Հիվանդի բուժումը սկսվում է լաբորատոր հետազոտություններից. izmirlianmedicalcenter.com

Բուժման արդյունավետությունը, հիվանդության հավանական բարդացումների կանխարգելումը, նախևառաջ, կապված են ճշգրիտ ախտորոշման հետ: Բարեբախտաբար, վերջին ժամանակաշրջանում բժշկագիտությունը և տեխնոլոգիաները բավականաչափ զարգացել են և հնարավոր է ստանալ հետազոտությունների գերճշգրիտ արդյունքներ: Ժամանակակից ախտորոշման տեխնոլոգիաները ներդրվել ու կիրառվում են նաև Հայաստանում, իսկ մեկ տարի է, ինչ «Իզմիրլյան» ԲԿ լաբորատորիան վերազինվել է ժամանակին համահունչ նորագույն սարքերով:

«Իզմիրլյան» ԲԿ լաբորատորիայի վարիչ Վահան Գևորգյանն այն հարցին, թե ի՞նչ նորագույն սարքերով է հագեցած «Իզմիրլյան» ԲԿ լաբորատորիան, փաստեց և վստահեցրեց, որ այսօր բարձրորակ լաբորատոր հետազոտություններ ստանալու համար արտերկիր մեկնելու անհրաժեշտություն չկա, քանի որ ոչ պակաս որակյալ, ճշգրիտ ու առավել մատչելի հետազոտություններ են իրականացվում մեր երկրում:

«Իզմիրլյան» ԲԿ լաբորատորիան գործում է 1982 թվականից և իր գործունեության ընթացքում միշտ համապատասխանել է ժամանակի միջազգային չափորոշիչներին:

Լինելով Մայր Աթոռ Սուրբ Էջմիածնի հովանու ներքո գործող կառույց՝ հիվանդանոցը պարբերաբար համալրվում է նորագույն սարքավորումներով: Անմասն չի մնում լաբորատոր բաժանմունքը: Այժմ կիրառվում է համաշխարհային նշանակության եվրոպական և ճապոնական առաջատար ավտոմատացված սարքավորումներ, մասնավորապես. Hitachi-Roche ընկերության կենսաքիմական և իմունոլոգիական, ճապոնական Sysmex ընկերության արյան և մեզի հետազոտության, ինչպես նաև արյան մակարդելիության համակարգի ֆրանսիական Stago ընկերության արտադրության սարքավորումները:

Լաբորատորիայի ախտորոշիչ հետազոտության հիմնական ուղղությունները

Լաբորատորիան ներառում է է կլինիկական, կենսաքիմիական, շճաբանական, ինչպես նաև իմունաֆերմենտային հետազոտությունների ստորաբաժանումները: Կատարվում են տարբեր ախտաբանական վիճակների ժամանակ սպիտակուցային, ածխաջրային, ճարպային փոխանակության, էլեկտրոլիտների և թթվա-հիմնային հավասարակշռության խանգարումների հետազոտություններ թերապևտիկ, վիրաբուժական, ուրոլոգիական ոլորտներում:

Բաժանմունքի գործունեության մեջ լայն կիրառում են գտել շաքարային դիաբետի, սակավարյունության, սրտամկանի ախտահարման, վարակների, վահանաձև գեղձի, վերարտադրողական բնագավառի հիվանդությունների, տարբեր օրգան-համակարգերի օնկոմարկերների, հորմոնների նկատմամբ հետազոտությունները:

«Իզմիրլյան» ԲԿ լաբորատորիայի աշխատակիցներն ունեն տարիների փորձ, պարբերաբար վերապատրաստվում են, ուսումնասիրում նորագույն մեթոդները:

Մարդկային գործոնն` ավտոմատացված համակարգում

Առաջին տպավորությունը լաբորատորիայում, որ ամեն ինչ ավտոմատացված է, որ, սեղմելով սարքավորման սեղմակը, ստանում ես բոլոր հնարավոր պատասխանները, այնքան էլ չի համապատասխանում իրականությանը: Ճշգրիտ ախտորոշում ստանալու համար, պահանջելով հիմնավոր գիտելիքներ, աշխատանքը շարունակում է մնալ բարդ և պատասխանատու: Դրանից զատ, նոր տեխնոլոգիական առաջընթացը, բժշկական ցանկացած բնագավառում բուռն զարգացումները ստիպում են բժշկին անընդհատ ինքնազարգացմամբ զբաղվել, տիրապետել ախտորոշման նորագույն մեթոդներին ու սկզբունքներին:

Ցավոք, այսօր մարդիկ բժշկի են դիմում ուշացած, հիվանդության արտահայտված ախտանշանների ժամանակ: Նման խնդիրներից խուսափելու համար հարկ է կանխարգելիչ հետազոտություններ անցնել և վաղ հայտնաբերել յուրաքանչյուր շեղում:

Վահան Գևորգյան
«Իզմիրլյան» ԲԿ լաբորատորիայի բաժանմունքի վարիչ

Զրույցը վարեց հասարակայնության հետ կապերի պատասխանատու Ամալյա Գևորգյանը

Հարցեր, պատասխաններ, մեկնաբանություններ