Այրոց և մարսողության խանգարում հղիության ժամանակ. հարցազրույց Մարիամ Հակոբյանի հետ. morevmankan.am

Հղիության ընթացքում կնոջ մարմինն անընդհատ փոփոխության է ենթարկվում, ինչը որոշակի անհարմարություններ է առաջացնում: Որոշ անհարմարություններ կարող են առաջանալ հղիության առաջին շաբաթների ընթացքում, իսկ որոշներն՝ այն ժամանակ, երբ ծննդաբերությունն արդեն մոտ է:

Խոսենք հղիության ժամանակ հաճախ հանդիպող սրտխառնոցից։

Սրտխառնոցի մեղմ ձևերը շատ տարածված են հղիների մոտ: Դրանք արտահայտվում են հղիության առաջին շաբաթներին և
հղիության վաղ նշաններից են համարվում: Սրտխառնոցի մեղմ ձևը դիտվում է ապագա մայրերի 70-80%-ի մոտ: Ծանր ձևերը հազվադեպ են հանդիպում և ընթանում են հաճախակի փսխումներով:

Եթե սրտխառնոցը մեղմ է և չի ուղեկցվում փսխումով, շատ դեպքերում բավական է սննդի մեջ որոշ նախազգուշական միջոցներ ձեռնարկել՝ տհաճությունը մեղմելու համար. օրինակ, միմյանցից առանձնացնել կերակուրները, խուսափել ծանրամարս կերակուրներից, ինչպիսիք են՝ տապակած սնունդը և կենդանական ճարպերը, որոնք պահանջում են երկարատև մարսողություն: Ածխաջրերը պետք է օգտագործել առավոտյան՝ արթնանալուն պես:

Ինչպե՞ս է արտահայտվում ռեֆլյուքսը հղիության ընթացքում։

Սրտխառնոցը ռեֆլյուքսային այրոցի մերձավոր ազգականն է, որը պայմանավորված է կերակրափողի լորձաթաղանթի բորբոքմամբ՝ ստամոքսի պարունակության դեպի վերև անցման արդյունքում: Հղիության ժամանակ դրան նպաստում են նաև հորմոնները, որոնք դանդաղեցնում են մարսողությունը: Որոշակի դեր է խաղում և մեծածավալ արգանդը, որը սեղմում է ստամոքսը՝ ներքևից:

Խանգարումը կանխելու համար նպատակահարմար  է կերակուրները բաժանել շատ փոքր բաժինների: Ավելի լավ է նախընտրել արագ մարսվող սնունդը, խուսափել կենդանական ճարպերից, թանձրուկներից և սուր համեմունքներից։

Ինչպե՞ս է արտահայտվում այրոցը հղիության ընթացքում

Այրոցն այրման զգացողությունն է ստամոքսում, որն, ասես, երբեմն կոկորդ է բարձրանում: Հղիության ընթացքում այրոցն առաջանում է, որովհետև կնոջ մարսողական համակարգը՝ հորմոնների մակարդակի փոփոխման արդյունքում, դանդաղ է աշխատում: Բացի այդ,  ինչպես արդեն նշվեց, ռեֆլյուքսի դեպքում մեծացած արգանդը կարող է հրել ստամոքսը՝ ստամոքսաթթուն բարձրացնելով վերև:

Ինչպե՞ս խուսափել մարսողության նշված խնդիրներից։

Խորհուրդներ․

• օրվա ընթացքում սնվել փոքր չափաբաժնով և հաճախ,
• ուտել դանդաղ,
• օգտագործել շատ հեղուկներ,
• խմել տաք հեղուկներ, օրինակ՝ խոտաբույսերով թեյ,
• խուսափել տապակած և դժվարամարս սննդից,
• ավելացնել բջջանքով հարուստ կերակուրները,
• ուտելուց անմիջապես հետո պետք է չպառկել,
• պառկելիս հետևել, որ գլուխն ավելի բարձր լինի, քան՝ ոտքերը, որպեսզի ստամոքսաթթուն չբարձրանա դեպի կոկորդ:

Անհրաժեշտ է նաև ակտիվ կյանք վարել, թեթև մարմնամարզություն կատարել: Այս ամենը կկանխի և կթեթևացնի մարսողական խանգարումները, ինչպիսիք են՝ վքնածությունը, սրտխառնոցը, այրոցը, աղիների  բորբոքումը,  ստամոքսի ցավը և փորկապությունը:

Անհրաժեշտության դեպքում կարելի է լուծողական օգտագործել, բայց միայն երբեմն՝ կոնկրետ խանգարման առկայության դեպքում: Լուծողականների երկարատև օգտագործումը ժամանակի ընթացքում կարող է հանգեցնել կախվածության, երբ աղիների այլևս անկարող են ինքնուրույն կատարել իրենց բնականոն գործառույթները, հնարավոր չէ ի հայտ եկող խնդիրները կանխել առանց դեղերի:

Հարցեր, պատասխաններ, մեկնաբանություններ