Հայ մասնագետներին ներկայացվեց Aplio 500 Platinum ժամանակակից տեխնոլոգիան

Toshiba Medical Systems Europe ընկերությունը Հայաստանում ներկայացրեց Aplio 500 Platinum սերիան , որը նոր սերնդի ուլտրաձայնային սարք է: 
Հայ մասնագետների համար տեխնոլոգիայի առավելությունները ներկայացրեց «Toshiba Medical Systems Europe գերձայնային գործիքների արտադրության և վաճառքի հարցերով պատասխանատու Քրիստոֆ Սիմը:

Մեդ-Պրակտիկի հետ զրույցում նա ասաց, որ Aplio 500 Platinum-ը բազմաթիվ նոր հնարավորություններ ընձեռող տեխնոլոգիա է, որը թույլ է տալիս անգամ մազանոթներում տեսնել արյան հոսքը, շատ ավելի լայն պատկերացում կազմել, թե ինչ է կատարվում հյուսվածքում` անոթային ապահովման տեսանկյունից:

 «Այս միկրոանոթային փայլուն վիզուալիզացիան (SMI) թույլ է տալիս բազմաթիվ խնդիրներ լուծել, և ես շատ ուրախ եմ, որ այսօր նաև Հայաստանի մասնագետները հնարավորություն ունեն ծանոթանալու դրան: Սարքը դահլիճում է, և մենք կունենանք նաև գործնական ծանոթացման հատված»,- նշեց Քրիստոֆեր Սիմը: Մասնագետը ներկայացրեց ևս մեկ տեխնոլոգիա՝ էլաստոմետրիան, որը թույլ է տալիս անմիջապես գերձայնային հետազոտության ժամանակ չափել հյուսվածքի էլաստիկությունը: Սարքի շնորհիվ հնարավոր է մեծ քանակությամբ նոր տեղեկատվություն ստանալ, օրինակ, լյարդի ցիռոզի, վահանաձև գեղձի, կրծքագեղձի քաղցկեղի հետազոտությունների ժամանակ: Aplio 500 Platinum –ը աշխարհում միակ ուլտրաձայնային սարքն է, որն ունի երկու տեսակի էլաստոգրաֆիա` shear-wave և  strain:

Կլինիկական կիրառման միջազգային մասնագետ Վեսամ Իբրահիմը (Նիդերլանդներ) , ով հայ բժիշկներին ներկայացրեց էլաստոգրաֆիան՝ որպես օգտակար և հուսալի գործիք, մեզ հետ զրույցում հույս հայտնեց, որ Հայաստանում այն շուտով լայն կիրառություն կգտնի: «Մեր նպատակն է այսօր ցույց տալ այս տեխնոլոգիայի լավագույն հնարավորությունները: Ես տեսնում եմ, որ Հայաստանն ակտիվ քայլեր է ձեռնարկում եվրոպական մեծ ընտանիք ինտեգրվելու հարցում, և կարծում եմ, որ բժշկությունն էլ պիտի գտնվի մասնագիտական նույն մակարդակի վրա, ինչ զարգացած երկրներում:  
Սա մի տեխնոլոգիա է, որն օրեցօր ավելի ու ավելի է տարածվում Եվրոպայում, մասնավորապես, այն լայնորեն կիրառվում է ամբողջ Արևմտյան Եվրոպայում»,- ասաց նա:

Հղիների և պտղի սոնոգրաֆիայի բաժնի ղեկավար Միգել Բրանկոն (Պորտուգալիա) ներկայացրեց նորամուծությունների կիրառումը մանկաբարձության ոլորտում: Նրա խոսքով՝ նոր տեխնոլոգիայի ամենաուժեղ կողմը պատկերի հստակությունն է, ինչը մեծ մրցակցային առավելություն է նրան նմանատիպ այլ սարքավորումների համեմատությամբ:

Հարցեր, պատասխաններ, մեկնաբանություններ