Գլխամաշկի քոր. 5 առավել լայն տարածում գտած խնդիրներ եւ լուծումներ. news.am

Եթե պարբերաբար ստիպված եք գլխամաշկը քորել՝ դեռ չի նշանակում, որ երեւույթի պատճառը թեփն է: Մի շարք այլ խանգարումներ եւս կարող են գլխամաշկի քոր առաջացնել:

Այնպես որ, տհաճ երեւույթից ազատվելու համար նախեւառաջ հարկավոր է դրա առաջացման պատճառը գտնել:

Ստորեւ դրանցից 5 ամենատարածվածներն ու բուժման համապատասխան միջոցներն ենք ներկայացնում. 

1. Թեփը եւ սեբորեային դերմատիտը գլխամաշկի քորի առաջացման ամենալայն տարածում գտած պատճառներն են:
   «Գանգամաշկին առկա խմորիչների բաղադրության աճը կարող է համապատասխան բորբոքային գործընթաց հրահրել՝ քորի տեսքով», - մեկնաբանել է մաշկաբան Մելիսա Պիլիանգը:
   Բուժում. Մեղմ արտահայտված դեպքում կարելի է սելենիում կամ ցինկի պիրիտիոն պարունակող շամպունների օգնությանը դիմել՝ խմորիչների բաղադրության կարգավորման նպատակով: Իսկ առավել ծանր դեպքերում բժշկի կողմից նշանակված հատուկ հակասնկային շամպունները, քսուքները, լուծույթները կամ փրփուրները կարող օգտակար լինել:
   
   
2. Փսորիազ. այս քրոնիկ աուտոիմուն հիվանդությունը մաշկի կամ գանգամաշկի վրա ի հայտ եկող կարմիր, մեծ չափերի բծերով է բնորոշվում: Խանգարումը ո՛չ միայն վարակիչ չէ, այլ նաեւ առաջացման հստակ հասկանալի պատճառներ չի դրսեւորում: Այդուհանդերձ, հիվանդության ձեռք բերման ռիսկը բարձր է այն պարագայում, երբ ընտանիքի անդամներից որեւէ մեկի մոտ հաստատվել է դրա առկայությունը:
   Բուժում. Դոկտոր Պիլիանգը խորհուրդ է տալիս, որպես գանգամաշկի փսորիազի վերահսկման միջոց, կուպր կամ սալիցիլաթթու պարունակող բուժական շամպունների օգնությանը դիմել: Իսկ եթե դրանք էլ չեն օգնում, հարկավոր է մաշկաբանի խորհրդին դիմել՝ առավել ազդեցիկ շամպունների տեսքով նշանակում ստանալու համար:
   Tinea capitis. այս սնկային վարակը, որ նաեւ «խուզող մկնատամ» անվամբ է հայտնի, մազերի ֆոլիկուլներն ախտահարելու եւ փոքր՝ աստիճանաբար մեծացող մակերեսով մազաթափություն հրահրելու հատկություն ունի: Միաժամանակ նաեւ գլխամաշկին սեւ կետերով ցանի առաջացման պատճառ կարող է դառնալ:
   Բուժում. Մաշկի «խուզող մկնատամի» առկայության պարագայում տհաճ երեւույթներից կարելի է ցանկացած հակասնկային քսուքի օգնությամբ ազատվել, սակայն երբ Tinea capitis-ը գլխամաշկն է ախտահարել, խնդրին միայն բժշկի նշանակմամբ՝ հակասնկային դեղահաբերի միջոցով կարելի է լուծում տալ:
   
   
3. Գլխի ոջիլը, որպես կանոն, դպրոցահասակ երեխաների հետ է ասոցացվում, այնչինչ կարող է ցանկացած տարիքի մարդու մոտ ի հայտ գալ: Դոկտոր Պիլիանգի հավաստիացմամբ, այն մաքուր մազեր է սիրում, այնպես որ, եթե պարզվել է՝ գանգամաշկի քորի պատճառը ոջիլն է, դեռ չի նշանակում, թե հիգիենայի կանոներին չեք հետեւում:
   Բուժում. Գլխի ոջիլից կարելի է ինսեկտիցիդ պիրետրին կամ պերմետրին պարունակող շամպունների օգնությամբ ազատվել: «Շամպունի յուրաքանչյուր բանաձեւ իր կիրառման եղանակն ունի: Այնպես որ, ոջիլից ազատվելու համար, հարկավոր է տարայի վրա գրառված ցուցումներին հետեւել», - զգուշացրել է դոկտոր Պիլիանգը:
   
   
4. Ալերգիկ ռեակցիաներ. մազերի ներկը, էկզեման եւ ատոպիկ դերմատիտը գլխամաշկի քորի առաջացման առավել հազվադեպ հանդիպող պատճառներից են:
   Բուժում. Ալերգիկ ռեակցիաները, որպես կանոն, դրանց առաջացման պատճառը հայտնաբերելուց եւ չեզոքացնելուց հետո, երկար չեն տեւում: Մինչդեռ պատճառը որոշ դեպքերում միայն մաշկաբանի միջնորդությամբ եւ մի շարք հետազոտությունների միջոցով կարելի է պարզել:

Ե՞րբ պետք է անհանգստանալ

Գլխամաշկի քորը մեծավ մասամբ պատճառ չէ՝ մտահոգության համար: Բայց որոշ դեպքերում այն կարող է բավականին լուրջ խնդիրների առկայության մասին վկայել: Այնպես որ, հարկավոր է բժշկի օգնությանը դիմել, երբ. 

• ազատ վաճառքի շամպունները որեւէ կերպ չեն օգնում,
• քորը նաեւ գիշերային, ինչպես նաեւ աշխատանքի կամ ուսման ժամերին է շարունակվում,
• գլխամաշկին՝ ոջիլ կամ մազին՝ ոջիլի ձու եք նկատել,
• քոր եկող մասերը նաեւ ցավոտ են:

Հարցեր, պատասխաններ, մեկնաբանություններ