Ուրոֆլոումետրիա. urolog.am

Ուրոֆլոումետրիան ախտորոշման եղանակ է, որի էությունը միզարձակման արագության չափումն է: Այն ախտորոշման համեմատաբար պարզ եղանակ է, որը կիրառվում է միզարձակման տարբեր խանգարումների ժամանակ:

Հետազոտության ցուցումները.

• շագանակագեղձի ադենոմա,
• միզատար խողովակի նեղացում,
• նեյրոգեն միզապարկ,
• գերակտիվ միզապարկ,
• անմիզապահություն,
• շագանակագեղձի քաղցկեղ:

Ինչպես է իրականացվում ուրոֆլոումետրիան

• Կիրառվում է հատուկ սարք (ուրոֆլոումետր): Հիվանդին խնդրում են միզել սարքավորման հատուկ անոթի մեջ, որը վերլուծում է կարևոր ցուցանիշները և  ստանում բավականին ճշգրիտ ցուցանիշներ: Հետազոտությունը պետք է իրականացվի հիվանդի համար հարմար պայմաններում, իսկ անհրաժեշտության դեպքում ախտորոշումը կրկնվում է մի քանի անգամ՝ ավելի օբյեկտիվ տվյալներ ստանալու համար: Հարկ է հիշել, որ ախտորոշումը պետք է իրականացվի բավականին լցված միզապարկով, սակայն վերջինիս գերլցումը բացարձակ ցանկալի չէ:

• Չափիչ անոթի և վայրկյանաչափի կիրառում: Այս դեպքում հիվանդը նշում է միզարձակման սկիզբը և վերջը ու չափում մեզի ծավալը: Ապա ստացված ծավալը բաժանելով ժամանակի վրա՝  ստանում են միզարձակման միջին արագությունը: Այս եղանակի կիրառումը ցուցված է ուրոֆլոումետրիայի բացակայության ժամանակ: Բնականաբար, ի տարբերություն սարքային եղանակի, վայրկյանաչափի կիրառումը թույլ չի տալիս ստանալ հոսքի բոլոր անհրաժեշտ ցուցանիշները:

Ուրոֆլոումետրիայի ցուցանիշները նորմայում

• Միզարձակման առավելագույն արագությունը տղամարդկանց համար նորմայում 15մլ/վրկ և ավելի է, կանանց համար՝ 20 մլ/վրկ և ավելի:
• Միզարձակման միջին արագությունը նորմայում գերազանցում է 10 մլ/վրկ-ը:
• Առավելագույն արագության հասնելու ժամանակը նորմայում 4-9 վայրկյան է:
• Միզարձակման ընդհանուր ժամանակը գնահատվում է բժշկի կողմից՝ ըստ արտազատված ծավալի:
• Արտազատված մեզի ծավալը: Իդեալական դեպքում հետազոտությունն օբյեկտիվ է համարվում, եթե ընդհանուր ծավալը կազմում է 200-500 մլ:
  Նվազագույն ծավալը, որի ժամանակ կարելի է հաշվի առնել ուրոֆլոումետրիայի արդյունքները, կազմում է 100 մլ:
• Միզարձակման սկզբի համար անհրաժեշտ ժամանակը, սովորաբար, 10 վայրկյանը չի գերազանցում: Սակայն պետք է հաշվի առնել հոգեբանական այն գործոնը, որը խանգարում է որոշ մարդկանց համապատասխան ձևով միզել անհարմար պայմաններում:

Ինչպես նախապատրաստվել ուրոֆլոումետրիային

• Հետազոտությունից 30-60 րոպե առաջ անհրաժեշտ է խմել 0,5-1 լիտր ջուր:
• Հիվանդը սպասում է մինչև միզելու ցանկության առաջանալը և այդ մասին հաղորդում է բժշկին:
• Իրականացվում է հետազոտությունը, որի ընթացքում հիվանդի համար անհրաժեշտ է հարմար պայմաններ ստեղծել: Անհրաժեշտության դեպքում բացվում է ջրի ծորակը՝ պայմանական ռեֆլեքսն ուժեղացնելու նպատակով:
• Որոշ դեպքերում, օբյեկտիվ տվյալների ստացման նպատակով անհրաժեշտ է մի քանի հետազոտություն իրականացնել:

Հարցեր, պատասխաններ, մեկնաբանություններ