Գիտաբժշկական գրադարանի կանաչ անկյունում արդեն գործում է բացօթյա ընթերցասրահը

Այսուհետ Հանրապետական գիտաբժշկական գրադարանի (ՀԳԲԳ) բացօթյա ընթերցարանում անվճար wi-fi կապի շնորհիվ հասանելի կլինեն էլեկտրոնային շտեմարաննները: Այս կապակցությամբ գրադարան էին հյուրընկալվել քաղաքի խոշոր գրադարաների ներկայացուցիչները:

Տարիների աշխատանքից հետո լքված հողակտորը վերածվեց կանաչ այգու՝ հարուստ բուսականությամբ, որը հիմք ծառայեց գիտաբժշկական գրադարանի բացօթյա ընթերցասրահի ստեղծմանը:

«Ինչպես ընդունված է արտասահմանում ասել, սա կանաչ գրադարան է: Տարիներ շարունակ մեր նպատակն էր այս այգին ևս օգտագործել՝ ի շահ ընթերցողների: Այսօր,  նաև ՎիվաՍել ընկերության  աջակցությամբ, մեր նպատակն իրագործվել է: Ձեռք բերեցինք պլանշետներ և արդեն գործող wi-fi կապի շնորհիվ գրադարանի ամբողջ տարածքում՝ այդ թվում նաև այգում, հասանելի է դարձել էլեկտրոնային գրականությունը»,- մեզ հետ զրույցում ասաց գիտաբժշկական գրադարանի տնօրեն Աննա Շիրինյանը:

 
ՀԳԲԳ հավաքածուն կազմում է կես միլիոնից ավելի գրականություն, որն իր մեջ ներառում է բժշկագիտությանը վերաբերող հայերեն և օտար լեզուներով գրքեր, պարբերականներ, տեղեկատու նյութեր, էլեկտրոնային կրիչներ: Դրանից զատ գիտաբժշկական գրադարանի էլեկտրոնային գրադարանը հնարավորություն է ընձեռում օգտվել կենսաբժշկական էլեկտրոնային հարուստ շտեմարաններից, ինչպիսիք են՝ Cochran library, UpToDate, Springer,  Hinari  և այլն, և յուրաքանչյուր բժիշկ կարող է օգտվել այս աղբյուրներից: Գրադարանի նորամուծությունները միայն մեկ նպատակ ունեն՝  խթանել գրադարանային մշակույթը:

«Մեր կանաչ գրադարանը, միանշանակ, նպաստելու է ընթերցանությանը, գիտելիքի, տեղեկատվության ձեռքբերմանը, որն էլ ուղղակիորեն նպաստելու է մեր երկրում թե՛ բժշկագիտության, թե՛ բժկական կրթության զարգացմանը»:

Հարցեր, պատասխաններ, մեկնաբանություններ