ՀՀԿ կանանց խորհրդի անդամներն այցելեցին Մոր և մանկան առողջության պահպանման գիտահետազոտական կենտրոն. morevmankan.am

Հայաստանի հանրապետական կուսակցության կանանց խորհրդի ներկայացուցիչները` խորհրդի նախագահ, ԱԺ նախագահի տեղակալ Հերմինե Նաղդալյանի գլխավորությամբ, ապրիլի 7-ին այցելեցին Մոր և մանկան առողջության պահպանման գիտահետազոտական կենտրոն:

Մայրության և գեղեցկության տոնի կապակցությամբ հյուրերը շնորհավորեցին Մոր և մանկան առողջության պահպանման գիտահետազոտական կենտրոնում օրերս մայրացած կանանց՝ հանձնելով նվերներ:

Ավանդական դարձած միջոցառման շրջանակներում ՀՀԿ կանանց խորհրդի անդամները, խմբերի բաժանված, յուրաքանչյուր տարի այս օրը՝ ապրիլի 7-ին, միաժամանակյա այց են կատարում հանրապետության բոլոր ծննդատները և շնորհավորում նորաթուխ մայրերին:

«Միջոցառումը երկար տարիների պատմություն ունի և շատ սիրված է մեր կողմից: Այս այցերի ընթացքում մենք հանդիպումներ ենք ունենում ո՛չ միայն մայրերի, այլև բժիշկների հետ, հնարավորություն  ունենում լսելու, իմանալու տարբեր խդիրների մասին և փորձում օգտակար լինել»,- մեզ հետ զրույցում ասաց տիկին Նաղդալյանը:

Նա նաև նշեց, որ մեծ հոգատարություն է նկատում Մոր և մանկան առողջության պահպանման գիտահետազոտական կենտրոնում. խնամքով են շրջապատված թե՛ նորածինները և թե՛ նրանց մայրերը:

«Հրաշք է մարդու ծնունդը. յուրաքանչյուր ծննդի հետ կյանքը ևս մեկ անգամ աշխարհ է գալիս: Թող բոլոր կանայք ապրեն այդ վայելքը»,- նորածիններին այցից տպավորված՝ բարեմաղթեց Հերմինե Նաղդալյանը:

Մոր և մանկան առողջության պահպանման գիտահետազոտական կենտրոնի ղեկավար պրոֆեսոր Գեորգի Օկոևի խոսքով՝ կենտրոնում փոքրիկներին լույս աշխարհ բերած կանայք յուրաքանչյուր տարի մեծ ուրախությամբ են ընդունում այս բարեմաղթանքներն ու շնորհավորանքները և իսկապես զգում, որ իրենց տոնն է: Նա ևս շնորհավորեց բոլոր մայրերին՝ մաղթելով, որ յուրաքանչյուր կին ապրի մայրանալու բերկրանքը:

Հարցեր, պատասխաններ, մեկնաբանություններ