Հաստատվել է թմրամոլության դեմ պայքարի 2010-2012 թթ. միջոցառումների ժամանակացույցը

ՀՀ կառավարությունը հինգշաբթի նիստի ժամանակ հաստատել է Թմրամոլության և թմրանյութերի անօրինական շրջանառության դեմ պայքարի ազգային ծրագրի շրջանակներում 2010-2012 թթ.-ի միջոցառումների ժամանակացույցը:

Ինչպես նիստի ժամանակ տեղեկացրեց ՀՀ փոխոստիկանապետ Արթուր Օսիկյանը, միջոցառումների ժամանակացույցը մշակվել է ՀՀ նախագահ Սերժ Սարգսյանի հանձնարարությամբ:

Հայաստանի կառավարություն ներկայացված հիմնավորման համաձայն՝ ժամանակացույցի առաջնահերթ նպատակն է թմրամոլության և թմրանյութերի անօրինական շրջանառության դեմ պայքարի ոլորտում միջազգային և միջգերատեսչական համագործակցության ամրապնդումը:

Միջոցառումների ժամանակացույցի համաձայն՝ ծրագրվում է ուսումնասիրել Հայաստանի օրենսդրական բազան և ՄԱԿ-ի կոնվենցիաներին նրա համապատասխանությունը, մշակել համապատասխան կողմնորոշիչներ, բնակչության շրջանում ուսումնասիրություն անցկացնել թմրանյութերի օգտագործման տարածվածության վերաբերյալ, անչափահասների շրջանում պայքարել թմրամոլության դեմ:

Մասնագետների տվյալների համաձայն՝ 2009 թ.-ին Հայաստանում գրանցված թմրամոլների թիվը նախորդ տարվա համեմատ ավելացել է 50 տոկոսով և հասել 1740 մարդու: Սակայն փորձագետների գնահատականների համաձայն՝ այժմ կա շուրջ 30 հազար թմրամոլ, որոնցից 5-7 հազարը ծանր թմրանյութերի կախվածության մեջ են գտնվում, որոնք օգտագործվում են ներերակային միջոցով:

Հարցեր, պատասխաններ, մեկնաբանություններ