Ներկայացվեց թմրամիջոցների վերաբերյալ ազգային զեկույցը

ՀՀ ԱՆ Ակադեմիկոս Ս. Ավդալբեկյանի անվան առողջապահության ազգային ինստիտուտում այսօր տեղի ունեցավ Հայաստանի Հանրապետության թմրամիջոցների վերաբերյալ ազգային զեկույցի շնորհանդեսը:

Առողջապահության ազգային ինստիտուտի թմրամոլության և թմրամիջոցների դիտակայանի բաժնի ղեկավար Սուրեն Նազինյանն ամփոփ ներկայացրեց Հայաստանում 2012 թվականի ընթացքում այս առումով իրավիճակը:

«Հայաստանն անմասն չի մնում երկրագնդի բնակչության առջև ծառացած թմրամիջոցների օգտագործմամբ և ապօրինի շրջանառությամբ պայմանավորված տարեցտարի ահագնացող հիմնախնդիրներից: Ինչպես ողջ աշխարհում, այնպես էլ Հայաստանում վերջին տարիներին նկատվում է երկրի բնակչության կողմից ապօրինի թմրամիջոցներ օգտագործող մարդկանց թվաքանակի աճ և թմրամիջոցների նոր և վտանգավոր տեսակների տարածում»,- ասաց զեկուցողը:

Նազինյանի գնահատմամբ` մարդիկ փոխել են իրենց վերաբերմունքը նարկոլոգիական բուժօգնության նկատմամբ, ավելի վստահ են դիմում բուժում ստանալու նպատակով, ուստի և ավելի շատ դեպքեր են արձանագրվում:

Նա նշեց, որ ազգային զեկույցը ներառում է հանրապետությունում թմրամիջոցների առաջարկի և պահանջարկի նվազեցման ոլորտում առկա խնդիրները, դրանց լուծմանն ուղղված պետական մարմինների և հասարակական կազմակերպությունների կողմից իրականացված միջոցառումների համառոտ ակնարկը, գնահատականները և վերլուծությունները:

Նշենք, որ Հայաստանի Հանրապետությունում թմրամիջոցների և թմրամոլության վերաբերյալ ներկայացված ազգային զեկույցը 5-րդ նմանատիպ աշխատությունն է մեր երկրում թմրամուլության և թմրամիջոցների իրավիճակի վերաբերյալ: Այն օգտակար տեղեկատվության և վերլուծության աղբյուր է այս ոլորտում քաղաքականություն և գործունեություն իրականացնող պետական մարմինների և հասարակական կազմակերպությունների համար:

Հարցեր, պատասխաններ, մեկնաբանություններ