Ստոծանու կերակրափողային բացվածքի ճողվածք. izmirlianmedicalcenter.com

Տեղի է ունենում կերակրափողի ներորովայնային հատվածի, ստամոքսի սկզբնական հատվածի, իսկ երբեմն էլ բարակ աղու մի մասի տեղաշարժ կրծքավանդակի խոռոչ :

Ռիսկի գործոնները

Հիվանդության հիմնական պատճառներն են՝ ստոծանու բացվածքում կերակրափողն անշարժացնող կապանների թուլությունը, ներորովայնային ճնշման բարձրացումը, ստամոքսի շարժողական ֆունկցիայի խանգարումը: Հիվանդացության դեպքերի կեսից ավելին հայտնաբերվում է տարեց մարդկանց մոտ՝ 55-60 տարեկան հասակում, ինչը պայմանավորված է, մասնավորապես, կապանային համակարգի թուլացման բնական գործընթացով:

Ախտանիշները

Բութ, ճնշող ցավ սրտգդալի շրջանում, որը տարածվում է կերակրափողի ուղղությամբ և ճառագայթում դեպի միջթիակային շրջան: Հիմնականում առաջանում է սննդի ընդունումից հետո, ծանրաբեռնվածության, հազի ժամանակ, պառկած դիրքում:

Հաճախ հիվանդությունը զարգանում է անախտանիշ և հայտնաբերվում է պատահաբար՝ կերակրափողի կամ ստամոքսի ռենտգենաբանական հետազոտության ժամանակ:

Ախտորոշումը

Հիմնված է կլինիկական պատկերի և ռենտգեն ախտորոշման տվյալների հիման վրա:

Բուժումը

Ախտանիշների բացակայության դեպքում բուժում չի պահանջվում: Խորհուրդ է տրվում հետևել սննդակարգին. կարևոր է բացառել ճարպակալումը, քանի որ այն նպաստում  է ներորովայնային ճնշման բարձրացմանը: Հիվանդության ախտանիշների առաջացման դեպքում թերապևտի կամ գաստրոէնտերոլոգի կողմից նշանակվում է դեղորայքային կոնսերվատիվ բուժում՝ ստամոքսի մոտորիկան նորմալացնելու նպատակով: Ճողվածքի մեծ չափերի դեպքում, կերակրափողում խոցերի առկայության և բուժման անարդյունավետության դեպքում հիվանդին խորհուրդ է տրվում վիրահատություն, որն իրականացվում է լապարասկոպիկ եղանակով:

Հսկողությունը

Հսկվում են թերապևտի, ընդհանուր պրակտիկայի բժշկի, գաստրոէնտերոլոգի մոտ: Տարեկան մեկ անգամ ցուցված է գաստրոսկոպիա:

Հարցեր, պատասխաններ, մեկնաբանություններ