Կայացավ «Տարվա լավագույն բժիշկ և տարվա լավագույն բուժհիմնարկ» 2014 մրցանակաբաշխությունը

Հուլիսի 7-ին Ալ. Սպենդիարյանի անվան օպերայի և բալետի ազգային ակադեմիական թատրոնում կայացավ «Համազգայն վստահություն » խորհրդի կողմից կազմակերպված «Տարվա լավագույն բժիշկ, տարվա լավագույն բուժհիմնարկ» ամենամյա մրցանակաբաշխությունը:

Ներկայացված 32 անվանակարգերում համաժողովրդական քվեարկության և փորձագիտական գնահատման արդյունքներով հաղթեցին առողջապահության նվիրյալներ: 

3 տարի անընդմեջ ԵՊԲՀ նյարդաբանության ամբիոնի վարիչ, բ.գ.դ., պրոֆեսոր Հովհաննես Մանվելյանն արժանանում է մրցանակի: Այս տարի` «Բժշկական գիտելիքների նորագույն մեթոդների կիրառման, ուսուցման և կրթադաստիարակչական աշխատանքների համար» անվանակարգում: «Հասարակությունը քաջ գիտակցում է, որ բժիշկն ունի պարտք, որը պետք է կատարի, բայց շատ հազվադեպ է

գնահատվում բժշկի աշխատանքը: Ցավոք, այսօր ավելի հեշտ է ստանալ ժողովրդական արտիստի, նկարչի, արվեստի վաստակավոր գործչի կոչում, քան բժշկագիտության մեջ ինչ-որ մրցանակի արժանանալ: 3 տարի առաջ, երբ մեկնարկեց այս ամենամյա մրցանակաբաշխությունը, անգամ ես էի կասկածամտորեն վերաբերվում դրա կարևորությանը: Բարձր մակարդակ, ազնիվ մոտեցում, շատ գեղեցիկ տոնախմբություն… Ոչ թե պետական շքանշան է, այլ հասարակության կողմից քո աշխատանքի գնահատականը: Սրանից ավելի կարևոր բան բժշկի համար, վստահեցնում եմ՝ չկա: Շատ պատվաբեր է ստանալ տարվա բժիշկ մրցանակը: Արդեն 3-րդ անգամ եմ ստանում այս մրցանակը, չնայած նախորդ մրցանակաբաշխությանը բեմից ցանկություն հայտնեցի, որ հաջորդ տարի մեկ այլ բժիշկ կանգնի իմ տեղում, սակայն, ինչպես տեսնում եք` կրկին ես բարձրացա բեմ: Ինձ համար դա մեծ պատիվ է»- Մեդ-Պրակտիկի հետ զրույցում ասաց բժիշկը:

«Տարվա լավագույն բուժհիմնարկ» անվանակարգում ճանաչվել է «Հայ-Ամերիկյան առողջության կենտրոն» հիմնադրամը: «Արդեն 3-րդ տարին է կազմակերպվում այս մրցանակաբաշխությունը, իհարկե, առաջինն ամենահուզիչն էր, սակայն, կարծում եմ` անկախ մրցանակների քանակից և, առհասարակ, առկայությունից, պետք է կարևորություն տալ հասարակության գնահատականին: Ժողովրդի վստահությունն ամենից պարտավորեցնողն է, ինչը ստիպում է միշտ լավ աշխատել, ձգտել ավելիին, է՛լ ավելի օգտակար լինել մարդկանց: Միշտ էլ մրցանակի արժանանալը հուզիչ է, բայց և՝ շատ սպասված: Այսպիսի միջոցառումները հասարակությանը հնարավորություն են տալիս ծանոթանալ լավագույն բժիշկների և նրանց վաստակի հետ»,- մեզ հետ զրույցում ասաց կենտրոնի գործադիր տնօրեն Խաչանուշ Հակոբյանը:

«Բարձրագույն մասնագիտական կրթության տարվա կազմակերպիչ» անվանակարգին արժանացավ ԵՊԲՀ աշխատակազմի ղեկավար, բ.գ.թ., դոցենտ Գագիկ Միրիջանյանը, ով մրցանակի համար շնորհակալություն հայտնեց բեմից և նվիրեց այն իր նորածին աղջկան: «Բժշկութունը, լինելով ամենաբարդ աշխատանքներից մեկը, ցավոք, հաճախ ըստ արժանվույն չի գնահատվում: Այսպիսի միջոցառումները կարևոր են, որպեսզի բժիշկը նոր եռանդով շարունակի աշխատել: Պատվաբեր է ինձ համար մրցանակ ստանալ այս անվանակարգում, որն ավելի է մեծացնում պատասխանատվությունը: Մրցանակը միայն իմը չէ, այն ծավալուն ախատանքի ադյունք է ՝ հանձինս բժշկական համալսարանի աշխատակազմի և իմ ուսուցիչների»,- մեզ հետ զրույցում ասաց Գագիկ Միրիջանյանը:

«Պլաստիկ վիրաբուժության բնագավառում տարվա բացառիկ վիրահատություն» անվանակարգում ճանաչվել է Համալսարանական կլինիկական թիվ 1 հիվանդանոցի Պլաստիկ վիրաբուժության և միկրովիրաբուժության կլինիկայի ղեկավար, պլաստիկ վիրաբույժ, բ.գ.թ., դոցենտ Արտավազդ Սահակյանը: «Երբ միջոցառումը կազմակերպված է օբյեկտիվ, արդարացի, ապա այսպիսի միջոցառումները հասարակության մեջ իրենց դրական դերակատարումն են ունենում բժշկի աշխատանքի գնահատման գործում: Հաճելի է, երբ թոռներս ուրախանում են իմ մրցանակով, բայց ես միշտ աշխատել և շարունակում եմ աշխատել այնպես, ինչպես ամբողջ կյանքում: Ամեն դեպքում ուրախ եմ, որ այսօր այս դահլիճում եմ»,- ասաց վիրաբույժը:

«Տարվա օնկոգինեկոլոգ» անվանակարգին արժանացավ Վ.Ա. Ֆանարջյանի անվան ուռուցքաբանության ազգային կենտրոնի օնկոգինեկոլոգիայի բաժանմունքի վարիչ Գագիկ Ջիլավյանը: «Հավատացե՛ք՝ բժիշկն ամենաքիչը մտածում է մրցանակ ստանալու մասին: Առաջին հերթին մեր խնդիրը հիվանդի առողջությունն է: Բժշկի համար ամենամեծ պատիվն ու համբավն իր հիվանդներն են: Շատ շոյված և գնահատված եմ ինձ զգում, ուզում եմ շնորհակալություն հայտնել բոլորին՝ այս մրցանակի համար: Մենք պատրաստ ենք ծառայելու մեր ժողովրդին: Քանի որ մասնագիտությամբ գինեկոլոգ եմ, ուզում եմ հատկապես մեր կանանց ցանկանալ քաջ առողջություն: Իմ առաջին մրցանակն է, հուսով եմ` վերջինը չէ»,- ասաց Գագիկ Ջիլավյանը:

«Տարվա գթասիրտ եւ բարեգործական ծրագրեր իրականացնող կազմակերպություն» անվանակարգում ճանաչվել է Մարդու վերարտադրության հայկական ասոցիացիան: «Ինչպես Ահարոն Ադիբեկյանը նշեց, շատ կարևոր է մեր հասարակությունում ձևավորել աստղերի ինստիտուտը, որպեսզի մարդիկ սկսեն տարբերել լավը՝ վատից, թացը՝ չորից: Յուրաքանչյուր հարաբերությունում մարդը պետք է գնահատվի: Սա բավարարվածության զգացում է առաջացնում, երբ տարիներիդ աշխատանքը գնահատում է հասարակությունը: Շնորհակալություն եմ հայտնում՝ մեզ այս պատվին արժանացնելու համար»,- ասաց Մարդու վերարտադրության հայկական ասոցիացիայի նախագահ, բ.գ.դ. Էդուարդ Համբարձումյանը:

«Տարվա առաջատար ստոմատոլոգիական կլինիկա» կոչմանն աժանացավ Մեդեսի ստոմատոլոգիական կլինիկան: Կլինիկայի տնօրեն Մհեր Մկրտումյանը մեզ հետ զրույցում ասաց. «Այս մրցանակաբաշխությունը ոգևորում է բժիշկներին, խթանում՝ ավելի լավ աշխատելու, ավելի մեծ պատրաստակամությամբ օգնելու մարդկանց: Նմանատիպ միջոցառումների արդյունքում մարդիկ ավելի տեղեկացված են դառնում, թե ինչ բժշկական կենտրոններ են գործում, ինչ աշխատանքներ են տարվում այդ կենտրոններում և այլն: 3-րդ տարին անընդմեջ «Մեդեսի» ստոմատոլոգիական կենտրոնը հաղթում է այս անվանակարգում: Մրցանակը պարտավորեցնող է, ինչի համար փորձում ենք այնպես աշխատել, որ տարիների ընթացքում կարոողանանք պահպանել լավագույնի կոչումը»:

«Տարվա գինեկոլոգ-էնդոսկոպիստ» անվանակարգում համաժողովրդական քվեարկության եւ փորձագիտական գնահատման արդյունքներով լավագույնը ճանաչվեց Մոր և մանկան առողջության պահպանման գիտահետազոտական կենտրոնի մանկաբարձ-գինեկոլոգ Արման Կարապետյանը: «Գնահատված լինելն ինքնին պարտավորեցնող է: Ամենահաճելի պահերն են, խոսքեր չունեմ՝ արտահայտելու շնորհակալությունս: Այսպիսի միջոցառումները հասարակությանն օգնում են ճիշտ ընտրություն կատարել, ծանոթ լինել հայկական բժշկական ընտանիքին»,- ասաց բժիշկը:

Նմանատիպ միջոցառումների կարևորության մասին խոսեց «Համազգային վստահություն » խորհրդի նախագահ Աստղիկ Խաչատրյանը. «Այսպիսի միջոցառումներն անհրաժեշտություն են: Բժշկության մեջ ամեն ինչ պետք է կարևորել: Բժիշկներին է վստահված մեր կյանքը, ուստի մեր լավագույն բժիշկներն արժանի են խրախուսանքի»:

Ստորև ներկայացնում ենք մյուս անվանակարգերում մրցանակների արժանացած մասնագետներին` ըստ համաժողովրդական քվեարկության և փորձագիտական գնահատման արդյունքների:

«Տարվա կլինիկական օգնության կազմակերպիչ». «Նաիրի» բժշկական կենտրոնի քիթ-կոկորդ-ականջաբանության ծառայության ղեկավար, բ.գ.թ., դոցենտ Գնել Անանյան:

«Տարվա նորագույն սարքավորումներ ներմուծող». «Մեդիտեք» ընկերություն:

«Տարվա առաջատար ախտորոշման կենտրոն».«Պրոմ-Տեստ» լաբորատորիա:

«Տարվա անեսթեզիոլոգ-ռեանիմատոլոգ». «Նաիրի» բժշկական կենտրոնի անզգայացման և վերակենդանացման բաժանմունքի վարիչ, անեսթեզիոլոգ-ռեանիմատոլոգ Անատոլի Գնունի:

«Տարվա մանկական ակնաբուժական կլինիկա». «Մարի Նուբար» ակնաբուժական կլինիկա:

«Առաջանային բուժօգնության առաջատար». թիվ 16 պոլիկլինիկա:

«Միջազգային ստանդարտների համապատասխան հեղուկ դեղամիջոցների արտադրության առաջատար». «Լիկվոր» դեղագործական ձեռնարկություն:

«Տարվա զինվորական բժիշկ». Կենտրոնական զինվորական հոսպիտալի նյարդավիրաբուժական բաժանմունքի պետ, բուժծառայության մայոր Արման Հակոբյան:

«Տարվա ուռուցքաբան -օրթոպեդ». Վ.Ա. Ֆանարջյանի անվան ուռուցքաբանության ազգային կենտրոնի ոսկրային պաթոլոգիայի բաժանմունքի ուռուցքաբան -օրթոպեդ Ալեքսանդր Սեինյան:

«Անպտղության արտամարմնային բուժման արդի տեխնոլոգիաների և ծառայությունների կիրառման համար». «Վիտրոմեդ» վերարտադրողական առողջության կենտրոն:

«Որակյալ ծառայություններ մատուցող տարվա օպտիկական սրահներ». «Կարգին Օպտիկս» օպտիկայի սրահ:

«Տարվա էսթետիկ բժշկության առաջատար կենտրոն». «Մալլետտի» էսթետիկ բժշկության և գեղեցկության կենտրոն

«Տարվա դերմոկոսմետոլոգիական միջոցներ». «Տոպիկրեմ» խնամքի միջոցներ

«Տարվա մարզային հիվանդանոց». Ալավերդու բժշկական կենտրոն

«Տարվա մանկաբույժ- գենետիկ». Գենետիկայի և առողջության առաջնային պահպանման կենտրոնում՝ գենետիկ, թոքաբան, մանկաբույժ Արտյոմ Գասպարյան

«Տարվա ինտերվենցիոնալ սրտաբան» «Սրտաբան, ինտերվեցիոնիստ ռենտգեն - կատետերիզացիա» լաբորատորիայում սրտաբանական ստացիոնարի պատասխանատու, սրտաբան Միքայել Ադամյան

«Տարվա հեռանկարային բժիշկ». թիվ №1 համալսարանական պոլիկլինիկայի բժիշկ-խորհրդատու, «Մեդլայն» բժշկական կենտրոնի բժիշկ-խորհրդատու ԵրՊԲՀ Մաշկաբանության և սեռավարակների ամբիոնի ասիստենտ Սահակ Հակոբյան :

«Սահմանամերձ շրջանի տարվա լավագույն բժիշկ». Նոյեմբերյանի քաղաքային հիվանդանոցի նեոնատոլոգ Հասմիկ Մուղդուսյան:

«Վիրաբուժության բնագավառում նորագույն տեխնոլոգիաներ կիրառող». «Արամյանց» բժշկական կենտրոնի բժիշկ Վահագ Մաթևոսյան:

«Տարվա մարզային երիտասարդ մասնագետ». Աշտարակի բժշկական կենտրոնի ուրոլոգ Դանիել Հունանյան:

«Միջին մասնագիտական կրթությամբ առողջապահական ոլորտի տարվա որակյալ մասնագետներ պատրաստող». Երևանի պետական հենակետային բժշկական քոլեջ:

«Միջազգային նորագույն գիտական մեթոդների ներմուծող և տարածող երիտասարդ մասնագետ». «Արմենիա» հանրապետական բժշկական կենտրոնի ականջի միկրովիրաբուժության և լսողության վերականգնման կենտրոնի քիթ-կոկորդ-ականջաբան Վահե Ավետյան:

«Հատուկ մրցանակ». «Բնաբուժություն» կենտրոնի տնօրեն, Հայաստանի գլխավոր թոքաբան, բ.գ.դ., պրոֆեսոր Անդրանիկ Ոսկանյան:

«Հատուկ մրցանակ». «Նորք» հոգեբուժական կլինիկայի նախկին ղեկավար Անաիդա Գևորգյան:

Մեդ-Պրակտիկ թիմը շնորհավորում է 32 անվանկարգերում ճանաչված բժիշկներին և բժշկական հաստատություններին:

Հարցեր, պատասխաններ, մեկնաբանություններ