Տոքսոպլազմոզը և հղիությունը. morevmankan.am

Տոքսոպլազմոզն առաջացնում է Toxoplasma gondii մակաբույծը, որը հանդիպում է տարբեր թռչուններիև կաթնասունների մոտ, սակայն կարող է բազմանալ միայն կատուների օրգանիզմում, որոնք այդ մակաբույծների միակ տերերն են:

Բարեբախտաբար, բարձր իմունիտետով մարդկանց մոտ դիտվում են միայն թեթև ախտանշաններ: Բայց հղիության ընթացքում տոքսոպլազմոզը կարող է առաջացնել վիժում, մահացած պտղի ծնունդ կամ այլ լուրջ խնդիրներ:

Միայն այն դեպքում, երբ նախկինում արդեն եղել է այդ մակաբույծով վարակում, հղիության ընթացքում խնդիրներ չեն առաջանում:

Հարկ է մինչև հղիանալը պոլիկլինակայում բացառել տոքսիկոպլազմայի կամ հակամարմինների առկայությունը:

Կատուները հիմնականում վարակվում են մկներից և առնետներից: Արդեն կատվի օրգանիզմում T.gondii-ն արտադրում է միլիոնավոր ձվաբջիջներ, որոնք կղանքի հետ դուրս գալով արտաքին միջավայր՝ 18 ամիս կարող են պահպանվել հողում և ջրում՝ դառնալով վարակի աղբյուր խոզերի, կովերի և այլ կենդանիների համար: Իսկ մարդը վարակվում է հիմնականում հում կամ կիսաեփ մսի, չլվացված միրգ-բանջարեղենի, աղտոտված ջրի օգտագործման հետևանքով կամ վարակված հողի հետ շփման պատճառով:

Վարակից խուսափելու կանոնները:
 
Եթե տանը կատուներ եք պահում, նրանց խնամքը որոշ ժամանակ պետք է տան մյուս անդամներն իրենց վրա վերցնեն, կամ էլ կատվի արտաթորանքը հավաքեք ձեռնոցներով: Թույլ մի տվեք կատվին միայնակ դուրս գալ փողոց:

Միսը օգտագործելուց առաջ մի քանի օր պահեք սառցարանում: Միրգն ու բանջարեղենը օգտագործեք լավ լվացած վիճակում։

Այգում աշխատելու ժամանակ օգտագործեք ձեռնոցներ, իսկ հետո լավ լվացեք ձեռքերը։

Կատուների մոտ հիվանդությունն ընթանում է սուր և քրոնիկ: Քրոնիկի ժամանակ այն ընթանում է առանց ախտանշանների: Եթե տանը կատուներ կան, անպայման պետք է ժամանակին նրանց մոտ հայտնաբերել հիվանդությունը և դիմել համապատասխան բժշկի՝ ապահովելու համար ընտանիքի անդամների անվտանգությունը:

Սուր տոքսոպլազմոզի ախտանշաններն են.

• մկանային թուլություն,
• տենդ,
• դիարեա (փորլուծություն),
• տրեմոր (դող),
• կոորդինացիայի խանգարում,
• քաշի անկում,
• դեղնուկ,
• դեպրեսիա (ընկճախտ),
• կաթված,
• ախորժակի անկում,
• նշիկների բորբոքում,
• լեթարգիա,
• հևոց,
• փսխում
• աչքի ցանցաթաղանթի, ծիածանաթաղանթի և եղջերաթաղանթի բորբոքում:

Հարցեր, պատասխաններ, մեկնաբանություններ