Վորլդ Վիժն Հայաստանը պարգեւատրեց լրագրողներին՝ մանկական եւ մայրական առողջության մասին նյութերի համար. med.news.am

Վորլդ Վիժն Հայաստան միջազգային բարեգործական կազմակերպության «Երեխաները կհաղթահարեն հինգ տարեկանի շեմը» միջոցառման շրջանակներում անցկացվեց լրագրողական նյութերի մրցույթ, որի հաղթողներ ճանաչվեցին Աննա Բալյանը՝ Արմենիա հեռուստաընկերությունից, Նարինե Մալումյանը՝ Հ1 հեռուստաընկերությունից, եւ Նելլի Բաբայանը՝ «Առավոտ» թերթից:

«Այսօրվա միջոցառումը աշխարհում տարբեր երկրներում իրագործվող միջոցառումներից մեկն է: Բոլոր այն երկրներում, որտեղ Վորլդ Վիժնը իր գործունեությունը ծավալում է, մոր եւ մանկան առողջությունը առաջնային խնդիրներից մեկն է, եւ այս շաբաթվա ընթացքում մենք տոնում ենք մանկական մահացության ոլորտում մեր համատեղ ձեռքբերումները», - ասաց NEWS.am Medicine-ի թղթակցին Վորլդ Վիժն Հայաստանի տնօրեն Ժիրայր Էդիլյանը:

Նա հավելեց, որ մոր եւ մանկան առողջության թեմայով լուսաբանումների մրցույթին ներկայացվել էին մի քանի տասնյակ նյութեր, որոնց միջից երեք հաղթողներին ընտրելը բավական բարդ էր: Բոլոր նյութերը լուսաբանում էին մանկական եւ մայրական առողջության ոլորտում առկա խնդիրները եւ դրանց լուծման ճանապարհները:

Միջոցառմանը ելույթ ունեցավ Առողջապահության նախարար Արմեն Մուրադյանը. սա նորանշանակ նախարարի առաջին պաշտոնական ելույթներից մեկն էր: Ելույթ ունեցան նաեւ ԱԺ Առողջապահության, մայրության եւ մանկության հարցերի մշտական հանձնաժողովի նախագահ Արա Բաբլոյանը, Վորլդ Վիժն Հայաստանի տնօրեն Ժիրայր Էդիլյանը, Մայր Աթոռ Սուրբ Էջմիածնի Հայեցակարգային գրասենյակի ղեկավար Բագրատ եպիսկոպոս Գալստյանը, ինչպես նաեւ երգչուհիներ Ինգա եւ Անուշ Արշակյանները:

Հարցեր, պատասխաններ, մեկնաբանություններ