ԼՂՀ ԱՆ. Լրացել է Արցախում «Ձեռք-ձեռքի» հասարակական կազմակերպության գործունեության 10-ամյակը

ԼՂՀ առողջապահության նախարար Հարություն Քուշկյանը ընդունել է «Ձեռք-ձեռքի» հասարակական կազմակերպության նախագահ Բերջ Քիլաջյանին, Առնոլդ Վայսին և Դալալ Քիլաջյանին:

Արդեն տասը տարի է «Ձեռք-ձեռքի» հասարակական կազմակերպությունն Արցախում իրականացնում է առողջապահական ծրագրեր, մասնավորապես բարեգործական հիմունքներով, անվճար ստոմատոլոգիական ծառայություններ է մատուցում ինչպես Ստեփանակերտում, այնպես էլ շրջաններում:

Ողջունելով հյուրերին նախարարն իր գոհունակությունն է արտահայտել կազմակերպության գործունեության վերաբերյալ և նշել, որ համագործակցությունն այսուհետ ավելի համակարգային և առավել արդյունավետ կլինի:

Նույն օրը կազմակերպվել է հոբելյանական միջոցառում նվիրված կազմակերպության գործունեության 10-ամյակին: Միջոցառմանը ներկա էին նաև ԼՂՀ առողջապահության նախարար Հարություն Քուշկյանը և պաշտոնատար այլ անձինք:

Շնորհավորելով հոբելյանի առթիվ, նախարար Քուշկյանը բարձր է գնահատել կազմակերպության տասնամյա գործունեությունը, նշել, որ այն միտված է Արցախում ատամնաբուժության կայացմանն ու կատարելագործմանը։ Նա պատրաստակամություն է հայտնել հետագայում ևս աջակցել «Ձեռք-ձեռքի» ՀԿ -ի ծրագրերին։

«Ձեռք-ձեռքի» հասարակական կազմակերպության նախագահ Բերջ Քիլաջյանը ներկայացրել է հանրային կառույցի անցած ուղին և գործունեությունը: «Ձեռք-ձեռքի»-ի ջանքերով անցած տասնամյակում Շուշիի, Հադրութի, Մարտունու շրջկենտրոններում ստեղծվել են ատամնաբուժարաններ, Ստեփանակերտում՝ կանանց առողջության կլինիկա, ինչպես նաև ժամանակակից սարքերով հագեցած շարժական ատամնաբուժարաններ:

Բացի այդ, հանրապետության տարբեր շրջաններում ու համայնքներում, հանրակրթական հաստատություններում համապատասխան գերատեսչությունների համագործակցությամբ իրականացվել են ատամնաբուժական ծրագրեր՝ հետազոտություններ և բուժումներ, մեծահասակների, երեխաների, հատկապես դպրոցականների շրջանում։

Միջոցառման ժամանակ ցուցադրվել է նաև «Ձեռք-ձեռքի» հասարակական կազմակերպության գործունեության մասին պատմող տեսաֆիլմ, որին հաջորդել են արտերկրից, մասնավորապես ԱՄՆ-ից ժամանած մասնագետների դասախոսությունները:

Հարցեր, պատասխաններ, մեկնաբանություններ