Ունեք միզարձակման հետ կապված խնդիրնե՞ր… izmirlianmedicalcenter.com

Միզարձակության խանգարումները բազմազան են տղամարդկանց մոտ. Նմանատիպ խնդիրների դեպքում «Իզմիրլյան» բժշկական կենտրոնում մասնագետի կողմից կիրականացվի զննում և կուղղորդի համապատասխան հետազոտության, եթե ձեզ մոտ առկա են հետևյալ ախտանիշները.

1.  հաճախամիզություն (միզարձակություն օրվա ընթացքում ավելի քան 6 անգամ),
2.  գիշերային հաճախամիզություն (միզարձակություն գիշերվա ընթացքում ավելի քան 2 անգամ),
3.  ցավոտ միզարձակություն,
4.  մեզի շիթի թուլացում (հիվանդը կարող է չնկատել մեզի շիթի թուլացած լինելը, քանի որ այն հիմնականում առաջանում է աստիճանաբար` տարիների ընթացքում),
5.  միզելուց հետո միզապարկի ոչ լրիվ դատարկման զգացողություն,
6.  միզարձակության սկզբում՝ ուշացում (հիվանդը ստիպված է լինում սպասել որոշակի ժամանակ` միզարձակության սկիզբում: Նորմայում պահանջվում է սպասել ոչ ավելի, քան՝ 2-3 վայրկյան),
7.  մեզի ընդհատվող շիթ (միզելու ընթացքում մեզի շիթի հանկարծակի ընդհատում և որոշակի ժամանակ անց՝ վերսկսում),
8.  միզելուց հետո միզուկից մեզի արտահոսք՝ կաթիլների ձևով (նորմայում, միզարձակության վերջում միզուկի մնացորդային մեզը հետ է հոսում միզապարկ: Խանգարումների դեպքում հիվանդը ստիպված է լինում միզարձակության վերջում թափահարել անդամը` միզուկը դատարկելու նպատակով),
9.  Միզարձակության ընթացքում որովայնի և կոնքի մկանների լարում (նորմայում միզարձակության ընթացքում որովայնի և կոնքի մկանները լարելու կարիք չի լինում, քանի որ միզապարկի մկանային համակարգը ինքնուրույն ապահովում է բավարար միզարձակություն):

Միզարձակության վերոնշյալ խանգարումները հիմնականում հանդիպում են շագանակագեղձի բարորակ գերաճի դեպքում:

Եվրոպական և ամերիկյան երկրներում շագանակագեղձի բարորակ գերաճի հանդիպման հաճախականությունը` 40 տարեկանից հետո, կազմում է մոտ 60%: Կախված հիվանդության աստիճանից` տարբերում ենք բուժման դեղորայքային և վիրահատական եղանակներ:

Վիրահատության հիմնական տեսակը, որն ընդունված է ամբողջ աշխարհում, շագանակագեղձի ներմիզուկային ռեզեկցիան է (միզուկի լուսանցքով մուտք գործելով դեպի շագանակագեղձ, հատվում են վերջինիս գերաճի ենթարկված մասերը` առանց մաշկի վրա որևէ կտրվածք կատարելու): Շագանակագեղձի ներմիզուկային ռեզեկցիայի մի քանի տարբերակներ կան:

«Իզմիրլյան» բժշկական կենտրոնն ապահովում է բոլոր ժամանակակից տարբերակները:

Աշխարհում լայն տարածում ունի լազերային մեթոդը: Հայաստանում շագանակագեղձի բարորակ գերաճի ներմիզուկային ռեզեկցիա` լազերային մեթոդով, կատարվում է միայն «Իզմիրլյան» բժշկական կենտրոնում:

Լրացուցիչ տեղեկությունների և մասնագիտական տեղեկատվության համար, կարող եք դիմել.

Հայաստան, Երևան,
Ահարոնյան փողոց  6
«ԻԶՄԻՐԼՅԱՆ»բժշկական կենտրոն
Ուրոլոգիայի կլինիկա՝  Գոռ Շադյան 
Հեռախոս. +374 10 24 24 83
Էլ. հասցե. [email protected]

Հարցեր, պատասխաններ, մեկնաբանություններ