Քթի միջնապատի թեքում. հարցազրույց Ռաֆայել Պետրոսյանի հետ. armeniamedicalcenter.am

Ի՞նչ է քթի միջնապատի թեքությունը՝ որպես ախտաբանություն, և որո՞նք են նրա պատճառները։

Քթի միջնապատի թեքությունը/ (Deviatio septi nasi) միջնապատի ոսկրային կամ աճառային կառուցվածքների մշտական շեղումն է: Այն տարածված ախտաբանություն է քիթ-կոկորդ-ականջաբանության ոլորտում:

Առաջացման պատճառները կարող են լինել հետվնասվածքային (54%), ֆիզիոլոգիական՝ պայմանավորված միջնապատը կազմող աճառային և ոսկրային հատվածների վերջնական զարգացման ժամկետների տարբերությամբ (32%), ախտաբանական, որը պայմանավորված է խթի խոռոչի պոլիպների, հիպերտրոֆիկ խեցիների, քթի խոռոչի տարբեր գոյացությունների առկայությամբ (8%):   

Քթի միջնապատի առավել հաճախ ո՞ր հատվածում է դիտվում միջնապատի թեքումը։

Քթի միջնապատի  թեքվածությունը կարող է լինել միջնապատի տարբեր հատվածներում, և առաջացնել տարբեր աստիճանի քթային դժվարաշնչություն։  Հաճախ քթի միջնապատի թեքվածությունը համակցվում է ոսկրային փշերի հետ, որոնք հիմնականում տեղակայված են լինում միջնապատի աճառային և ոսկրային հյուսվածքների միացման տեղում։

Ինչպիսի՞ն է քթի միջնապատի թեքվածության կլինիկան։

Քթի միջնապատի դեֆորմացիայի պատճառով նեղանում են քթային անցուղիները և դժվարանում է օդի հոսքը քթով։ Քթի միջնապատի թեքվածության ժամանակ բուժառուները հիմնականում գանգատվում են քթային դժվարաշնչությունից, քթի փակվածությունից, երբեմն քթից լորձային կամ լորձաթարախային արտադրությունից։

Որոշ դեպքերում լինում են պարբերական գլխացավեր, ըմպանի չորություն,  ականջներում փակվածության և աղմուկի զգացում, հոտառության վատացում:

Հարքթային խոռոչների աերացիայի խանգարման հետևանքով այդ խոռոչներում կարող են առաջանալ բորբոքային խնդիրներ։  

Քթի միջնապատի թեքումների ժամանակ ինչո՞ւ են գլխացավեր առաջանում։

Քթի միջնապատի դեֆորմացիաների պատճառով գլխացավերի առաջացումը բացատրվում է նրանով, որ միջնապատի թեք հատվածը շփվում է քթի կողմնային (լատերալ) պատի լորձաթաղանթի հետ, ճնշում է գործադրում դրա վրա՝ գրգռելով լորձաթաղանթը, որն առաջացնում է ռեֆլեկտոր գլխացավ։

Քթի միջնապատի դեֆորմացիան կարող է ուղեկցվել նաև վազոմոտոր ռինիտով, գործընթացի անցումով դեպի եվստախյան փող և միջին ականջ։

Ինչպե՞ս են ախտորոշվում քթի միջնապատի դեֆորմացիաները։

Ախտորոշումն իրականացվում է բուժառուի գանգատների, հիվանդության անամնեզի և ռինոսկոպիկ պատկերի հիման վրա: Քթի խոռոչի հետին և միջին հատվածի ոչ բավարար տեսանելիության դեպքում կատարվում է քթի խոռոչի լորձաթաղանթի անեմնիզացիա՝ անոթասեղմիչներով։

Ախտորոշման համար օգտագործվում են նաև էնդոսկոպիկ սարքեր, ռինոմոնոմետրիա, համակարգչային տոմոգրաֆիա (ՀՏ)։

Ինչպե՞ս բուժել։

Բուժումը, սովորաբար, վիրահատական է: Վիրահատությունը կատարվում է ընդհանուր կամ տեղային անզգայացմամբ։ Կոպիտ միջամտությունների, ոչ համապատասխան ցավազրկման դեպքում և հետվիրահատական ընթացքից կախված՝  կարող են զարգանալ հետվիրահատական կպումներ, դեֆորմացիաներ։

Հարցեր, պատասխաններ, մեկնաբանություններ