Պլաստիկ վիրաբուժությունը Հայաստանում 25 տարվա պատմություն ունի. Առաջին անգամ բութ մատ է վիրահատվել

Այսօր Հայաստանում գործող պլաստիկ վիրաբույժները չնայած ունեն բարձր որակավորում, բայց իրենց առաջ խնդիր են դրել «կոորդինացվել աշխարհում զարգացող բոլոր պրոցեսներին, քանի որ անընդհատ սովորելու կարիք ունենք»: Տեսակետը Պլաստիկ վիրաբույժների ասոցիացիայի նախագահ, էրեբունի բժշկական կենտրոնի պլաստիկ վիրաբույժ Արմեն Հովհաննիսյանին է, ով այսօր իր գործընկերների հետ Պլաստիկ վերականգնողական և Էսթետիկ վիրաբույժների հայկական ասոցիացիայի (AAPRAS) և պլաստիկ վիրաբույժների միջազգային կոնֆեդերացիայի(IPRAS) հրավիրած AAPRAS-ի III միջազգային համաժողովի շրջանակներում հանդիպեցին լրագրողներին:

Ա. Հովհաննիսյանը փաստեց, մարդիկ ավելի շատ շփվում են պլաստիկ վիրաբուժության էսթետիկ մասի հետ, սակայն այն շատ ավելի կարևոր երկրոդ մասն էլ ունի` ռեկոնստրուկտիվը: Ներկայացնելով Հայաստանում պլաստիկ վիրաբուժության պատմությունը` Ա.Հովհաննիսյանը հիշեցրեց, որ պլաստիկ վիրաբուժությունն այստեղ 25 տարվա պատմություն ունի:

«Առաջին պլաստիկ վիրաբուժությունը 1980-ականներին է եղել` Միքայելյան ինստիտուտում: Առաջին անգամ բութ մատի պլաստիկ վիրահատություն արվեց, հետո եղավ Սպիտակի երկրաշարժը, ապա Ղարաբաղյան պատերազմը: Պատերազմական գործողություններն ու բնական աղետները հիմք են դնում այնպիսի հիվանդությունների, որոնք պլաստիկ վիրաբուժության կարիք ունեն»,- ասաց նա:

Բժիշկի ներկայացմամբ, Հայստանի 3 խոշոր բաժանմունքներում` Երևանի թիվ մեկ կլինիկայում, Քանաքեռ-Զեյթունի հիվանդանոցում, Էրեբունի բժշկական կենտրոնում է պլաստիկ վիրաբուժություն կատարվում: Իսկ երկրում ընդամենը երկու ամբիոններ կան, որ պլաստիկ վիրաբույժներ են պատրաստում` Բժշկական համալսարանում ու Առողջապահության ազգային ինստիտուտում:

Նշենք, որ համաժողովը կընթանա հունիսի 28-ից 30-ը: Համաժողովի աշխատանքներին մասնակցում են աշխարհի 20 երկրների 150 պլաստիկ վիրաբույժներ: Համաժողովի շրջանակներում նախատեսվում է միջազգային փորձագետների 6 դասախոսություններ` 7 սեկցիաներում, ընթերցնվելիք շուրջ 60 զեկուցումներ, ինչպես նաև 10 կլոր սեղան, որոնցում բացի նեղ մասնագիտական թեմաներից կքննարկվեն նաև Եվրոպայում ու Ամերիկայում մասնագիտական կրթության, պլաստիկ վիրաբույժների կողմից իրականացվող հումանիտար առաքելության վերաբերյալ հարցեր:

Հարցեր, պատասխաններ, մեկնաբանություններ