ աշխատել այս ուղղությամբ. համացանցում տեղեկատվություն պեղել և այլն»:

Զրուցակիցն անկեղծանում է. «Իհարկե՛, այս ցուցակը, որը ես ունեմ`դեռևս լիարժեք չէ, քանի որ մենք շատ երևելի արվեստագետներ, երաժիշտներ, երգիչներ ունենք, ովքեր կրթությամբ բժիշկ են: Նրանք ճակատագրի բերումով են դարձել բժիշկ, բայց հետագայում դրսևորել են իրենց բնատուր ունակությունները, ասենք, գրելու, երգելու կամ նվագելու մեջ»:

Հ. Մինասյանի փոխանցմամբ՝ առաջիկայում պատրաստվում է գիրք գրել ու ներկայացնել բժիշկ- տրուենտների կամ բժիշկ-ստեղծագործողների կենսագրականները:

«Սա հպարտանալու առիթ է: Բժիշկը, ով մարդասիրական գործ է կատարում, ունի նաև այլ նախասիրություններ, հանրությունը պետք է իմանա այդ մասին»,- եզրափակեց զրուցակիցը:

Հարցեր, պատասխաններ, մեկնաբանություններ