Ախտորոշիչ լապարոսկոպիա. morevmankan.am

Ախտորոշիչ լապարոսկոպիան քիչ ինվազիվ (առանց վիրահատական միջամտության) վիրահատություն է, որը բժշկին հնարավորություն է տալիս տեսնելու որովայնի խոռոչի օրգանները և նվազագույն վիրահատական միջամտությամբ ստանալու առավելագույն տեղեկատվություն: Շատ դեպքերում այն անհրաժեշտ է ախտորոշման հաստատման կամ շտկման համար:

Ախտորոշիչ լապարոսկոպիան իրականացվում է որովայնի առաջային պատի անզգայացմամբ. 0.5-1 սմ փոքր բացվածքով ներմուծվում է ածխաթթու գազ: Արդյունքում որովայնի պատերը հեռանում են՝ բավարար տարածություն բացելով ներքին օրգանների զննման համար: Նույն բացվածքով մտցվում է լապարոսկոպը, որը բարդ օպտիկ սարք է, և որի շնորհիվ էկրանին երևում են ներքին օրգանները:

Լապարոսկոպիկ եղանակով հետազոտվում է որովայնի խոռոչում հեղուկի առկայությունը, պատերի արատները /ճողվածքներ/, ստամոքսը, կերակրափողը, լյարդը, փայծաղը, լեղուղիները, բարակ և հաստ աղիները, ձվարանները, արգանդի փողերը, արգանդը:

Անհրաժեշտության դեպքում մեկ այլ բացվածքով մտցվում է գործիք բիոպսիայի համար:

Լապարոսկոպիան ավարտվելուց հետո բացվածքները կարվում են: Կարերի ոչ մեծ չափը նպաստում է արագ ապաքինմանը և աննշան սպիացմանը:

Ախտորոշիչ լապարոսկոպիան կատարվում է.

• Փոքր կոնքի շրջանում և որովայնում ցավերի պատճառը պարզելու համար
• Անպտղության պատճառը պարզելու համար /արգանդի փողերի անցանելիությունը/
• Արտարգանդային հղիության կասկածի դեպքում
• Որոշ հիվանդությունների ախտորոշումը հաստատելու համար /արգանդի միոմա, ձվարանների կիստա, էնդոմետրիոզ, սեռական օրգանների բնածին արատներ և այլն/:
• Փոքր կոնքի ուռուցքային հիվանդության բնույթը ճշտելու համար

Նախապատրաստումը

Քանի որ ախտորոշիչ լապարոսկոպիան վիրահատություն է, այն պահանջում է համապատասխան նախապատրաստում: Նախապես կատարվում են որոշ հետազոտություններ՝ արյան և մեզի ընդհանուր հետազոտություն, փոքր կոնքի օրգանների ՈՒՁՀ, թոքերի ռենտգեն, էլեկտրասրտագրություն:

Միջամտությունից առաջ 8 ժամ չպետք է ուտել, ցանկալի է նաև չծխել, անմիջապես վիրահատությունից առաջ անհրաժեշտ է զուգարան գնալ:

Հարցեր, պատասխաններ, մեկնաբանություններ