Պարգեւելով նոր կյանք. ՀՀ առաջին տիկինը մասնակցեց «Ապրիր հպարտ» ծրագրի օգտին կազմակերպված ընդունելությանը

Հայաստանում Ռուսաստանի Դաշնության դեսպանատանը երեկ կայացավ «Արմավենի» բարեգործական հիմնադրամի «Ապրիր հպարտ» ծրագրի օգտին կազմակերպված ընդունելություն։ Ընդունելությանը ներկա էր նաեւ հիմնադրամի պատվավոր նախագահ, ՀՀ առաջին տիկին Ռիտա Սարգսյանը։ 2000թ. ստեղծված հիմնադրամը կոչված է միջոցներ ներգրավելու Հայաստանի, ԼՂՀ-ի եւ Ջավախքի անապահով ընտանիքներում ապրող, հենաշարժական համակարգի հիվանդություններ ունեցող հաշմանդամ երեխաների բուժման նպատակով։ Հանդիսավոր ընդունելությունը կազմակերպվել էր 100-րդ հիվանդի հաջող վիրահատության առիթով։

Հիմնադրամի ղեկավար Արշակ Միրզոյանը լրագրողների հետ զրույցում նշեց, որ հիմնադրամի բժիշկները բուժման մեծ փորձ ունեն՝ Իլիզարովի մեթոդի կիրառմամբ՝ վերջույթների բնածին դեֆորմացման, կոնքի դուրս ընկնելու կամ կարճացման, ծուռթաթության, օստեոմիելիտի եւ այլ ոսկրաբանական հիվանդությունների բուժման առումով։ Մասնավոր բարեգործական եւ կոմերցիոն կազմակերպությունների հանգանակությունների շնորհիվ հիմնադրամի գործունեության տարիներին 100 երեխա է բուժվել։ Այսօր բուժման հերթի մեջ է գտնվում մի քանի տասնյակ հիվանդ, եւս ավելի քան 250 հիվանդ անապահով ընտանիքներից ունեն բարձրորակ բուժման կարիք։

«Այսօր հավաքվել ենք ցույց տալու մեր անցած ճանապարհը եւ ներկայացնելու խնդիրները, քանզի հերթում հիվանդներ կան, ովքեր դեռ բուժման կարիք ունեն։ Իլիզարովի մեթոդը Ռուսաստանում ծնված ու աշխարհում տարածված բուժման միջոց է, եւ խիստ խորհրդանշական է, որ միջոցառումն անց է կացվում Ռուսաստանի դեսպանատանը։ Հույս ունենք հովանավորներ ներգրավելու նաեւ Ռուսաստանի Դաշնությունից եւ հայ-ռուսական կապիտալի ներկայացուցիչներից»,–ասաց Ա. Միրզոյանը։

Նա հիշեցրեց, որ հիմնադրամի պատվավոր նախագահն արդեն 7 տարի է ՀՀ առաջին տիկինն է, ում անձնական ներդրման շնորհիվ ինը երեխա բուժվել են տարբեր հիվանդություններից. «Մեզ համար մեծ ուրախություն, պատիվ եւ պատասխանատվություն է այդ հանգամանքը։ Հիմնադրամի ստեղծման սկզբում շատ դանդաղ էինք առաջ շարժվում, թերահավատության փուլի մեջ էինք, սակայն այժմ մեծ հաջողություններ ենք արձանագրել»։

Հիմնադրամին աջակցություն ցուցաբերած բարերարներից Ամալյա Կարապետյանը լրագրողներին հիշեցրեց, որ ամենակարեւորը երեխաների առողջությունն է, քանզի նրանք մեր երկրի ապագան ու տերերն են։

«Հպարտ ենք վերականգնված առողջություն ունեցող երեխաների, նրանց ծնողների ու բժիշկների համար։ Ամենից շատ հպարտ եմ մի մարդու համար, ով կանգնած է այս բոլոր երեխաների բուժման ծրագրերի հետեւում. խոսքը ՀՀ առաջին տիկին Ռիտա Սարգսյանի մասին է։ Նրա ձեռնարկումների շնորհիվ է, որ առողջություն ստացած երեխաների ծնողները բոլորովին այլ կերպ են նայում աշխարհին։

Երջանկություն է երեխաներին նոր կյանք պարգեւելը»,–ասաց նա։

Միջոցառման ընթացքում ՀՀ առաջին տիկին Ռիտա Սարգսյանին հանձնվեց հուշանվեր։ Պարգեւներ ստացան նաեւ հիմնադրամի մյուս հովանավորները։ Հանդես եկան հայտնի երաժիշտներ Հայաստանից եւ Ռուսաստանից, ներկայացվեց հիմնադրամի գործունեության հաշվետվություն։ Ավարտին տեղի ունեցավ միջոցների հավաքագրում «Ապրիր հպարտ» ծրագրի օգտին։

Հարցեր, պատասխաններ, մեկնաբանություններ