Հղիության պլանավորում, առաջին նշաններ, հղիության թեստեր, ուլտրաձայնային հետազոտություն. morevmankan.am

Ընթերցողները հաճախ են հարցնում հղիության պլանավորման, առաջին նշանների, հղիության թեստերի և ընթացիկ հետազոտությունների մասին: Շատերիս հետաքրքրող այս թեման մեզ համար լուսավորեց Մոր և մանկան առողջության պահպանման գիտահետազոտական կենտրոնի մանկաբարձ-գինեկոլոգ Մերի Թադևոսյանը: 

Հղիության պլանավորում

Համատեղ ապրելու որոշումը սովորաբար զույգերին մղում է հղիության պլանավորման: Մեծ ու ճոխ հարսանիքներից հետո, բնականաբար, բոլոր բարեկամներն ու հարազատներն ունեն իրենց խորհուրդներն ու զգուշացումները: Ճիշտ է, վերջերս նաև բժշկին դիմելու տենդենց կա երիտասարդ զույգերի մոտ, սակայն նրանք հասարակության քիչ տոկոսն են կազմում: Զույգի հետազոտությունը թույլ է տալիս խուսափել մի շարք վարակներից, որոնք փոխանցվում են սեռական ճանապարհով, կանխատեսել հնարավոր բարդություններն ու գենետիկ հիվանդությունները, որ կարող է ժառանգել երեխան: Հետազոտությունը թույլ է տալիս որևէ խնդրի առկայության դեպքում ստանալու համակցված բուժում:

Կարևորությունը, միանշանակ, տրվում է կնոջ առողջական և իմունային կարգավիճակին: Այստեղ ո՛չ միայն գինեկոլոգիական ոլորտն է հետազոտվում, այլև յուրաքանչյուր խնդիր, որը կարող է ազդեցություն թողնել հղիության ընթացքի վրա: Հարկ է հաշվի առնել բոլոր առանձնահատկությունները, քրոնիկ վարակները, սոմատիկ հիվանդությունները, ըստ որոնց բժիշկը որոշում է՝ ինչպես վարել հղիությունը: 

 
Ամբողջ աշխարհում այժմ ընդունված է կնոջ օրգանիզմը զինել, այսպես կոչված, միկրորէլեմենտներով: Կարևոր նշանակություն ունի ֆոլաթթվի անհրաժեշտ քանակի առկայությունը կնոջ օրգանիզմում, որպեսզի ճիշտ նախապատրաստվի հղիության ընթացքին: Այն պետք է ընդունել հղիության առաջին եռամսյակում: 

Նախնական քայլեր

Կարևոր է, որ հղիություն պլանավորող կինն առողջ ապրելակերպ վարի: Ներկայում ծխող կանայք գերազանցում են տղամարդկանց: Առողջ երեխա ունենալու համար կարևոր է նիկոտինից հրաժարվելը, ինչը նաև անպտղության պատճառներից  մեկն է: Ծխող կնոջ օրգանիզմում զարգացող հղիության ընթացքը դժվար է կանխատեսել: Նախքան հղիանալը օրգազնիմը պետք է մաքրել ալկոհոլից, ծխախոտից, ոչ օգտակար սննդից: Միայն այս քայլերով արդեն մենք բարձրացնում ենք կնոջ իմունային կարգավիճակը՝ առանց կողմնակի միջամտության: Առողջ մարմնում միայն կարող է զարգանալ առողջ պտուղ:

Առաջին նշանները

1-ին նշան, որպես այդպիսին, դաշտանի բացակայությունն է: 1-2 օր ուշացումն այս պարագակում դեր չի խաղում, կանոնավոր սեռական կյանքով ապրող կինն առնվազն 5-6 օր ուշացման դեպքում կարող է մտածել հղիության հավանականության մասին: Սրտխառնոց, գլխապտույտ, փսխում, քնկոտություն. եթե կան այս նշանները, ուրեմն հաջորդ քայլն արդեն հղիության առկայության ստուգելն է թեստերի օգնությամբ:

Հղիության համար թեստեր

Եթե 1-2 օր դաշտանն ուշացել է, անիմաստ է թեստ դնելը: Եթե հղի եք, թեստը կարող է արդյունք ցույց տալ նաև առաջին 2 օրը, սակայն առավել արդյունավետ է կիրառել, երբ դաշտանային ցիկլն ուշացել է 5-7 օր: Թեստի միջոցով ճիշտ պատասխան կարելի է ստանալ միայն առավոտյան վերցրած մեզի պարագայում: Թեստերի տեսականին բազմազան է: Այսօր յուրաքանչյուր կին տեղեկացված է, որ 2 ձողերի առկայությունը խոսում է հնարավոր հղիության մասին: Ներկայում կան նաև թեստեր, որոնք ցույց են տալիս հղիության ժամանակահատվածն անգամ շաբաթներով: Իհարկե, առաջին ստույգ տվյալները հղիության մասին կարող է տալ արյան փորձաքննությունը և ուլտրաձայնային հետազոտությունը: 

 
Ուլտրաձայնային հետազոտություն. ե՞րբ և ի՞նչ հաճախականությամբ

Մինչև 8 շաբաթական հղիություն ուլտրաձայնային հետազոտություն անցնելու կարիք չկա: 7-8 շաբաթականում երևում է պտղի սիրտը: Սա, իհարկե՛, այն սիրտը չէ, որի մասին մենք բոլորս պատկերացում ունենք, այլ ընդամենը սրտի մի անոթն է, որի զարկը լսում ենք և տեսնում:: Վերոնշյալ շաբաթներում հետազոտությունը դեռևս պարտադիր չէ: Ուլտրաձայնային հետազոտությունը պարտադիր է 12-13 շաբաթական հղիության ժամկետում, քանի որ հենց այս շամանակահատվածում կատարվում է գենետիկական սկրինինգային քննություն : Սա այն ժամանակահատվածն է, երբ կարելի է կանխորոշել պտղի հետագա զարգացումը, հնարավոր արատների ու հիվանդությունների ձևավորումը և այն օպտիմալ ժամանակահատվածը, երբ դեռ թույլատրվում է հղիության ընդհատումը: Այս հետազոտությունը կարող է հուշել, թե ինչպես վարվել և ինչ քայլեր ձեռնարկել այդ ամիսներին: Իհարկե, դա դեռ չի նշանակում, որ պտղի մոտ չի կարող արատ կամ այլ խնդիրներ ախտորոշել ավելի ուշ շրջանում: Նման պարագայում պետք չէ մեղադրել բժշկին, որովհետև կան արատներ, որոնց զարգացումը հնարավոր է կանխորոշել միայն հետագա շաբաթներում: Մինչև իսկ 9 ամսական հղիության ժամանակ, երբ արդեն ամբողջովին ձևավորված է պտուղը, կարող են առաջ գալ անկանխատեսելի խնդիրներ, որոնք պետք է լինեն բժիշկի հսկողության տակ:

Հղիության ընթացքում կինը ցանկալի է առնվազն երեք անգամ ուլտրաձայնային հետազոտություն անցնի: Առաջին պարտադիր հետազոտությունը՝ 12-13 շաբաթական հղիության ժամանակ, 2-րդը՝ 18-20 շաբաթական, 3-րդը՝ 35-36 շաբաթականում, երբ արդեն հարկ է պարզել պտղի դիրքը, ծննդաբերության հնարավոր տարբերակները, պտղի վիճակը, բազմաֆունկցիոնալությունը: եթե հղիության ընթացքում նկատվւմ են որոշ խնդիրներ , ապա բժիշկի ցուցումով անհրաժեշտ է կատարել դոպլեր հետազոտություն, պարզելու համար պտուղ-ընկերքային շրջանառության կարգավիճակը:  

Հոդվածի շարունակությունը կարդալ հետևյալ հղումով

Հարցեր, պատասխաններ, մեկնաբանություններ