Երևանի Մխ. Հերացու անվ. պետական բժշկական համալսարանում բացվեց էլեկտրոնային գրադարանի նոր սրահը

Փետրվարի 17-ին (ս.թ.) Երևանի Մխիթար Հերացու անվան պետական բժշկական համալսարանում (ԵՊԲՀ) այսօր էլեկտրոնային գրադարանի սրահիհանդիսավոր բացումն էր: 80-ից ավելի համակարգչով հագեցած նոր սրահը մեծ հնարավորություններ է խոստանում բուհի ուսանողներին: Այսուհետ ԵՊԲՀ ուսանողները հնարավորություն կունենան օգտվելու անվճար ու հասանելի էլեկտրոնային գրականությունից, տարբեր ծրագրերի միջոցով ավելի գործնական դարձնելու առարկայի տեսությունը: Ներդրված տեխնիկան թույլ կտա նաև ամբողջովին մեքենայացված համակարգ տեղափոխել նաև քննական գործընթացը:

Ընդունելության քննությունները մի օր կանցկացվեն բացառապես էլեկտրոնային համակարգով. ԿԳՆ Արմեն Աշոտյան

ԵՊԲՀ էլեկտրոնային գրադարանի սրահի բացմանը ներկա էր ՀՀ կրթության և գիտության նախարար Արմեն Աշոտյանը: Նաև առաջիններից մեկը դարձավ, ով փորձարկեց էլեկտրոնային թեստերից մեկը: Լրագրողների հետ զրույցում նախարարն առանձնացրեց սրահի կարևորագույն գործառույթները. «էլեկտրոնային լսարանը սովորողների համար հնարավորություն է՝ ընդլայնելու էլեկտրոնային կրթական պաշարների մուտքը: Լավ գիտենք, որ ամբողջ աշխարհը ձգտում է քննական գործընթացում մարդկային գործոնի հնարավոր նվազեցմանը: Այսօր ԵՊԲՀ-ն ներդնում է ամբողջ աշխարհում ընդունված մի համակարգ, որ թույլ է տալու քննությունների ընթացքը կառավարել բացառապես համակարգչային միջամտությամբ: Այս համակարգը թույլ կտա մեզ կանխել նաև մարդկային գործոնի առկայությունից բխող կոռուպցիան»:

Արմեն Աշոտյանը նաև հույս հայտնեց, որ «մի գեղեցիկ օր» ընդունելության քննությունները ևս երեխաները կհանձնեն բացառապես առանց մարդկային միջամտության, համակարգիչների առջև՝ առ-ցանց համակարգով: «Մի գաղտնիք բացեմ: Արդեն հետազոտություն ենք իրականացրել համաշխարհային բանկի փորձագետների հետ համատեղ և եկել այն եզրակացության, որ ընդունելության քննությունները էլեկտրոնային համակարգով հանձնելու համակարգի ներդրումը Հայաստանում իրատեսական է: Ֆինանսական տեսանկյունից մենք ունենք խնդիրներ, քանի որ ըստ հետազոտության՝ մոտ 12 միլիոն ԱՄՆ դոլարին համարժեք գումար է պետք, որպեսզի այդ համակարգն ամբողջովին ներդրվի»:

ԵՊԲՀ ռեկտոր Միքայել Նարիմանյանը կարծում է, որ էլեկտրոնային գրադարանը կթեթևացնի դասախոսների աշխատանքը. «Ստեղծվելու են համակարգչային սցենարներ՝ ուսումնական և քննական գործընթացն ուսանողների համար ավելի հետաքրքիր դարձնելու համար: Ներկայումս էլեկտրոնային գրադարանը ներառում է միջազգային գրականության հայալեզու բազայի տեղեկատվական 1 մլն միավոր»:

Ի դեպ, այսպիսի ևս մեկ սրահ արդեն մեկ տարի է, ինչ գործում է ԵՊԲՀ-ում: Ինչպես իր խոսքում նշեց ԿԳՆ Արմեն Աշոտյանը, մեկ անգամ չէ, ինչ արձանագրում ենք, որ ԵՊԲՀ-ն կրթական նորագույն տեխնոլոգիաների ներմուծողներից է:

Հարցեր, պատասխաններ, մեկնաբանություններ