Քննարկվեցին ԼՂՀ առողջապահական համակարգի խնդիրներն ու զարգացման ուղիները

Ինչպես արդեն տեղեկացվել էր, ՀՀ առողջապահության նախարար Դերենիկ Դումանյանն աշխատանքային այցելություն է կատարել Լեռնային Ղարաբաղի Հանրապետություն:

Հունիսի 8-ին Արցախի Հանրապետության նախագահ Բակո Սահակյանի հետ կայացած հանդիպման ժամանակ քննարկվել են Արցախի առողջապահական համակարգում առկա հիմնախնդիրները, որի ընթացքում Դերենիկ Դումանյանը ներկայացրել է նաև Հայաստանի Հանրապետության առողջապահության ոլորտի բարեփոխումները։ Նախարար Դումանյանը միաժամանակ առաջարկել է աջակցել ԼՂՀ առողջապահական համակարգի զարգացմանը։ Պայմանավորվածություն է ձեռք բերվել բարեփոխումներն իրականացնել ոլորտ առ ոլորտ։ Նախարար Դումանյանն առաջարկել է հրատապ լուծում պահանջող խնդիրներին սկսել աջակցել անմիջապես։ Նա ընդգծել է Լեռնային Ղարաբաղի համար առողջապահական համակարգի օրինակելի մոդելի մշակման անհրաժեշտությունը։

Երկուստեք կարևորվել է ինչպես Հայաստանի և Լեռնային Ղարաբաղի առողջապահության նախարարությունների, այնպես էլ բժշկական հիմնարկների միջև անմիջական կապերի ստեղծումն ու ամրապնդումը։

ՀՀ առողջապահության նախարար Դերենիկ Դումանյանը առողջապահական համակարգում բարեփոխումների իրականացման դրույթները մանրամասն ներկայացրել է նաև ԼՂՀ առողջապահության նախարար Զոյա Լազարյանի և բուժհաստատությունների ղեկավարների հետ կայացած հանդիպման ընթացքում։ Այստեղ առավել հստակեցվել են Հայաստանի և Արցախի քույր-բուժհիմնարկների մշտական համագործակցության եզրերը, բազմաթիվ այլ հարցերի շարքում քննարկվել են վարակիչ և ոչ վարակիչ հիվանդությունների կանխարգելման և արդյունավետ բուժման, բժիշկների վերապատրաստումների կազմակերպման հարցերը։

Դերենիկ Դումանյանը ԼՂՀ վարչապետ Արայիկ Հարությունյանի ուղեկցությամբ Ստեփանակերտում ծանոթացել է հանրապետական բժշկական կենտրոնի նոր մասնաշենքի կառուցման ընթացքին, այցելել է նաև Մարտակերտի հիվանդանոց և Վանք գյուղի ամբուլատորիա։

ՀՀ առողջապահության նախարար Դերենիկ Դումանյանը, պատվիրակության անդամներ ՀՀ ԱՆ աշխատակազմի պետական հիգիենիկ և հակահամաճարակային տեսչության պետ Արտավազդ Վանյանը և ՀՀ ԱՆ գլխավոր մասնագետների խորհրդի նախագահ Ռազմիկ Աբրահամյանն այսօր նախարարության ստորաբաժանումների ղեկավարներին ծանոթացրեցին Լեռնային Ղարաբաղի Հանրապետություն կատարած աշխատանքային այցի արդյունքները։ Նախարար Դումանյանը, հակիրճ ներկայացնելով Արցախի առողջապահական համակարգում առկա հիմնախնդիրները, դրանց լուծմանն աջակցելու ուղղությամբ առաջին հանձնարարականները տվեց։ Մասնավորապես, հանձնարարվեց աջակցել ԼՂՀ ԱՆ տեղեկատվական, վերլուծական ծառայության արդիականացմանը, ԼՂՀ հանրապետական բժշկական կենտրոնի նորակառույց մասնաշենքում նախատեսվող բժշկական ծառայություններն ու մասնագիտական կաբինետներն արդյունավետ կառավարման նպատակով առավել օպտիմալ տեղաբաշխմանը։ Հանձնարարականներ տրվեցին նաև աջակցել ԼՂՀ-ում դեռևս չիրականացվող ծառայությունների կազմակերպման, իսկ իրականացվող բժշկական ծառայությունների` որակի բարձրացման, ֆինանսավորման նոր համակարգի ներդրման և այլ գործընթացներին։

Ռազմիկ Աբրահամյանը տեղեկացրեց, որ մոր և մանկան առողջության պանհպանման ոլորտում Հայաստանում կիրառվող չափորոշիչները մինչև շաբաթվա վերջը կուղարկվեն Արցախի մանկական բուժհաստատություններին, ծննդատներին և կանանց կոնսուլտացիաներին։

Որոշվեց Արցախում հիգիենիկ և հակահամաճարակային իրավիճակի ուսումնասիրության արդյունքներով առանձին քննարկում կազմակերպել ԼՂՀ առողջապահության նախարարի հետ միասին։

Ամփոփելով խորհրդակցությունը, նախարար Դումանյանը նշեց, որ այսուհետև Հայաստանի և Արցախի առողջապահական ոլորտում ավելի կընդլայնվի փոխհամագործակցությունը, ավելի հաճախակի կլինեն այցելությունները։

Հարցեր, պատասխաններ, մեկնաբանություններ