Վաղը` դեկտեմբերի 8-ին, կամփոփվեն «Համակարգիչ բոլորի համար» ծրագրի պիլոտային փուլի արդյունքները և կազդարարվի հիմնական փուլի մեկնարկը: Այս մասին Aysor.am-ին հայտնեցին Ձեռնարկությունների ինկուբատոր հիմնադրամից (ՁԻՀ):

«Ծրագրի գլխավոր նպատակն է ընդլայնել համակարգիչների տարածումը Հայաստանում` մատչելի և որակյալ համակարգիչներ գնելու հնարավորություն ստեղծելով նաև մարզերի բնակիչների համար, նպաստել Հայաստանի ՏՀՏ ոլորտի զարգացմանը` խթանելով համակարգչային տեխնիկայի և ծրագրային ապահովման մշակման շուկաների զարգացումը, խթանել ինտերնետի տարածումը` բարձրացնելով օնլայն ծառայություններից օգտվողների թիվը և հիմք ստեղծելով էլեկտրոնային ծառայությունների ներդրմանը կառավարության, գործարար հատվածի, կրթական հաստատությունների շրջանակում»,- նշեցին ՁԻՀ-ից:

Ծրագրի հիմնական փուլին անցման նպատակով կատարվել է ամբողջ հանրապետության տարածքով վաճառակետերի քարտեզագրում, նախնական ընտրություն, որը կապահովի երկրի 100 տոկոսանոց ծածկույթ: Մշակվել են դասընթացներ` ընտրված վաճառակետերի աշխատակիցների վերապատրաստման համար:

Վաղը նախատեսվում է նաև մի շարք ենթածրագրերի փորձնական փուլերի իրականացման մասին հուշագրերի ստորագրում, այդ թվում` «Դպրոցական համակարգիչ», «Համակարգիչ ուսուցիչների համար» և այլն:

ՁԻՀ-ից նշեցին, որ դպրոցների ուսուցիչներին ուղղված «Համակարգիչ ուսուցիչների համար» ծրագիրը մշակվում է Ամերիկյան «Ինթել» և «Հյուլեթ Պակարդ» ընկերությունների հետ. «Ուսուցիչների հիմնական մասը չունի համակարգչից օգտվելու հնարավորություն թե՛ տանը, թե՛ աշխատավայրում: Ֆինանսավորման հարմար տարբերակների, ինչպես նաև հատուկ ուսուցիչների համար մշակած ծրագրային ապահովման և սարքավորումների առաջարկումը թույլ կտա բարձրացնել համակարգիչների օգտագործման մակարդակը բնակչության այս կարևոր սեգմենտում»: Նախատեսվում է հիմք ընդունել «Համակարգիչ բոլորի համար» ծրագրի մոդելը և առաջարկել ուսուցիչներին հատուկ մշակված ծրագրերով և բովանդակությամբ մատչելի համակարգիչներ և վերապատրսատման դասընթացներ` բարձրորակ և ժամակակից կրթության օրեցօր աճող պահանջներին բավարարելու նպատակով:

«Դպրոցական համակարգիչ» ծրագիրը մշակվել է «Ինթել» ընկերության հետ, որի շրջանակում հայ աշակերները հնարավորություն կունենան ստանալու շարժական և տարբեր այլ կարգի լուծումներ` բավարարելով տեխնոլոգիական ուսուցման և տեղեկատվական հասանելիության արդի պահանջները: Այս բաղադրիչի պիլոտային ծրագրում ներառվել են «Երևանի Անանիա Շիրակացու անվան ճեմարան» կրթահամալիրը և «Մխիթար Սեբաստացի» կրթահամալիրը: Որպես պիլոտի մեկնարկ, նշված կրթօջախներին անվճար տրամադրվել է 30-ական հատ «Intel Classmate PC» համակարգիչներ: