Գյուղատնտեսության եւ առողջապահության ոլորտի հարցերը՝ կուսակցությունների նախընտրական ծրագրերում

Այսօր Օքսֆամը եւ Քաղաքացիական հասարակության համագործակցության ցանցը (ՔՀՀՑ) «Քվեարկենք փոփոխությունների համար» ծրագրի շրջանակներում հրավիրել էին կլոր սեղան- քննարկում՝ ԱԺ-ում ներկայացված կուսակցությունների ներկայացուցիչների մասնակցությամբ, որն ուղղված էր առողջապահության եւ գյուղատնտեսության ոլորտներում բարեփոխումների ծրագրերի բացահայտմանը:

Քննարկման նպատակն էր ներկայացնել «Բարելավված առողջապահական համակարգ» եւ «Զարգացած գյուղատնտեսություն» առաջարկությունների փաթեթների շուրջ ԱԺ կուսակցությունների ամփոփ արձագանքները, ինչպես նաեւ քննարկել դրանց շուրջ համագործակցության հետագա հնարավորությունները:

Aravot.am-ի հետ զրույցում Օքսֆամի տնօրեն Մարգարիտա Հակոբյանն ասաց. «Պատահական չէ, որ ծրագիրն իրականացվում է առողջապահության եւ գյուղատնտեսության ոլորտներում: Դրանք մեր հետաքրքրության շրջանակներում էին: Եվ քանի որ 18 տարվա աշխատանքային փորձ ունենք Հայաստանում, շատ լավ գիտենք գյուղատնտեսության՝ գյուղական վայրերի եւ առողջապահության ոլորտի խնդիրները , մենք մոտ ենք կանգնած դրանց, դրա համար էլ որոշեցինք օգտագործել նախընտրական քարոզարշավները եւ կարողանալ հանդես գալ առաջարկությունների փաթեթով, որոնք վերաբերվում են այս երկու ոլորտներին»,-նշեց Հակոբյանը՝ ավելացնելով, որ ծրագրում ներգրավվել է նաեւ Քաղաքացիական հասարակության համագործակցության ցանցը, որը նախաձեռնվել է Օքսֆամի կողմից եւ ունի 10-ամյա պատմություն եւ որին ակտիվորեն մասնակցում է նաեւ Տնտեսական զարգացման եւ հետազոտությունների կենտրոնը, որը նույնպես այս ցանցի անդամ է եւ Օքսֆամի գործընկեր կազմակերպություն:

«Մշակեցինք առաջարկությունները՝ քննարկելով դրանք, միաժամանակ աշխատելով Գյուղատնտեսական դաշինքի հետ, որը վերջերս է ստեղծվել՝ 2011 թվականին եւ իր մեջ ներառում է 11 կազմակերպություն, որոնք ակտիվ են գյուղատնտեսության ոլորտում, եւ ծրագրեր ունեն, եւ պրակտիկ գործունեություն են ծավալում:

Արդյունքում՝ ձեւավորեցինք մեր առաջարկները, հանդիպեցինք առանձին պատգամավորների եւ կուսակցությունների հետ, եւ այդ փաթեթներն առաջարկեցինք իրենց: Այնուհետեւ հատուկ հարցաթերթիկներ ներկայացվեցին նրանց, որպեսզի իրենք լրացնեն եւ տեսնենք, թե որքանով են մեր առաջարկները ներառվում իրենց ծրագրերի մեջ»,-հավելեց Հակոբյանը, շարունակելով, որ այսօրվա հանդիպման նպատակն է հասկանալ, թե ինչ արձագանքներ են եղել: Հակոբյանի փոխանցմամբ՝ կա նաեւ ամփոփ զեկույց: Մնում է քննարկել հետագա համագործակցության մասին հարցերը:

Հարցեր, պատասխաններ, մեկնաբանություններ