Հայաստանում հոգեկան խանգարումներով հիվանդների թիվն աճել է

Հոկտեմբերի 10-ն աշխարհում հայտարարված է` որպես հոգեկան առղջության համաշխարհային օր: Հայաստանում հոկտեմբերի 10-ից նոյեմբերի 10-ը հայտարարված է հոգեկան առողջության միամսյակ:

Այսօր լրագրողների հետ հանդիպմանը ՀՀ Հոգեբուժական ասոցացիայի նախագահ Արմեն Սողոյանը ներկայացրեց ոլորտի հիմնախնդիրները, միամսյակի շրջանակներում մարզային հոգեբուժարաններ այցելությունների ու հանդիպումների արդյունքները:

Պատկերը հուսադրող չէ, սակայն, ինչպես նկատեց մասնագետը, հոգեկան առողջությունը ախտահարված է ամբողջ աշխարհում. պատճառը նոր աշխարհի մեխանիզմներն են, ինչպես նաև կախվածությունները` հիմնականում թունավոր երևույթներից` ծխախոտ, թմրանյութ և այլն:

Այսօր աշխարհում 450 մլն մարդ տառապում է այս կամ այն հոգեկան խանգարմամբ:

Հայաստանում հաշվառված է 44.000 հոգեկան խանգարումներով հիվանդ: Թիվը, սակայն, Սողոյանի խոսքերով, ավելին է. «Կան մարդիկ, ովքեր չեն դիմում մասնագետների` վախենալով հասարակության ծաղրից: Այսօր սակայն պատկերն ավելի դրական է, քան խորհրդային տարիներին, հասարակության վերաբերմունքը բավականին փոխվել է»:

Կանայք թե՞ տղամարդիկ են առավել տառապում հոգեկան հիվանդություններով` որոշել հնարավոր չէ: Արմեն Սողոյանի խոսքերով` դա պայմանավորված է շեղումների բնույթով: Օրինակ` էմոցիոնալ ոլորտի խանգարումներով տառապում են ավելի շատ կանայք, իսկ, օրգանական և մտավոր խանգարումներով` տղամարդիկ:

«Հոգեկան հիվանդություններից ապահովագրված չէ ոչ ոք` անկախ տարիքից, սեռից ու քաղաքական հայացքներից»,- նշեց Ա. Սողոյանը` հավելելով, սակայն, որ հոգեկան առողջության խաթարման ամենաճգնաժամային տարիքը մինչև 30-35-ի սահմանն է:

ՀՀ Հոգեբուժական ասոցացիայի նախագահը նկատեց, որ ցանկացած հիվանդության դեմ պայքարում են բժիշկն ու հիվանդը: Ում կողմից լինի հիվանդը` նա էլ կհաղթի:

«Հոգեկան հիվանդություններում որևէ խորհրդավոր բան չկա: Այսօր ամբողջ աշխարհում հոգեկան խանգարումները հայտարարված են` որպես բուժվող»,-ամփոփեց Արմեն Սողոյանը:

Հարցեր, պատասխաններ, մեկնաբանություններ