Մութ սենյակում հյուրերին գինի մատուցեցին` Հաշմանդամների միջազգային օրվա կապակցությամբ

Դեկտեմբերի 2-ին The Club ակումբում Հաշմանդամների միջազգային օրվա կապակցությամբ Բրիտանական խորհուրդը կազմակերպել էր «Չորս զգայարան» ինտերակտիվ միջոցառումը: Med-Practic-ի հետ զրույցում Բրիտանական խորհրդի հայաստանյան գրասենյակի տնօրեն Արևիկ Սարիբեկյանն ասել է. «Բրիտանական խորհուրդը որդեգրել է հավասար հնարավորությունների և բազմազանության քաղաքականություն, որն արգելում է խտրականության ցանկացած դրսևորում: «Չորս զգայարան» ինտերակտիվ միջոցառումը կազմակերպվում է հավասարությանն ու բազմազանությանն ուղղված նախաձեռնությունների շրջանակում»: Ա. Սարիբեկյանը նաև ընդգծել է, որ միջոցառման նպատակն է բարձրացնել տեսողական խնդիրներ ունեցող մարդկանց հարցերի հանդեպ հասարակության իրազեկության մակարդակը:

Բրիտանական խորհրդի «Չորս զգայարան» ինտերակտիվ միջոցառումը, ի դեպ, հնարավորություն տվեց ներկաներին զգալ շրջապատող միջավայրը` ձայնի, համի, հոտի և շոշափելիքի միջոցով: Ներկա հյուրերին առաջարկեցին մասնակցել գինու կույր համտեսմանը. ամբողջովին մութ սենյակում հյուրերին գինի մատուցեցին: Հյուրերը հնարավորություն ունեցան համտեսել գինին, լսել երաժշտություն, գինու բույրի և շոշափելիքի միջոցով կողմոնորոշվել միջավայրում:

Համտեսման ընթացքում դերասան-մատուցողները ստեղծեցին իրավիճակներ, որոնց ընթացքում հյուրերը, օգտագործելով հինգ զգայարաններից չորսը, զգացին ու յուրովի գնահատեցին կույրերի աշխարհը, այսպիսով` հասկանալով նրանց խնդիրներն առօրյա կյանքում:
«Սա, իսկապես, հետաքրքրական և յուրօրինակ միջոցառում է, ինչը հնարավորություն կտա նորովի դիտարկել տեսողական խնդիրներ ունեցող մարդկանց հիմնահարցերը: Տեսողական խնդիրներ ունեցող մարդը կարող է և պետք է լինի հասարակության լիարժեք մասնիկը: Այս միջոցառումը կօգնի կոտրել մեր հասարակությունում առկա կարծրատիպերը»,- ասել է Հայաստանի կույրերի միավորման մշակույթի տան տնօրեն Յուրի Ավետիսյանը:

Լուսանկարները` med-practic.com

Հարցեր, պատասխաններ, մեկնաբանություններ