Հաստատվել է շտապ օգնության ծառայության արդիականացման ռազմավարությունը

ՀՀ կառավարությունը հինգշաբթի նիստի ժամանակ հաստատել է շտապօգնության ծառայության արդիականացման ռազմավարությունը և տվյալ ռազմավարության գծով միջոցառումների ժամանակացույցը։

Ինչպես կառավարության նիստի ժամանակ հայտնեց ՀՀ առողջապահության նախարար Հարություն Քուշկյանը, ռազմավարությունը մշակվել է 2010թ.-ի կառավարության գործունեության ծրագրի հիման վրա և մասնավորապես ենթադրում է կառավարման մակարդակի բարձրացում, ավտոպարկի արդիականացում, կապի համակարգի բարձրացում, մասնագետների վերապատրաստման իրականացում: Նախարարը նշեց, որ մինչև 2010թ.-ի վերջը Չինաստանից Հայաստան կմտնի շտապօգնության 88 նոր մեքենա։

ՀՀ կառավարություն ներկայացված հիմնավորման համաձայն, ռազմավարությունը հանրապետության համար կարևոր նշանակություն ունի՝ հաշվի առնելով տարբեր տարերային աղետների գործոնը։ Փաստաթղթի մեջ նշվում է, որ աղետների և արտակարգ իրավիճակների ժամանակ տուժողների առաջին օգնությունը ցուցաբերում են շտապօգնության աշխատակիցները, որն առողջապահության համակարգի առավել օպերատիվ և մոբիլ կառույցն է։

Բացի այդ ռազմավարության հիմնավորման մեջ նշվում է, որ տարբեր հիվանդությունների և կյանքին սպառնող վնասվածքների ելքը կախված է նրանից, թե որքան արագ դեպքի վայր կժամանեն շտապօգնության բժիշկները, ինչպես նաև տեղում կամ ճանապարհին շտապ բուժօգնություն կկազմակերպեն, հիվանդին բուժհաստատություն կտափոխեն։

Հարցեր, պատասխաններ, մեկնաբանություններ