«Սեռական առողջության այբուբենը» հանրամատչելի դասախոսությունը ԵՊԲՀ-ում

Դեկտեմբերի 19-ին՝ Երևանի բժշկական համալսարանի 6-րդ լսարանում, կայացել է «Սեռական առողջության այբուբենը» հանրամատչելի դասախոսությունը՝ ԵՊԲՀ սեքսոպաթոլոգիայի կլինիկայի բժիշկ-սեքսոպաթոլոգ, սեքսոլոգիայի ամբիոնի դասախոս, բժշկական գիտությունների թեկնածու Վրեժ Շահրամանյանի մատուցմամբ: Ներկա են գտնվել ուսանողներ, լրագրողներ, հյուրեր:

Շահրամանյանի դասախոսությունը հետաքրքիր ընթացք է ունեցել, այն ուղեկցվել է սլայդների ցուցադրմամբ, ուշագրավ օրինակներով, սեռական դաստիարակության տարածված և արմատացած սխալներին: 

«Մարդու օրգանիզմն ամոթալի օրգաններ և ֆունկցիաներ չունի: Առաջին հերթին՝ դա վերաբերում է կյանքի վերարտադրմանն առնչվող օրգաններին: Ամոթ կարող են հարուցել միայն սեռական փոխհարաբերությունների անգիտությունն ու նախապաշարմունքները, այսօրինակ հարցերին կեղծ բարեպաշտ մոտեցումները»,- նշել է բժիշկն ու հավելել, որ սեռական դաստիարակությունը մարդու ընդհանուր դաստիարակության մի մասն է կազմում, բայց թեմայի անհասանելի լինելու պատճառով տարբերվում է մեծ անորոշությամբ:

«Եթե դաստիարակության այլ ուղղությունները որոշակիորեն արտահայտված են ու կարող են սեփական փորձով ձեռք բերվել, ինչպես նաև շտկվել խորհուրդներով, ապա սեռական դաստիարակությանը վերաբերող շատ հարցեր փակ են:

Սեքսոպաթոլոգի փոխանցմամբ՝ թեպետ տեղեկատվության դարաշրջանում ենք  ապրում և, կարծես թե, այդ առումով սակավություն չկա, այնուամենայնիվ, համաքաղաքացիներից շատերը սեռական կյանքին վերաբերող սխալ պատկերացումներ ունեն: «Երբեմն անպտղության դեպքում, սեռավարակներից պաշտպանվելու համար կիրառվում են մեթոդներ, որոնք կարող են վտանգել սեփական առողջությունը»,- ասել է մասնագետը:

Վ. Շահրամանյանը խոսել է նաև բժշկին չդիմելու, այլ աղբյուրներից օգտվելու, ծանոթների ու հարազատների խորհուրդներին դիմելու մասին, ինչն անթույլատրելի է: Սխալ բուժման հետևանքով մի շարք այլ խնդիրներ կարող են առաջանալ՝ երբեմն անդառնալի հետևանքներով… Սեքսոպաթոլոգը բացատրել է, որ սեռավարակներից շատերն անախտանիշ են ընթանում, ուստի կասկածելի հարաբերությունից հետո հարկ է դիմել սեքսոպաթոլոգի օգնությանն ու անցնել համապատասխան հետազոտություններ: Դասախոսության ընթացքում չի շրջանցվել նաև հիգիենայի կանոնների, ինչպես նաև սեռական ֆունկցիան խթանող հատուկ սննդակարգի մասին տեղեկությունները:

Վ. Շահրամանյանը խորհուրդ է տալիս հրաժարվել անկանոն սնվելու սովորությունից, բացառել օրվա ռացիոնից յուղոտ սննդամթերքը, գազավորված ըմպելիքները, ինչը շատերի համար կենսակերպ է… Փոխարենը պետք է օգտագործել ծովամթերք, կաթնամթերք, բանջարեղեն, միրգ,  մեղր և այլն: Ալկոհոլային խմիչքներից խորհուրդ է տալիս կարմիր գինին:

Դասախոսության վերջում տեղի է ունեցել քննարկում: Ներկաները ակտիվորեն հնչեցրել են իրենց հուզող հարցերն ու բժիշկ Շահրամանյանից ստացել մատչելի պատասխաններ: Մեզ հետ զրույցում մասնակիցներից շատերը նշել են, որ այս կարգի դասախոսությունները կարևոր են, հետաքրքիր և ակտուալ:

Հարցեր, պատասխաններ, մեկնաբանություններ