«Նորարար լուծումները ստոմատոլոգիայում». հանդիպում Մոսկվայում բնակվող հայազգի նշանավոր բժիշկ Արամ Դավիդյանի հետ

Հանրապետության երիտասարդ ստոմատոլոգներն ու ոլորտի փորձառու ներկայացուցիչները մասնագիտական մի շարք կարևոր հարցեր քննարկելու հնարավորություն ունեցան «Նորարար  լուծումները  ստոմատոլոգիայում» ֆորումի ընթացքում: Հանդիպման գլխավոր թեման էր` «Նորարար մոտեցումները ռեկոնստրուկտիվ և էսթետիկ պրոթեզավորման ժամանակ»:

Մանրամասների մասին Մեդ-Պրակտիկը զրուցեց կազմակերպչի՝ «Ստոմատոլոգիական զբոսաշրջություն դեպի Հայաստան» նախագծի (Dental Tourism Armenia) ղեկավար Դավիթ Հովհաննիսյանի հետ:

–   «Ստոմատոլոգիական զբոսաշրջություն դեպի Հայաստան» նախագծի կազմակերպած հերթական հանդիպումն է այսօր: Նախագիծն արդարացնո՞ւմ է Ձեր սպասելիքները:

–   Այո, նախատեսում ենք նախագծի հիման վրա առաջիկայում ստեղծել նաև հիմնադրամ: Մեր նպատակն է կազմակերպել տարբեր հարթակներ՝ Հայաստանում ստոմատոլոգիայի վերաբերյալ տեղեկատվությունը տարածելու և պացիենտներ ներգրավելու նպատակով: Դրա համար կան տարբեր գործիքներ: Օրինակ՝ «Նորարար  լուծումները  ստոմատոլոգիայում» ֆորումը, որի շրջանակներում մեր թիմի օգնությամբ բարձրացնում ենք Հայաստանում ստոմատոլոգիայի ակտիվությունը: Այսօրվա հանդիպումը ևս այդ ֆորումի մասն է: Շատ շնորհակալ ենք մեր գործընկերներին՝ հատկապես Երևանի պետական բժշկական համալսարանին, Հայաստանի ստոմատոլոգների ասոցիացիային, այլոց…

Ֆորումին մասնակցելու համար Մոսկվայից Հայաստան է ժամանել բժիշկ Արամ Դավիդյանը՝ «Ավրորա» էսթետիկ ստոմատոլոգիայի և իմպլանտոլոգիայի կենտրոնի տնօրենը: Նա շատ հեղինակավոր մասնագետ է մեր բնագավառում: Ելույթ է ունենում աշխարհի տարբեր երկրներում. Հայաստանում առաջին անգամ է: Թեման վերաբերում է ատամնային իմպլանտացիային, դրան առնչվող ժամանակակից մեթոդներին, սարքավորումներին՝ ինչպես հասնել բացարձակ գեղագիտական արդյունքի:

–   Ո՞րն է հանդիպման առաջնային նպատակը:

–   Մեր հիմնական նպատակն է համախմբել երիտասարդներին. այսօր հավաքված լսարանի մեծ մասը հենց նրանք են: Միջոցառումներին մասնակցությունը հասանելի դարձնելու համար փորձում ենք դրանք կազմակերպել անվճար հիմունքներով, և դոկտոր Դավիդյանն էլ Հայաստանում ելույթ է ունենում առանց հոնորարի, չնայած նրա դասախոսությունները սովորաբար շատ թանկ արժեն:

Մենք երիտասարդների մեջ տեսնում ենք այն ներուժը, որը կօգնի Հայաստանում ստոմատոլոգիայի ակտիվացմանը:

 
–   Այսօրվա միջոցառումն ի՞նչ թեմաների է անդրադառնում:

–   Թեման իմպլանտացիան է և դրա նորագույն մեթոդները, էսթետիկ արդյունք ստանալու ճանապարհները: Դոկտոր Դավիդյանն այս ոլորտում բավական մեծ փորձով մասնագետ է. նրանից մասնակիցները կարող են սովորել շատ մանրուքներ՝ դրանք կիրառության մեջ դնելով իրենց պրակտիկայում:

–   Մասնագիտական ուսուցում  է՞լ է նախատեսվում:

–   Դա նախատեսված չէ, քանի որ սա բժշկի առաջին այցն է Հայաստան. և որոշեցինք այս անգամ բավարարվել դահլիճում հանդիպման ֆորմատով:

–   Դահլիճի բազմամարդությունից կարելի է ենթադրել,  որ երիտասարդ մասնագետները շահագրգռված են իրենց առաջխաղացմամբ:

–   Այո՛, այդպես է: Բժշկական համալսարանը, Ստոմատոլոգների ասոցիացիան շատ մեծ աշխատանք են կատարում տեսական գիտելիքների ապահովման տեսանկյունից, բայց երիտասարդ մասնագետները պրակտիկ գիտելիքի պակաս ունեն: Նմանատիպ նախաձեռնություններն ուղղված են այդ բացը լրացնելուն: Շնորհակալ ենք Սփյուռքի մեր լավագույն մասնագետներին, ովքեր ընդառաջ են գնում մեր առաջարկներին, գալիս են Հայաստան, կիսվում իրենց փորձով:

Դոկտոր Արամ Դավիդյանի ելույթի ողջ ընթացքում դահլիճը բազմամարդ էր և մեծ հետաքրքրությամբ արձագանքում էր նրա հարցադրումներին:

–   Դուք բավական երկար ճանապարհ եք կտրել այսօրվա հանդիպման համար. գոհացնո՞ւմ է:

–   Ես մեծ ուրախությամբ արձագանքեցի Դավիթի և Ստոմատոլոգների ասոցիացիայի հրավերին: Տպավորված եմ այս ուշադրությամբ, հետաքրքրվածությամբ:

–   Հատկապես ինչո՞վ եք կարևորում քննարկվող թեման:

–   Ես փորձեցի կիսվել նոր տեխնոլոգիաների կիրառման իմ փորձով: Համոզված եմ, որ առաջիկա տարիներին այս երիտասարդ մասնագետներն իրենց պրակտիկայում կսկսեն կիրառել նորագույն տեխնոլոգիաները՝ սեփական փորձով զգալով դրանց կարևորությունը:

–   Յուրաքանչյուր ոլորտում կարևոր է «դպրոցի» առկայությունը: Ձեզ համար ո՞րն է եղել այդ դպրոցը:

–   Ես ինքս Երևանի պետական բժշկական համալսարանի շրջանավարտ եմ, և շատ հուզիչ է քսանհինգ տարի անց նորից այստեղ հայտնվելը: Միշտ ասում եմ և կասեմ, որ սա բժշկական լավագույն բուհերից է ամբողջ աշխարհում: Այն գիտելիքները, որ կարելի է ստանալ այստեղ, դժվար է ստանալ որևէ այլ տեղ: Երևանի պետական բժշկական համալսարանն է այդ թիվ մեկ դպրոցն ինձ համար:

–   Կարծում եմ՝ այսօր երիտասարդ մասնագետները կդիմեն Ձեզ համագործակցության  առաջարկներով, ընդառաջ կգնա՞ք:

–   Նման առաջարկները ես միայն մեծ պատիվ կհամարեմ ինձ համար: Միշտ բաց եմ ինձ դիմողների առջև. նրանք ունեն ինձ հետ կապ հաստատելու տվյալները, մեր շփումը կշարունակվի: Հնարավորության սահմաններում օգտակար կլինեմ: Շատ լավ երիտասարդություն է հավաքված:

Մեզ հետ զրույցում հանդիպմանը մասնակցող երիտասարդ ստոմատոլոգները, որոնց մի մասը դեռևս ուսանող է, մեծ ոգևորությամբ խոսեցին ֆորումից քաղած օգուտների, ստացած տեղեկատվության կիրառելիության մասին՝ շնորհակալություն հայտնելով կազմակերպիչներին:

Հարցեր, պատասխաններ, մեկնաբանություններ