ՀՀ ԱԺ առողջապահության, մայրության և մանկության հարցերի մշտական հանձնաժողովի նիստ

ԱԺ առողջապահության, մայրության և մանկության հարցերի մշտական հանձնաժողովի նիստը Արա Բաբլոյանի նախագահությամբ քննարկեց «Հոգեբուժական օգնության մասին» ՀՀ օրենքում փոփոխություններ և լրացումներ կատարելու մասին» և. «ՀՀ քրեական օրենսգրքում փոփոխություններ կատարելու մասին» օրինագծերի փաթեթը: Օրինագծի նպատակն է բարելավել հոգեկան առողջության բնագավառի իրավական դաշտը և ապահովել հոգեկան հիվանդությամբ տառապող անձանց իրավունքների պաշտպանության ուղղությամբ կատարվող աշխատանքների շարունակականությունը:

Մասնավորապես, նախագիծը հստակեցնում է հոգեբուժական օգնության իրականացման հիվանդանոցային և արտահիվանդանոցային ձևերը՝ վերանայելով մինչև օրս օրենսդրության ոլորտում կիրառվող, սակայն գործնական գործածությանը և նշանակությանը չհամապատասխանող մի շարք հասկացություններ: Սույն նախագծով առաջարկվում է հիմնական հասկացություններում կանոնակարգել հիվանդանոցային հոգեբուժական օգնություն, հոգեբուժական հիվանդանոց, ընդհանուր հսկողության հոգեբուժական բաժանմունք և հատուկ տիպի հոգեբուժական բաժանմունք հասկացությունները:

Հիմնական հասկացություններում փոփոխությունները անհրաժեշտություն են առաջացնում նաև գործող օրենքի համապատսխան հոդվածներում օգտագործվող հասկացությունների փոփոխման և ՀՀ քրեական օրենսգրքի համապատասխան հոդվածներում փոփոխությունների կատարման: Գործող օրենքի բացերից է նաև այն, որ կարգավորված չէ հոգեբուժական հետազոտման իրականացման կարգը առանց հետազոտվողի կամ նրա օրինական ներկայացուցչի համաձայնության: Այս բացը կարող է բերել մարդու ազատ կամքի արտահայտման իրավունքի ոտնահարման: Հաշվի առնելով այս հանգամանքը նախագծով առաջարկվում է հոգեբուժական հետազոտումն իրականացնել առանց հետազոտվողի կամ իր օրինական ներկայացուցչի համաձայնության այն դեպքում, երբ հետազոտվողը իր հոգեկան վիճակից ելնելով անկարող է հոգալ սեփական կենսական կարիքները ու արտահայտել իր ազատ կամքը և չունի օրինական ներկայացուցիչ:

Վերոնշյալ օրինագիծը հանձնաժողովի դրական եզրակացությամբ կընդգրկվի ԱԺ չորրորդ գումարման 5-րդ նստաշրջանի և հունիսի 8-11-ի չորսօրյա նիստերի օրակարգում: Օրակարգի շրջանակներում պատգամավորներն ամփոփեցին և դրական եզրակացություն տվեցին «Հայաստանի Հանրապետության 2008թ. պետական բյուջեի կատարման մասին» տարեկան հաշվետվության վերաբերյալ:

Հարցեր, պատասխաններ, մեկնաբանություններ