Երևանում մարտի 27-ին մեկնարկեց «Առողջապահություն և դեղագործություն EXPO 2015» ավանդական ցուցահանդեսը

Երևանում մարտի 27-ին մեկնարկեց «Առողջապահություն և դեղագործություն EXPO 2015» 14-րդ միջազգային մասնագիտացված ցուցահանդեսը: Ցուցահանդեսի պաշտոնական բացմանը ներկա էին ՀՀ առողջապահության փոխնախարար Տիգրան Սահակյանը, Հայաստանում Բելառուսի արտակարգ և լիազոր դեսպան Ստեփան Սուխորենկոն:

Ինչպես նկատեց փոխնախարարը, ավանդական դարձած էքսպոն լավ հնարավորություն է` ծանոթանալու ոլորտում գործող կազմակերպությունների ձեռքբերումներին, մասնակիցների միջև գործնական կապերի հաստատման: Նա հույս հայտնեց, որ ցուցահանդեսը կծառայի իր նպատակին՝ բարձրացնելով ոլորտում տեղեկացվածությունը, ինչպես նաև նպաստելով բիզնեսի զարգացմանը:

Հայաստանում Բելառուսի արտակարգ և լիազոր դեսպան Ստեփան Սուխորենկոն նշեց, որ հայ-բելառուսական հարաբերությունները հատկապես առողջապահության ոլորտում լուրջ հաջողություններ են գրանցում, և համոզմունք հայտնեց, որ նմանատիպ միջոցառումները հենց այն ճանապարհն են, որով ամրապնդվում են գործնական հարաբերությունները:

Ցուցահանդեսի մասնակիցները շուրջ 80-ն են, որոնց մի մասը ներկայացնում է օտարերկրյա ընկերություններ՝ Ռուսաստանից, Բելառուսից, Իրանից, Հունգարիայից, Գերմանիայից, Չինաստանից, Իսրայելից, Ղազախստանից:

Ցուցահանդեսի շրջանակներում անց են կացվել սեմինարներ, կլոր սեղաններ, շնորհանդեսներ, ինչպես նաեւ տեղի ունեցավ «ХХI  դարի ատամնաբուժություն» ատամնաբուժական ֆորումը:

«Առողջապահություն և դեղագործություն EXPO 2015»-ի մասնակիցների թվում էր նաև Մեդ-Պրակտիկի թիմը:

Հարցեր, պատասխաններ, մեկնաբանություններ