Դեղագործական ընկերությունների դերը բժիշկների իրազեկման գործում

Հարգելի՛ ընթերցողներ, դեղագործական ընկերությունները հաճախ ոչ միայն տեղեկություն են տարածում նոր դեղամիջոցների վերաբերյալ, այլև հանրության ուշադրությունն են սևեռում զանազան լուրջ խնդիրների վրա, որոնց անտեսումը հետագայում դառնում է ծանր հիվանդությունների և հաշմանդամության պատճառ։

Որպես օրինակ նշել էինք խլամիդիոզի պրոբլեմի լուսաբանումը` PLIVA և օստեոպորոզինը` SERVIER ու HOFFMAN-LA ROCHE ընկերությունների կողմից։ Հաճախ այս գործունեությունը զուգորդվում է դեղագործական շուկայում նոր դեղերի ի հայտ գալու հետ, երբ ընկերությունները հանրությանը ակտիվորեն ներկայացնում են այս կամ այն խնդիրը և այնուհետև հիմնավորում առաջարկվող նոր դեղամիջոցի կիրառման անհրաժեշտությունը։

Սակայն դեղագործական ընկերությունների դերը դրանով չի սահմանափակվում։ Նրանք հաճախ ցանկություն են հայտնում սատարելու և հովանավորելու տարբեր առողջապահական գիտաժողովների և միջոցառումների իրականացումը։

Հարց է ծագում, թե ո՞րն է արդյոք նման «լրացուցիչ ծախսերի» նպատակը։ Այս հարցի պատասխանը կարելի է ստանալ` ծանոթանալով «Մարդու առողջությունը» VI ազգային գիտաբժշկական կոնգրեսի աշխատանքներին։ Գիտաժողովը տեղի է ունենում ամեն տարի աշնանը ՀՀ ԱՆ Առողջապահության ազգային ինստիտուտում։

Գիտաբժշկական կոնգրեսի հիմնական նպատակն է մասնագետների ուշադրությանը ներկայացնել արդի բժշկագիտության նվաճումները։ «Մարդու առողջությունը» ազգային գիտաբժշկական կոնգրեսին ներկայացված գիտական աշխատանքները տպագրվում են համապատասխան ժողովածուում, իսկ խմբագրական կոլեգիայի կարծիքով առավել ուշագրավ նյութերը ներկայացվում են զեկուցումների տեսքով։ Հատկանշական է, որ զեկուցումներով հանդես են գալիս ինչպես անվանի գիտնականներ, այնպես էլ երիտասարդ գիտաշխատողներ և ասպիրանտներ։ Զեկուցումների քննարկումների արդյունքների հիման վրա ուղենշվում են ոլորտի առկա խնդիրներն ու ձեռքբերումները։ Բացի այդ, «Մարդու առողջությունը» ազգային գիտաբժշկական կոնգրեսին բնորոշ է նաև դեղագործական ընկերությունների կողմից նախաձեռնված ուղեկցող սիմպոզիումների անցկացումը, որոնց ընթացքում բժիշկները ծանոթանում են ընկերությունների կողմից կատարված վերջին գիտական հետազոտությունների արդյունքներին։

Հաշվարկները ցույց են տալիս, որ կոնգրեսի անցկացման 3 օրերի ընթացքում ակադ.. Ս. Ավդալբեկյանի անվան Առողջապահության ազգային ինստիտուտ են այցելում 2000-2500 բժիշկ։ Հենց սրանով էլ բացատրվում է վերոհիշյալ «լրացուցիչ ծախսերի» անհրաժեշտությունը։ Չէ՞ որ դեղեր արտադրող և ներկրող ու բժշկական տեխնիկայով ապահովող ընկերություններին միշտ էլ պետք են նմանատիպ հանդիպումները բժիշկների հետ, որոնց ժամանակ կարելի է ներկայացնել սեփական արտադրանքը։ Այս բոլոր հնարավորությունները ստեղծվում են 3 օր շարունակ համապատասխան մասնագետների հետ շփման, նրանց շրջանում դեղերի մասին տպագրական նյութերի բաժանման, նոր կապերի հաստատման և յուրաքանչյուր ընկերությանն անհրաժեշտ տվյալների բազաների համալրման միջոցով։ Բացի այդ, կոնգրեսի կազմկոմիտեն առավել արդյունավետություն ապահովելու նպատակով նիստերի դահլիճի հարևան սրահում կազմակերպում է դեղերի և բժշկական տեխնիկայի ցուցահանդես։

Հարցեր, պատասխաններ, մեկնաբանություններ