ՀՀ ԱՆ. Ստորագրվեց Հայաստանի և Հնդկաստանի միջև փոխըմբռնման Հուշագիր. հեռաբժշկության զարգացման ասպարեզում Հնդկաստանը մեծ փորձ ունի

Հեռաբժշկության զարգացման ասպարեզում Հնդկաստանը մեծ փորձ ունի և այդ երկրի աջակցությունը խիստ օգտակար կլինի մարզային բժշկական կենտրոնների աշխատանքի բարելավման, ինչպես նաև հայ մասնագետների որակավորման բարձրացման ուղղությամբ:

Հունիսի 24-ին ՀՀ առողջապահության նախարարությունում ստորագրվեց «Հայաստանի Հանրապետության կառավարության և Հնդկաստանի Հանրապետության կառավարության միջև հեռաբժշկության ցանց ստեղծելու մասին» փոխըմբռնման Հուշագիր: Հուշագիրը ստորագրեցին նախարարի տեղակալ Սերգեյ Խաչատրյանը և  Հայաստանում Հնդկաստանի արտակարգ և լիազոր դեսպան Սուրեշ Բաբուն:

«Մոտ երկու տարի է, ինչ առողջապահության նախարարությունը Հնդկաստանի կառավարության հետ բանակցում էր այս խնդրի շուրջ: Մենք ընդունել ենք փորձագետներ Հնդկաստանից, ովքեր ժամանել են Երևան և գնահատել ծրագրի իրականացման հնարավորությունները»,- իր խոսքում լրագրողներին ասաց նախարարի տեղակալ Սերգեյ Խաչատրյանը` հավելելով, որ այս փաստաթղթով նախատեսվում է Հնդկաստանի աջակցությամբ ՀՀ Երևան քաղաքի մեկ և  մարզային 9 բժշկական կենտրոնների հիվանդանոցներին հատկացնել հեռաբժշկության ժամանակակից տեխնիկական սարքավորումներ: Դա թույլ կտա հեռաբժշկության կապով նշված հիվանդանոցների և Հնդկաստանի առաջատար բժշկական հաստատությունների միջև կազմակերպել մասնագիտական փոխադարձ խորհրդատվություն, փորձի և գիտելիքների փոխանակում: Արդյունքում նշված հաստատություններում կբարձրանա հիվանդությունների ախտորոշման և բուժման մակարդակը:

Հնդկական կողմի աջակցությամբ Հայաստանի բժիշկների, բուժքույրերի, հեռաբժշկության ասպարեզում տեխնիկական աշխատողների համար կկազմակերպվեն նաև շարունակական զարգացմանն ուղղված կրթական ծրագրեր:

Նախատեսվում է, որ ստորագրված Հուշագրի շրջանակներում  նշված աշխատանքներն իրականացնելու համար Հնդկաստանը կներդնի շուրջ 530.250 ԱՄՆ դոլար:

Հարցեր, պատասխաններ, մեկնաբանություններ