Հայաստանի Մայրաքաղաքը Գրքի 12-րդ համաշխարհային Մայրաքաղաք

Ապրիլի 22-ին, Երևանի Մեսրոպ Մաշտոցի անվան հնագույն ձեռագրերի թանգարան-ինստիտուտի` Մատենադարանի առջև Երևանը հռչակվեց 2012 թ. գրքի 12-րդ համաշխարհային մայրաքաղաք:

Շքեղ հանդիսությամբ գրքի 2011-ի մայրաքաղաք Բուենոս Այրեսի քաղաքապետ Մաուրիցիո Մակրին տիտղոսը փոխանցեց Երևանի քաղաքապետ Տարոն Մարգարյանին: Բացման արարողությանը ներկա էր ՀՀ նախագահ Սերժ Սարգսյանը, Ամենայն Հայոց կաթողիկոս Գարեգին Բ-ն, վարչապետ Տիգրան Սարգսյանը, օտարերկրյա պատվիրակությունների ղեկավարներ, Հայաստանում հավատարմագրված դիվանագիտական կառույցների ներկայացուցիչներ և այլոք:

Ելույթների ընթացքում Մատենադարանից մոտ մեկ կիլոմետր հեռավորության վրա աշխարհի գործող19 այբուբենների տառերից հավաքվեց խորհրդանշական «Ամրագրիր քո ապագան» մետաղական քանդակը, որը դեպի վեր քայլող մարդն է, ով գնում է դեպի ապագան:

Միջոցառմանը ելույթ ունեցան արգենտինյան տանգոյի վարպետներ, 2013-ի գրքի համաշխարհային մայրաքաղաք Բանգկոկից ժամանած ազգագրական և Հայաստանի պարի պետական համույթները:

Միջոցառումը եզրափակվեց եռաչափ գրաֆիկայով պատրաստված ներկայացմամբ և շքեղ հրավառությամբ:

Երևանն այդ պատվավոր տիտղոսը կրելու է ուղիղ մեկ տարի:

Հարցեր, պատասխաններ, մեկնաբանություններ