Սերգեյ Հակոբյանի նոր ձեռնարկը. «Լյարդի ցիռոզի բարդությունների բուժումը»

Լույս է տեսել Միքայելյանի անվան վիրաբուժության ինստիտուտի լյարդի վիրաբուժության և լյարդաբանության բաժանմունքի վարիչ Սերգեյ Հակոբյանի «ЛЕЧЕНИЕ ОСЛОЖНЕНИЙ ЦИРРОЗА ПЕЧЕНИ» («Լյարդի ցիռոզի բարդությունների բուժումը») աշխատությունը: Ձեռնարկը նախատեսված է վիրաբույժների, գաստրոէնտերոլոգների, վարակաբանների, ընտանեկան բժիշկների, ասպիրանտների, կլինիկական օրդինատորների և բժշկական համալսարանների բարձր կուրսի ուսանողների համար: Գրքի գրախոսներն են. Միքայելյանի անվան վիրաբուժության ինստիտուտի տնօրենի տեղակալ Օ. Տանանյանը և «Նորք» ինֆեկցիոն հիվանդանոցի լյարդաբանության բաժանմունքի վարիչ Ա. Կազինյանը:

Գիրքը նվիրված է Միքայելյանի անվան վիրաբուժության ինստիտուտի տնօրեն պրոֆեսոր Համլետ Թամազյանի հիշատակին:

Ստորև ներկայացված է գրքի նախաբանը:

«Վերջին տարիների ընթացքում Հայաստանում նկատվում է լյարդի հիվանդություններով տառապող մարդկանց թվի աճ: Լյարդի ցիռոզը համարվում է կյանքին վտանգ սպառնացող ամենածանր հիվանդություններից մեկը, որի բարդությունների աճը զգալիորեն խորացնում է հիվանդության ընթացքը՝ բժիշկների առջև դնելով բազմաթիվ խնդիրներ, որոնց մեծ մասն անլուծելի են: Այս ձեռնարկում ներկայացված են ամփոփիչ տեղեկություններ, որոնք հիմնված են ինչպես համաշխարհային, այնպես էլ  Միքայելյանի անվան վիրաբուժության ինստիտուտի լյարդի վիրաբուժության և լյարդաբանության բաժնի անձնակազմի և հեղինակի անձնական փորձի վրա:

Հույս ունենք, որ այս գործնական ձեռնարկը մեծ հետաքրքրությամբ կընդունվի վիրաբուժների լայն շրջանակի, թերապևտների, գաստրոէնտերոլոգների, վարակաբանների, ինչպես նաև օրդինատորների և բժշկական համալսարանի ուսանողների կողմից:»

Մոտ ժամանակներս  Med-Practic-ը ծրագրում է հարցազրույց վարել աշխատության հեղինակ Սերգեյ Հակոբյանի հետ` ծանոթանալու նրա մասնագիտական գործունեությանը, նաև ստանալու աշխատության ստեղծման մասին տեղեկություններ:

Ովքեր ունեն հարցեր Սերգեյ Հակոբյանին, կարող եք ուղարկել մեզ և մենք կանդրադառնանք դրանց` մեր հարցազրույցի ընթացքում:

Հիշեցնենք, որ գիրքն անվճար տրամադրվելու է հիվանդանոցներին, պոլիկլինիկաներին, գրադարաններին, Հայաստանի ու Արցախի ուսանողներին և բոլոր ցանկացողներին:

Նրանք, ովքեր ցանկանում են ձեռք բերել Սերգեյ Հակոբյանի գիրքը, կարող են դիմել.

հասցե.  Երևան, Քանաքեռ-Զեյթուն համայնք, փող. Ասատրյան 9,
հեռախոս.  +374 10 28 44 90,
էլ. Հասցե.  [email protected]

Հարցեր, պատասխաններ, մեկնաբանություններ