Համաշխարհային բանկի առաքելության թիմը նախարարությունում

ՀՀ առողջապահության նախարար Հարություն Քուշկյանն ընդունել է Համաշխարհային բանկի «Առողջապահական համակարգի արդիականացում» վարկային ծրագրերի իրականացմանն աջակցող առաքելության թիմին`  առողջապահության ավագ տնտեսագետ Օուեն Սմիթին, ծրագրերի ավագ պատասխանատու Ջոհաննե Անգերսին, ինչպես նաև Համաշխարհային բանկի երևանյան գրասենյակի առողջապահության թիմի աշխատանքային խմբի ղեկավար Սուսաննա Հայրապետյանին:

Հանդիպման ընթացքում քննարկվել են «ՀՀ առողջապահական համակարգի արդիականացում» երրորդ վարկային ծրագրի շրջանակներում նախատեսվող միջոցառումները, որոնք պետք է իրականացվեն 2012-2017 թվականներին: 

Հյուրերը նախարարին են ներկայացրել առաջարկվող ծրագրի ուղղությունները` Պրոֆ. Ռ.Յոլյանի անվան արյունաբանական կենտրոնի և օնկոլոգիական ծառայությունների արդիականացում, ոչ վարակիչ հիվանդությունների, մասնավորապես` սրտանոթային, շաքարային դիաբետի, կրծքի և արգանդի վզիկի քաղցկեղի վաղ հայտնաբերման նպատակով ՀՀ բնակչության շրջանում սկրինինգային ծրագրեր:

Հարություն Քուշկյանը, ընդհանուր առմամբ, հավանություն է տվել ծրագրին և նշել, որ Համաշխարհային բանկի հետ համագործակցությունը միշտ էլ արդյունավետ է եղել, իսկ սկրինինգային ծրագրերը կնպաստեն վաղ հայտնաբերմանը, և անդառնալի կորուստների կանխմանը:

Կողմերը քննարկել են նաև ծրագրի իրականացմանն ուղղված անհրաժեշտ միջոցառումների ժամանակացույցը, ծավալը, ինչպես նաև արդիականացման հետևանքով ակնկալվող արդյունքները:

Նախարարը Ծաղկաձորում

ՀՀ առողջապահության նախարարության և «Վորլդ Վիժն Հայաստանե կազմակերպության նախաձեռնությամբ զանգվածային լրատվամիջոցների ներկայացուցիչների համար Ծաղկաձորում կազմակերպվել է իրազեկման երկօրյա դասընթաց` նվիրված առողջապահության ոլորտում իրականացված բարեփոխումներին:

Սեմինարին ներկա է եղել ՀՀ առողջապահության նախարար Հարություն Քուշկյանը: Նախարարն ամփոփ ներկայացրել է նախորդ տարիների ձեռքբերումները, նաև նախանշել առողջապահության ոլորտի հետագա անելիքները և ծրագրերը` ընդգծելով զանգվածային լրատվամիջոցների ներկայացուցիչների դերը խնդիրները վերհանելու, հանրությանն անկողմնակալ տեղեկատվություն փոխանցելու, այդպիսով բարեփոխումների իրականացմանն աջակցելու գործում:

Հարություն Քուշկյանը խիստ կարևորել է առողջապահության ոլորտի, բժիշկների հանդեպ ազգաբանակչության վստահությունը և նշել. «Բարեփոխումներ իրամանացնելը, բնականաբար, հեշտ չէր: Պետք էր առաջին հերթին փոխել հանրության վերաբերմունքն ու տրամադրվածությունը ոլորտի նկատմամբ»: Նախարարը վստահեցրել է, որ կա մեծ պատրաստակամություն առկա մի շարք խնդիրները լուծելու համար: Եվ եթե երեք-չորս տարի առաջ լրատվամիջոցների ներկայացուցիչների հետ հանդիպումների ժամանակ հիմնականում քննարկվում էին ոլորտում իրականացվելիք ծրագրերը, այսօր արդեն կարող են խոսել կյանքի կոչված ծրագրերից ու դրանց առնչվող հեռանկարների մասին:

Առողջապահության նախարարը հավաստիացրել է, որ ոլորտում ցանկացած խնդիր հաղթահարելի է և ենթակա լուծման:

«Մեզ համար ամենակարևորն այն է, որ ժողովուրդը գոհ լինի առողջապահական ծառայություններից: Բարձրացնելով մեր աշխատանքի որակը` մենք կբարձրացնենք ժողովրդի վստահությունը մեր գործունեության նկատմամբ»,- ավելացրել է նախարարը:

Անդրադառնալով բարեփոխումներին` Հարություն Քուշկյանը նշել է, որ Մարզերի համաչափ զարգացման ծրագրի շրջանակներում երկու տարվա ընթացքում շահագործվել է 7 խոշոր բժշկական կենտրոն` Հրազդանում, Իջևանում, Արմավիրում, Արարատում, Գորիսում, Ապարանում, Գավառում: Արդիականացված բժշկական հաստատություններում իրականացվել է ոչ միայն շենքերի հիմնանորոգում, այլև դրանք հագեցվել են ժամանակակից բժշկական սարքավորումներով, պարագաներով և կահույքով, ինչպես նաև իրականացվել է բժշկական անձնակազմի վերապատրաստում: Նախարարի հավաստիացրել է, որ 2012-ին ևս շարունակվելու է գործընթացը: Գալիք տարվա ընթացքում նոր հիվանդանոց կունենան գյումրեցիները, քանի որ նախատեսվում է ապրիլին ավարտվել Գյումրու հիվանդանոցային համալիրի շինարակական աշխատանքները: Ծրագրի շրջանակներում կհիմնանորոգվեն Կապանի, Աբովյանի, Բերդի բժշկական կենտրոնները, իսկ Մեղրիում և Վանաձորում կկառուցվեն նոր բուժհաստատություններ:

«Համաշխարհային բանկի հետ համատեղ իրականացնելու ենք օնկոհեմոտոլոգիական նոր կենտրոնի կառուցում, որի ստեղծումը հրատապ է» ,- տեղեկացրել է առողջապահության նախարարը:

Նախարարության կարևոր հաջողությունների շարքում Հարություն Քուշկյանը նշել է մոր և մանկան բնագավառի բարեփոխումները, ֆինանսատնտեսական ճկուն մեխանիզմների ստեղծումը, որոնք հնարավորություն տվեցին առողջապահական ոլորտը հանել կրեդիտորական հսկայական պարտքերից:

«Պետք է նշեմ նաև անհետաձգելի բուժօգնության բարեփոխման մասին, որովհետև առանց շտապօգնության ծառայության հնարավոր չէ պատկերացնել ժամանակակից ու առողջ հասարակություն»,- նշել է նախարարը` ավելացնելով, որ ստեղծվել է ժամանակակից դիսպետչերական ծառայություն, որտեղ հիվանդների կանչերն ընդունում են ոչ թե բուժքույրերը, այլ բժիշկները:

Նախարար Քուշկյանը շեշտել է, որ հաճախ հենց լրատվամիջոցների կողմից հնչած քննադատությունը է հիմք հանդիսանում մի շարք խնդիրների լուծման համար և հնարավորություն ստեղծում գերատեսչության ուշադրությունը սևեռելու այն կարևոր հիմնախնդիրների վրա, որոնք վրիպել են նախարարության տեսադաշտից:

Հարցեր, պատասխաններ, մեկնաբանություններ