Առաջին բուժօգնությունը ծննդաբերության ժամանակ. Արմենուհի Ավետյան. armeniamedicalcenter.am

Կանանց կոնսուլտացիայում բոլոր հղիներին հաշվառում են, հաշվարկվում է նրանց հղիության ժամկետը և զգուշացնում ծննդաբերության մոտավոր ժամկետի մասին: Հղիները տեղեկացվում են, թե ինչ կլինիկական վիճակի, ախտանիշների դեպքում (արյունային արտադրություն, որովայնի ստորին հատվածի, էպիգաստրալ շրջանի ցավեր, դիսկոմֆորտ, ճնշման տատանում, գլխապտույտ) պետք է շտապ դիմել կոնսուլտացիան վարող մանկաբարձին:

Եթե շտապ, արտառոց դեպքեր են լինում, օրինակ  ուշագնացություն, պետք է ցույց տալ ուշաթափության ժամանակ իրականացվող օգնությունը. գլուխը թեքել՝ լեզուն կուլ չգնալու, փսխման զանգվածները շնչափող չգնալու համար, և անմիջապես շտապ օգնություն կանչել: Որևէ այլ միջամտություն չի թույլատրվում իրականացնել, նույնիսկ, եթե կա արգանդային արյունահոսություն, որովհետև ցանկացած սխալ քայլ կարող է հետագա բարդությունների պատճառ դառնալ:

Տնային ծննդաբերություններ ներկայում չեն լինում: Նախկինում հազվադեպ հանդիպում էին նման դեպքեր և հաճախ` վատ ելքերով: Իսկ ներկայում հղիների «որակը» և գիտակցական մակարդակն անհամեմատ փոխվել է, չկա ուշադրությունից դուրս մնացած, բարձիթողի վիճակում գտնվող որևէ հղի: Կանանց կոնսուլտացիայի աշխատակիցները հսկողության ընթացքում ժամանակին  հետազոտություններ են իրականացնում և անհրաժեշտ խորհուրդներ տալիս:

Արտառոց վիճակներում արտակարգ իրավիճակի աշխատակիցներն առաջին օգնություն ցույց տալու համար պատրաստված են: Ցանկալի է, որ ավիացիայի աշխատակիցները նույնպես տիրապետեն այդ գիտելիքներին:

Եթե, այնուամենայնիվ, ծննդաբերությունն արտակարգ վիճակում է իրականանում, առաջնային պետք է շտապ օգնություն կանչել, իսկ այդ ընթացքում հղի կնոջ մարմինն ազատել սեղմող հագուստից, ապահովել ազատ շնչառություն և հոգեբանորեն աջակցել։
Եթե, այնուամենայնիվ, ծննդաբերությունը տեղի է ունեցել հիվանդանոցային պայմաններից դուրս,  մորն ու երեխային անհապաղ պետք է տեղափոխել հիվանդանոց:

«Արմենիա» Հանրապետական բժշկական կենտրոնի գինեկոլոգ- վիրաբույժ, սոնոգրաֆիստ Արմենուհի Ավետյան

Հարցեր, պատասխաններ, մեկնաբանություններ