Սրտի նոպայի ժամանակ առաջին օգնությունը. նիտրոգլիցերինի ընդունման մարտավարությունը. armeniamedicalcenter.am

Ստենոկարդիան հանկարծակի առաջացող սրտի ցավի նոպան է: Այն անցկացնելու համար նիտրոգլիցերին է ընդունվում, որը դեղատներում վաճառվում է 0,5 մգ հաբերի ձևով: Առկա է նաև 1%-անոց սպիրտային լուծույթը, որի 3 կաթիլը պարունակում է 0,5 մգ նիտրոգլիցերին, և 1%-անոց 0,5 կամ 1 մգ նիտրոգլիցերին պարունակող յուղային լուծույթը` պատիճներով:

Նիտրոգլիցերինը լավ ներծծվում է բերանի լորձաթաղանթից, այդ պատճառով հաբը պահում են լեզվի տակ` 40-60 վրկ, մինչև լրիվ ներծծվելը: 1%-անոց լուծույթի կիրառման դեպքում 1-2-3 կաթիլ լցնում են լեզվի տակ: Արյան մեջ անցնելով` նիտրոգլիցերինը ցավազրկող ազդեցություն է գործում: Դա պայմանավորված է մաշկի, մկանների, որովայնային օրգանների մանր անոթների վրա նրա արագ և արտահայտված անոթալայնիչ ազդեցությամբ: Դրա արդյունքում պակասում է արյան հոսքը դեպի սիրտ և սրտամկանի պահանջը թթվածնի նկատմամբ նվազում է:

Նիտրոգլիցերինը, միաժամանակ, հանում է կորոնար զարկերակների սպազմը և մեծացնում միոկարդի արյան հոսքը: Այս ամենի հետևանքով վերանում է սրտի իշեմիան:

Սակայն, երբեմն պատրաստուկի ընդունման ժամանակ դիտվում են կողմնակի երևույթներ կամ անհատական զգայունություն:  Այդ պատճառով նրա ընդունման համար պետք է որոշ կանոններ պահպանել:

Սկզբում միանգամյա դոզան պետք է լինի ½ հաբ կամ 1%-անոց լուծույթի 1-2 կաթիլ: Այդ առաջին ընդունումը ցանկալի է կատարել նոպայից դուրս և բժշկի ներկայությամբ, ով կարող է պարզել դեղի նկատմամբ անհատական զգայունությունը, արյան ճնշման անկման և պուլսի ցուցանիշները:

Ստենոկարդիայի նոպայի ժամանակ հիվանդը պետք է դադարեցնի ֆիզիկական ծանրաբեռնվածությունը, նստած կամ պառկած դիրք ընդունի: Եթե ցավը չի անցնում, անհրաժեշտ է ընդունել նիտրոգլիցերին` նստած կամ պառկած վիճակում, քանի որ անոթների արագ լայնացման արդյունքում կարող է դիտվել ճնշման կտրուկ անկում և ուշագնացություն:

Նիտրոգլիցերինը կարելի է ընդունել յուրաքանչյուր 5 րոպեում` մեկ անգամ, քանի դեռ ցավը չի դադարել, բայց 3 հաբից ոչ ավելի` 15 րոպեի ընթացքու: Դեղի ազդեցությունը կարճատև է, ընդամենը 10-15 րոպե: Այդ պատճառով այն կարելի է շատ անգամ ընդունել: Օրվա դոզան առաջարկվում է 6 հաբ:

Նիտրոգլիցերինի ընդունման ժամանակ հաճախ դիտվում է գլխացավ, ականջներում` աղմուկ, և այդ պատճառով հաճախ հիվանդները հրաժարվում են այն ընդունել: Սակայն դա սխալ մոտեցում է, հատկապես, որ այդ ախտանիշները ոչ մի վտանգ չեն ներկայացնում: Իսկ դրանցից խուսափելու համար կարելի է դոզան պակասեցնել ½ հաբ կամ 1-2 կաթիլ` շաքարի կտորի վրա: Եթե այդ դոզան ևս գլխացավ է առաջացնում, ապա կարելի է 1%-անոց նիտրոգլիցերինը համակցել մենթոլի 3%-անոց սպիրտային լուծույթի հետ: Ըստ Վոտչալի հետազոտության, մենթոլը լուծիչի դեր է կատարում և ուժեղացնում է նիտրոգլիցերինի ազդեցությունը: Այդ կերպ դադարեցվում է ստենոկարդիայի նոպան՝ առանց գլխացավի:

Հարցեր, պատասխաններ, մեկնաբանություններ