ՀՀ .ԱՆ. Հուշամեդալ ավստրիացի պրոֆեսոր Վոլֆգանգ Աուլիցկուն

Հայաստանի Հանրապետության առողջապահական համակարգին ցուցաբերած շարունակական աջակցության և Հայաստանի բժիշկների մասնագիտական զարգացման գործում ունեցած նշանակալի ավանդի համար ավստրիացի պրոֆեսոր, Զալցբուրգի բժշկական ծրագրերի համակարգող-ղեկավար Վոլֆգանգ Աուլիցկին այսօր պարգևատրվեց ՀՀ առողջապահության նախարարության հուշամեդալով:

Անվանի պրոֆեսորը մեր երկիր է ժամանել սեպտեմբերի 26-27-ին Երևանում անցկացված Հայկական ուրոլոգիական ասոցիացիայի 16-րդ տարեկան գիտաժողովին մասնակցելու համար: Գիտաժողովի շրջանակում նրա ղեկավարությամբ անցկացվեցին  Եվրոպական ուրոլոգիական ասոցիացիայի ուրոլոգիայի դպրոցի նախաձեռնած գործառական ուրոլոգիայի դասընթացներ: Պրոֆեսորը հանդես եկավ մասնագիտական արդի խնդիրներին նվիրված մի քանի թեմատիկ զեկույցներով:

ՀՀ առողջապահության նախարար Արմեն Մուրադյանի, նախարարության ներկայացուցիչների և գործընկերների հետ քննարկվեցին հետագա համագործակցության հնարավորությունները:

Նախարարը շնորհակալություն հայտնեց Զալցբուրգի բժշկական ծրագրերի համակարգող-ղեկավարին հայ մասնագետների արտերկրում վերապատրաստման գործում ունեցած մեծ ավանդի համար: Արմեն Մուրադյանը բարձր գնահատեց  նրա երկարամյա աշխատանքը, ինչպես նաև  հայ մասնագետներին ավստրիական լավագույն կլինիկաներում վերապատրաստելու  նոր ծրագրեր իրականացնելու պատրաստակամությունը:  

Վոլֆգանգ Աուլիցկին նշեց, որ 1993 թվականից ի վեր Ավստրիայում վերապատրաստում է անցել ավելի քան  800 հայ մասնագետ: Նա  անդրադարձ կատարեց  զալցբուրգյան սեմինարների արդյունավետությանը և հեռանկարային  ծրագրերին:

Պրոֆեսորն ընդգծեց, որ Զալցբուրգի միջազգային սեմինարների իրականացման գործում մեծ ներդրում ունի  Հայ օգնության ֆոնդը, որի բժշկական ծրագրով վերապատրաստված բժիշկներն իրենց հերթին ուսուցանում են Հայաստանի  մարզերի բժիշկներին` ձևավորելով արդյունավետ համագործակցության շղթա:

Հանդիպման ավարտին պրոֆեսորն իր երախտագիտությունը հայտնեց Հայաստանին և Երևանի պետական բժշկական համալսարանին, 2009 թվականին Ավստրիայի «Շլոսս Արենբերգ» պատմական դղյակի հրդեհից հետո դղյակի վերականգնման համար կազմակերպած մեծ հանգանակության համար եւ նշեց, որ ի նշան երախտիքի այդ դղյակի մեկ հարկն անվանվել է «Հայաստան»։

Հարցեր, պատասխաններ, մեկնաբանություններ