Քննարկվեցին մանկական հիվանդանոցային բուժօգնության բերելավմանն ուղղված հարցեր

Այսօր առողջապահության համաշխարհային կազմակերպության (ԱՀԿ) եվրոպական տարածաշրջանային գրասենյակը մանկական հիվանդանոցային բուժօգնության բերելավմանն ուղղված միջազգային խորհրդակցություն էր կազմակերպել:

ԱՀԿ-ն այս խնդիրը առողջապահության համակարգի կարևորագույն բաղադրիչներից է մեկն է համարում: Եվրոպական գրասենյակը 2002 թվականից աջակցում է մանկական հիվանդանոցային բուժօգնության բարելավմանն ուղղված գործընթացին:

Այսպես` ԱՀԿ կողմից մշակվել են ռազմավարական սկզբունքներ, կլինիկական ուղեցույցներ, ուսուցման և գնահատման մեթոդաբանություն, որը միտված է առաջին մակարդակի հիվանդանոցներում մանկական բուժօգնության հզորացմանը:  Յուրաքանչյուր երկիր մշակել է սեփական ազգային և տարածաշրջանային ռազմավարություններ, ծրագրեր և մանկական հիվանդանոցային բուժօգնության բարելավման միջոցառումներ, այդ թվում կադրային ներուժի զարգացման ոլորտում:

Միջոցառմանը ներկա առողջապահության նախարար Հարություն Քուշկյանը նշեց, որ մանուկները ուրույն և կարևոր տեղ ունեն հասարակության մեջ, պետական ու ընտանեկան արժեքային համակարգում: Ըստ նրա, ազգաբնակչության առողջության պահպանումն ու բարելավումը յուրաքանչյուր երկրի ռազմավարական կարևորագույն խնդիրներից է:

«Երեխաները համարվում են երկրի ապագան, ուստի նրանց առողջության պահպանումն առաջնահերթ խնդիր է բոլորիս համար: Անկախության հաստատման առաջին իսկ օրերից մանկության առողջապահական հիմնախնդիրները Հայաստանում եղել են կառավարության ուշադրության կենտրոնում: Մոր և մանկան առողջության պահպանման հիմնախնդիրը կարևորված է երկրի հիմնական ռազմավարական փաստաթղթում` Կայուն զարգացման ծրագրում, որպես հատուկ ծրագրային ոլորտ»,-ասաց Հ. Քուշկյանը:

Նախարարի հավաստմամբ, Մոր և մանկան հիմնախնդիրների գերակայությունն արտացոլված է նաև երկրի գլխավոր ֆինանսական փաստաթղթերում: Չնայած ֆինանսական ճգնաժամին, բյուջետային հատկացումներն այդ ուղղությամբ չեն կրճատվել:

Իսկ առողջապահության նախարարության Մոր և մանկան առողջության պահպանման բաժնի պետ Կարինե Սարիբեկյանը նշեց, որ խորհրդակցությունը կնպաստի հիվանդանոցային բուժօգնության որակի բարելավման հաջողված փորձի տարածմանը:

«Շատ կարևոր տեղ ունեն մանկական մահացության առումով հիվանդանոցային բուժօգնության խնդիրները: Մենք մանկաբարձական հիվանդանոցային ոլորտում բարեփոխումներ իրականացրինք` ներդնելով ծննդօգնության պետական հավաստագիրը: Պետք է ասեմ, որ իրապես հաջողված է և արդյունքները ցուցանիշներում երևում են: Որոշոկիորեն կրճատվել է ծննդատներում նորածինների մահացության մասնաբաժինն ու քանակը»,-ասաց Կ. Սարիբեկյանը:

Բացի այդ, խորհրդակցության ժամանակ քննարկվեցին ոլորտում առկա դժվարությունները, ձեռքբերումները, մոնիտորինգի և աջակցման գործընթացների հետագա միջոցառումները, ինչպես նաև փոքրիկ հիվանդների իրավունքների պաշտպանության հարցերը:

Նշենք, որ միջոցառմանը մասնակցում են Եվրոպական տարածաշրջանի շուրջ 13 անդամ-պետությունների, ԱՀԿ գլխավոր գրասենյակի, ԱՀԿ եվրոպական գրասենյակի, ԱՀԿ տարածաշրջանային գրասենյակների, ՄԱԿ-ի հաստատությունների, միջազգային և գործընկեր-կազմակերպությունների ներկայացուցիչներ:

Հարցեր, պատասխաններ, մեկնաբանություններ