Մեզի լաբորատոր հետազոտություն. ինչպե՞ս ճիշտ հանձնել. armeniamedicalcenter.am

Ե՞րբ է նշանակվում մեզի հետազոտություն:

Մեզի լաբորատոր հետազոտություն նշանակվում է:

• առողջության վիճակի հետազոտման և կանխարգելիչ ստուգման ժամանակ,
• հղիության ծրագրային այցերի ժամանակ,
• միզարձակման համակարգի հիվանդությունների՝ ցիստիտի, պիելոնեֆրիտի և այլ դեպքերում,
• շաքարային դիաբետի և նրա ախտորոշման ժամանակ,
• մի շարք այլ հիվանդությունների ախտորոշման ժամանակ,
• որոշ հիվանդություններից հետո (քութեշ, անգինա և այլն) առողջական վիճակը պարզելու համար,
• բուժման կուրսից հետո առողջական վիճակի գնահատման համար:

Մեզի հետազոտության ժամանակ ամենակարևոր ցուցանիշները և փոփոխությունները

• մեզի գույնը. դեղինի տարբեր երանգներ:
• թափանցիկությունը. պղտորության ցանկացած արտահայտություն կարող է ախտաբանական գործընթացի նշան լինել` լեյկոցիտների քանակի ավելացում, մանրէների կամ աղերի առկայություն:
• Թանձրությունը. տեսակարար կշիռը կախված է մեզում առկա նյութերի խտությունից՝ միզաթթու, միզանյութ, կրեատինին, աղեր, ցածր տեսակարար կշիռը կարող է պիելոնեֆրիտի նշան լինել, բարձր տեսակարար կշիռը վկայում է սիրտ-անոթային համակարգի, շաքարային դիաբետի կամ գլոմերուլոնեֆրիտի մասին:
• Թեզի ռեակցիան` pH (թթվա-հիմնային հավասարակշռություն), կարող է լինել թույլ թթվային, չեզոք կամ թույլ հիմնային: Այս ցուցանիշի վրա կարող են տարբեր արտաքին գործոններ ազդել՝ դեղերի, վիտամինների օգտագործում, կենսակերպ, սնունդ (մսեղենը բարձրացնում է թթվայնությունը, իսկ բանջարեղենային սնունդը դարձնում է թույլ հիմնային): pH-ի փոփոխությունը կարող է դիտվել նաև երիկամների հիվանդությունների և տարբեր բորբոքային գործընթացների ժամանակ: Բարձր pH-ը կամ բարձր թթվությունը հնարավոր է ջրազրկման ժամանակ, դիառեայի, շաքարային դիաբետի դեպքում:
• Սպիտակուց. նորմայում այն բացակայում է, առկա է միայն ախտաբանական վիճակների դեպքում:
• Գլյուկոզա. նորմայում պետք է չհայտնաբերվի: Օրինակ, հղիության երկրորդ, երրորդ եռամսյակներում այն կարող է վկայել հեստացիոն շաքարային դիաբետի մասին, որն անցնում է ծննդաբերությունից հետո, և ի հայտ է գալիս հորմոնների բարձր քանակի արդյունքում:  Ամեն դեպքում, դա նշան է սննդի և կենսակերպի վերանայման:
• Բիլիռուբին և ուրոբիլինոգեն. լեղային պիգմենտներ են:
• Էրիթրոցիտներ և լեյկոցիտներ, էպիթելային բջիջներ, մանրէներ և սնկեր. յուրաքանչյուրի մեծ քանակով առկայությունը վարակային և բորբոքային գործընթացների մասին է վկայում:

Ինչպե՞ս հանձնել մեզը` հետազոտության համար:

• Մեզը պետք է հանձնել առավոտյան, որի դեպքում ամենաճիշտ արդյունքը կարելի է ստանալ: Այն ցանկալի է վերցնել երկրորդ միզարձակման ժամանակ կամ առաջին շիթից հետո:
• Նախքան մեզը վերցնելը պետք է ապահովել շեքի շրջանի հիգիենան:
• Մեզը պետք է հավաքել մաքուր տարայում, ցանկալի է այն ձեռք բերել դեղատնից:
• Մեզը պետք է լաբորատորիա հասցնել 2-3 ժամվա ընթացքում:
• Մեզը հանձնելու նախորդ օրը պետք է բացառել ալկոհոլի օգտագործումը, խուսափել սթրեսից, նվազագույնի հասցնել ֆիզիկական ծանրաբեռնվածությունը
• Հեղուկի և ջրի օգտագործման քանակը պետք է չփոխել:
• Որպեսզի հնարավոր լինի գնահատել մեզի գույնը, նախորդ օրը սննդի մեջ պետք է չօգտագործել բազուկ, գազար և ծնեբեկ, որոնք կարող են փոխել գույնը:
• Մեզը հանձնելիս անհրաժեշտ է զգուշացնել օգտագործվող պատրաստուկների մասին, քանի որ որոշ դեղեր կարող են ազդել ցուցանիշների վրա:
• Կանանց խորհուրդ չի տրվում մեզ հանձնել դաշտանի օրերին:

Հարցեր, պատասխաններ, մեկնաբանություններ