Գիտնականները՝ սեռական բազմացման առավելությունների մասին. 1in.am

Իշախոտի տարբեր տեսակների հիման վրա կանադացի գիտնականները ապացուցել են կենսաբանության կարևորագույն հիպոթեզներից մեկը՝ սեռական բազմացումը ավելի լավ է, քան անսեռ բազմացումը, քանի որ գործնականում այդ օրգանիզմներն ունենում են ավելի ամուր առողջություն՝ ժամանակի հետ նրանց սերունդների մոտ չեն գոյանում վնասակար մուտացիաներ: Հետազոտության արդյունքները ներկայացված են Molecular Biology and Evolution ամսագրում:

Երկար ժամանակ սեռական բազմացումը համարվում էր էվոլյուցիայի պարադոքս: Մաթեմատիկական տեսանկյունից անսեռ բազմացումը (ագամոգենեզ) թույլ է տալիս յուրաքանչյուր օրգանիզմին (ոչ միայն պոպուլյացիայի կեսին) սերունդ տալ ու նրան փոխանցել բոլոր գեները (այլ ոչ թե 50 տոկոսը): Սակայն այն հաշվի չի առնում մուտացիաների գործոնը:

Սեռական բազմացման դեպքում գեները միախառնվում և վերազուգակցվում են անկանխատեսելիորեն, ինչի արդյունքում յուրաքանչյուր սերունդ զրկվում է մուտացիաների ինչ-որ մասից, որոնք կուտակվել են ծնողների գեներում: Անսեռ բազմացման դեպքում, ընդհակառակը, մուտացիաներն ամբողջությամբ փոխանցվում են սերնդեսերունդ, ինչի հետևանքով տեսակի ընդհանուր առողջական վիճակը վատթարանում է, ու նա պարտվում է ավելի ուժեղ օրգանիզմներին, իսկ իր անհետացման շանսերը մեծանում են:

Այսպիսով՝ հետազոտության հեղինակները փաստում են, որ սեռական կյանքի տարածվածությունը բացատրվում է առողջության վրա դրա բարերար ազդեցությամբ:

Հարցեր, պատասխաններ, մեկնաբանություններ